பாலஸ்தீனம்...!

பாலஸ்தீனம் அரேபியர்களுக்கு சொந்தமானது....!

பூர்வீகம்...!

ஈரான்- இஸ்ரேல்-சில தகவல்கள்

ஈரானின் மக்கள் தொகை 7 கோடியே 70 லட்சம். பார்சி மொழியே தாய் மொழி. ஆர்யன் என்பதே ஈரான் என்று அழைக்கப்படுகிறது எனும் கருத்துண்டு. தற்காலப் பாரசீக மொழியில் உள்ள "ஈரான்" எனும் பெயர் "ஆரியர்களுடைய நிலம்" எனும் பொருள்படும் ஈரானியச் சொல்லான "ஆர்யானா" என்பதில் இருந்து பெறப்பட்டது. 

3 ஆம் நூற்றாண்டைச் சேர்ந்த சசானியக் கல்வெட்டில் ஈரானைக் குறிக்க "ஏரான்" என்னும் சொல் பயன்படுத்தப் பட்டுள்ளது. இத்துடன் சேர்ந்திருந்த பார்த்தியக் கல்வெட்டில் ஈரானியர்களைக் குறிக்க "அர்யான்" எனும் பார்த்தியச் சொல் பயன்பட்டுள்ளது. 1935 வரை பாரசீகம் எனும் பொருளில் பெர்ஷியா என்றே ஈரான் அழைக்கப்பட்டது.

6 ஆயிரம் ஆண்டுகளுக்கு முன்பே நகர்ப்புற மக்கள் குடியேற்றங்கள் இருந்ததற்கான ஆதாரங்கள் உள்ளன. 4 ஆயிரம் ஆண்டுகளுக்கு முன்பாக ஆரிய நாடோடிக் கூட்டத்தினர் அலை அலையாக வந்து தங்கியுள்ளனர்.கி.மு. 7 மற்றும் 6 ம் நூற்றாண்டுகளில் ஒன்றுபட்ட தேசமாக ஈரான் வலுவுடன் இருந்துள்ளது.

கி.மு.334 ல் அலெக்சாண்டர் படையெடுத்து அப்போதிருந்த அகமெனிட் சாம்ராஜ்யத்தைக் கைப்பற்றினார். கி.மு.36 ல் மார்க் ஆண்டனி படையெடுத்து பார்த்திய அரசை தோற்கடித்தார். கி.பி.632 ல் அரேபியர்கள் பாரசீகத்தை வென்று இஸ்லாமிய அரசை நிறுவினர். 9 ம் நூற்றாண்டிற்குள் இஸ்லாம் பாரசீகத்தின் பிரதான மதமாக மாறியது.

கி.பி.1218 ல் செங்கிஸ்கான் படையெடுப்பால் பாரசீகம் பெரும் அழிவைச் சந்தித்தது. 25 லட்சம் மக்கள் தொகை இரண்டரை லட்சம் மக்கள் தொகையாக சுருங்கிப் போனது.16 மற்றும் 17 ம் நூற்றாண்டுகளில் சஃபாவிட் வம்ச ஆட்சியின் கீழ் ஷியா இஸ்லாமிய நாடாக மாறியது. 

1722 ல் ஆப்கானிய கிளர்ச்சியாளர்களால் சஃபாவிட் வம்ச ஆட்சி முடிவிற்கு வந்தது. 1735 ல் ஆப்கானியர்களை விரட்டிவிட்டு நாதிர்ஷா ஆட்சிக்கு வந்தார். இந்த நாதிர்ஷா தான் இந்தியாவிற்குள்ளும் படையெடுத்து கோஹினூரைக் கொண்டு சென்ற நபர்.

பல்வேறு படையெடுப்புகளையும், உள்நாட்டுக் குழப்பங்களையும் சந்தித்த பாரசீகம் 1906 ல் மன்னரின் கீழான முதல் பாராளுமன்றத்தை அமைத்துக் கொண்டது. 1925 ல் கஜார் வம்ச ஆட்சியை வீழ்த்தி ரேஸாகான் என்பவர் ரேஸாஷா என்ற பெயருடன் முடிசூட்டிக் கொண்டார். அவருக்குப் பிறகு அவரது மகன் ரேஸா பலாவி ஆட்சிக்கு வந்தார்.

1951 ல் ஆட்சிக்கு வந்த மொசாதிக் நாட்டின் எண்ணெய் வளத்தை அரசுடமையாக்கினார். இதனால் அமெரிக்காவின் கோபத்திற்கு ஆளாகி, 1953 ல் மொசாதிக் சிஐஏ சதியால் கைது செய்யப்பட்டார். ஷா மீண்டும் வலுப்பெற்றார். சிஐஏ உதவியுடன் எதிர்க்கட்சிகளை நசுக்கினார். ஷாவின் நடவடிக்கைகளை வெளிப்படையாக விமர்சித்த அயோதுல்லா கொமேனி சிறையிடப்பட்டு பிறகு நாடு கடத்தப்பட்டார்.

1978 ல் ஷா விற்கு எதிராக ஈரானியப் புரட்சி தொடங்கியது. 1979 ஜனவரியில் ஷா நாட்டை விட்டு ஓடினார். கொமேனி நாடு திரும்பினார். 1979 ஏப்ரல் 1 ஈரான் இஸ்லாமியக் குடியராகி, கொமேனி பெருந்தலைவரானார். அமெரிக்காவுடனான ஈரான் உறவு சீர்கெட்டது. 1979 அமெரிக்க தூதரகத்திலிருந்த 52 பேரை 444 நாட்கள் பிணைக்கைதிகளாக வைத்திருந்து விடுவித்தனர் ஈரானிய மாணவர்கள். 

இக்குழப்பத்தை பயன்படுத்தியே ஈரானுக்குள் புகுந்து தனது எல்லையை விரிவுபடுத்த முயன்றார் ஈராக் அதிபர் சதாம் உசேன். இதுவே ஈரான்- ஈராக் போராக வெடித்தது. 1988 ல் போர் முடிவுக்கு வந்தது. அதை தொடர்ந்து ரஃப்சஞ்சாணி தொடங்கி தற்போது விபத்தில் இறந்த இப்ராஹிம் ரைசி வரை ஆட்சி புரிந்தனர்.

மோசமான வானிலையால் விபத்து என்று சொல்லப்பட்டாலும், மோசமான அமெரிக்க அரசியல் ஈரானுக்குள் இஸ்ரேல் வடிவத்தில் நுழைந்ததையும் மறுப்பதற்கில்லை. இஸ்ரேல் யார்?

அரேபிய நிலப்பரப்பில் அமெரிக்காவின் ஏவுகணை தளங்களை அமைத்துக் கொள்ள செயற்கையாக உருவாக்கப்பட்ட நாடே இஸ்ரேல். அமெரிக்காவிலிருந்து குண்டு போட்டால் வந்து சேராதல்லவா?

வெறும் 80 லட்சம் மக்கள் தொகையையும் ஜெருசலேத்தை தலைநகராகக் கொண்ட நாடு. ஹீப்ருவும் அரபியும் மொழிகள். தற்போதைய நிலவரப்படி யூதர்கள் 77%, முஸ்லிம்கள் 16%. மேற்கு ஆசியாவின் மத்தியதரைக் கடலின் கிழக்கில் அமைந்துள்ளது. வடக்கில் லெபனான், வட கிழக்கில் சிரியா, கிழக்கில் ஜோர்டான், தென் மேற்கில் எகிப்து ஆகிய நாடுகளே எல்லைகள்.

இஸ்ரேல் என்று பெயரிடப்படாத இந்நிலப்பகுதியை கிபி 7 ம் நூற்றாண்டில் பைசாண் டைன் பேரரசன் ஹிராகிளியஸ் ஆண்டான். அதன் பிறகு 636 ல் முஸ்லிம்கள் வசம் இப்பகுதி வந்தது. ஆறு நூற்றாண்டுகள் முஸ்லிம்கள் ஆண்டனர். 1516 முதல் 20 ம் நூற்றாண்டு வரை ஒட்டோமான் பேரரசுக்கு உட்பட்ட பகுதியாக இது இருந்தது.இக்காலங்களில் இங்கிருந்து வெளியேறிச் சென்ற யூதர்கள் 1881,1904,1919,1924,1930 ஆகிய காலங்களில் பாலஸ்தீனத்தில் வந்து குடியேறினர்.

இவர்களை இங்கு குடியேற்றுவதில் இங்கிலாந்து முனைப்போடு இருந்தது. 1922ல் 11% ஆக இருந்த யூதர்கள் எண்ணிக்கை 1945 ல் அதாவது இரண்டாம் உலகப் போருக்குப் பின்பு 33% மாக உயர்ந்தது. இதன் காரணமாக அராபியர்கள் 1936 முதல் 1939 வரை பெரும் கிளர்ச்சியில் ஈடுபட்டனர்.

புதிதாக உருவாக்கப்பட்ட ஐநா சபை பாலஸ்தீனத்தை இரண்டாகப் பிரித்து 1947 டிசம்பர் 1 ல் தீர்மானம் நிறைவேற்றியது. இதை இந்தியா உள்ளிட்ட பல நாடுகள் ஏற்கவில்லை. நேரு தனது கடுமையானக் கண்டனத்தை பதிவு செய்தார். ஆர்.எஸ். எஸ் இதை அப்போதே ஆதரித்தது.

ஜெருசலேத்தை ஐநாவால் நிர்வகிக்கப்படுகிற சர்வதேச நகரமாகவும் அறிவித்தது. 1948 மே 14 அன்று யூதர்கள் தங்கள் நாட்டிற்கு இஸ்ரேல் என்று பெயரிட்டு அறிவித்தனர். 1948 ல் அரபு-இஸ்ரேல் போர் தொடங்கியது. 1949 மே 11 ல் இஸ்ரேல் ஐநா சபை உறுப்பினராக இணைந்தது

யூதர்களின் தாக்குதலுக்குப் பயந்து 80% பாலஸ்தீன மக்கள் அகதிகளாக ஓடினர். ஆங்காங்கே கிடந்த யூதர்கள் இஸ்ரேலுக்குச் செல்ல ஊக்குவிக்கப்பட்டதால் 1948 ல் 8 லட்சமாக இருந்த யூதர்கள் 1958 ல் 20 லட்சமாகப் பெருகினர். எகிப்தின் நாசர் தலைமையிலான அராபிய தேசியவாதிகள் இஸ்ரேல் நாட்டை அங்கீகரிக்க மறுத்து போர் அறிவித்தனர்

1967 ல் ஆறு நாட்கள் நடந்த போரின் இறுதியில் இஸ்ரேல் வென்று, பாலஸ்தீனப் பகுதிகளான வெஸ்ட் பேங்க், சினாய்,கோலன், காஸா ஆகிய பகுதிகளைக் கைப்பற்றிக் கொண்டது. போரின் தோல்விக்குப் பிறகு 1967 ல் பாலஸ்தீன விடுதலை இயக்கம் ( பி எல் ஓ ) உருவானது. ஆயுதம் தாங்கிய போரில் இறங்கியது.

1977 ல் லிகுட் என்ற கட்சியைச் சேர்ந்த மெனகம் பிகின் இஸ்ரேல் பிரதமரானார். அதையொட்டி எகிப்து பிரதமர் அன்வர் சதாத் இஸ்ரேல் நாடாளுமன்றந்தில் பேசினார். அதுதான் ஒரு அரேபிய நாடு இஸ்ரேலை அங்கீகரித்த முதல் நிகழ்வு.

1987 முதல் பாலஸ்தீன விடுதலை இயக்கத்தின் எழுச்சி தொடர்ந்து நடைபெற்றது. 1993 ல் ஷிமன் பெரேசும் (இஸ்ரேல்)முகமது அப்பாஸ் ( பி எல் ஓ ) ஆஸ்லோ உடன்படிக்கையில் கையொப்பம் இட்டனர். அதன்படி வெஸ்ட் பேங்க்,காஸா பகுதிகளின் ஆளும் உரிமை பாலஸ்தீன தேசிய அமைப்பிற்கு கிடைத்தது.

ஆஸ்லோ ஒப்பந்தத்தை இஸ்ரேல் மீறியதைத் தொடர்ந்து போர்கள் நடைபெற்று வந்தது. இன்றளவும் பதட்டம் நீடித்துக் கொண்டே இருக்கிறது. யாசர் அராபத்தின் மறைவுக்குப் பிறகு ஹமாஸ் என்ற இயக்கம் போராட்டத்தை தொடர்ந்து நடத்தினாலும் தற்போது போர் நிறுத்தம் அறிவிக்கப்பட்டிருக்கிறது

தனது சொந்த நலனுக்காக மட்டுமே அமெரிக்க ஏகாதிபத்தியத்தால் செயற்கையாக உருவாக்கப்பட்டு லட்சக்கணக்கான பாலஸ்தீன மக்களை கொன்று அழித்த ஒரு நாட்டிற்கு இந்திய பாசிஸ்ட் மோடி பயணித்தார். இந்திய விடுதலை வரலாற்றில் இஸ்ரேல் சென்ற பிரதமர் மோடி மட்டுமே.

இது அமெரிக்காவின் காலைக் கழுவிக் குடிக்கும் ஆர் எஸ் எஸ் அஜெண்டாக்களில் ஒன்றே. உலகத்திற்கு கூட்டுச்சேராக் கொள்கையை உயர்த்திப்பிடித்த இந்தியா இன்று ஏகாதிபத்திய வெறியாட்டத்திற்கு வெண் சாமரம் வீசுகிறது

பாலஸ்தீனம் அரேபியர்களுக்கு சொந்தமான நாடு.16ம் நூற்றாண்டில் லட்சம் அரேபியர்களும்,5000 யூதர்களும் அங்கு வாழ்ந்ததாக அமெரிக்க என்சைக்லோப்பீடியா கூறுகிறது. பழங்கால வரலாறு ஒன்றைக்காட்டி ஒருநாட்டைப் பிடிக்கலாம் என்றால், செவ்விந்தியர்கள் கையில் அமெரிக்காவை ஒப்படைத்துவிட்டு வெள்ளையர்கள் வெளியேறவேண்டும்.

அமெரிக்காவின் அடாவடி அரசியலே 

மத்திய கிழக்கின் தொடர் பதற்றங்கள்.

சூர்யா சேவியர் 

03-10-24

- நன்றியுடன்....!