இந்தியா கூட்டணி சார்பில் மாபெரும் பேரணி....!

 எஸ்.ஐ.ஆர். மூலம் வாக்காளர் திருத்தப்பட்டியலில் முறைகேடு விவகாரம்:

தலைமை தேர்தல் ஆணையருக்கு எதிராக தீவிரம் அடையும் போராட்டங்கள் 

டெல்லியில் தடையை மீறி இந்தியா கூட்டணி சார்பில் மாபெரும் பேரணி

புதுடெல்லி, அக்.06- எஸ்.ஐ.ஆர். மூலம் வாக்காளர் திருத்தப்பட்டியலில் முறைகேடு நடைபெற்றதை எதிர்த்து இந்தியா கூட்டணி சார்பில் இன்று டெல்லியில் எதிர்க்கட்சிகள் சார்பில் மாபெரும் கண்டன பேரணி நடைபெற்றது. 

பல்வேறு மாநிலங்களில் நடைபெற்ற எஸ்.ஐ.ஆர். பணிகளின்போது, முறைகேடுகள் நடைபெற்று கோடிக்கணக்கான வாக்காளர்களின் பெயர்கள் நீக்கம் செய்யப்பட்டதாக குற்றச்சாட்டுகள் எழுந்தன. இதையடுத்து, கடந்த வாரம் டெல்லியில் நடைபெற்ற இந்தியா கூட்டணி தலைவர்களின் கூட்டத்தில், தேர்தல் ஆணையத்திற்கு எதிராக பல்வேறு கட்ட போராட்டங்கள் நடைபெறும் என அறிவிக்கப்பட்டது. அதன்படி, கடந்த 2ஆம் தேதி போராட்டங்கள் நடைபெற்று வருகின்றன.

டெல்லியில் எதிர்க்கட்சிகள் பேரணி :

இந்த போராட்டங்களின்படி டெல்லியில் இன்று இந்தியா கூட்டணி எதிர்க்கட்சி எம்.பி.க்கள் பங்கேற்ற பேரணி நடைபெற்றது. நாடாளுமன்ற வளாகத்தில் இருந்து காலை 11 மணிக்கு இந்த பேரணி தொடங்கப்பட்டது. அப்போது மக்களவை எதிர்க்கட்சித் தலைவர் ராகுல் காந்தி, மாநிலங்களவை எதிர்க்கட்சித் தலைவர் மல்லிகார்ஜுன கார்கே, வயநாடு காங்கிரஸ் எம்.பி. பிரியங்கா காந்தி, இந்திய கம்யூனிஸ்ட் கட்சி மூத்த தலைவர் ராஜா, சமாஜ்வாதி கட்சித் தலைவர் அகிலேஷ் யாதவ் மற்றும் திரிணாமுல் காங்கிரஸ் மம்தா பிரிவு எம்.பி.க்கள், சிவசேனா எம்.பி. சஞ்சய் தத்  உள்ளிட்டோர் பேரணியில் பங்கேற்று தேர்தல் ஆணையர் ஞானேஷ்குமாருக்கு எதிராக முழக்கங்களை எழுப்பினர். தலைமை தேர்தல் ஆணையர் உடனடியாக பதவி விலக வேண்டும் என்றும் பேரணியின்போது வலியுறுத்தப்பட்டது.  இந்த பேரணியில் இந்திய யூனியன் முஸ்லிம் லீக் எம்.பி.க்கள் இ.டி.முஹம்மது பஷீர், அப்துல் சமத் ஸமதானி உள்ளிட்ட 140 எதிர்க்கட்சி எம்.பி.க்கள் பங்கேற்றார்கள் என்று தகவல் வெளியாகியுள்ளது. இந்தியா கூட்டணி எம்.பி.க்கள் தேர்தல் ஆணைய அலுவலகத்தை நோக்கிப் பேரணி நடத்தவுள்ளதால், புது தில்லி மாவட்டம் முழுவதும் பாதுகாப்பு பலப்படுத்தப்பட்டுள்ளது.

பலத்த பாதுகாப்பு :

நாடாளுமன்றத்தின் மகர துவார் பகுதியிலிருந்து தேர்தல் ஆணைய அலுவலகம் வரையிலான பாதையில், உள்ளூர் காவல்துறையுடன் இணைந்து ஐந்துக்கும் மேற்பட்ட துணை ராணுவப் படைப் பிரிவினர் பாதுகாப்புப் பணியில் ஈடுபடுத்தப்பட்டுள்ளனர். தேர்தல் ஆணையத்தின் பிரதான நுழைவாயிலுக்கு வெளியேயும், ஜந்தர் மந்தர் பகுதியையும் சுற்றி பல அடுக்கு தடுப்புகள் அமைக்கப்பட்டுள்ளன. மாவட்டத்தில் பிரிவு 163-ன் கீழ் தடை உத்தரவுகள் அமலில் இருப்பதாகவும், மக்கள் கூட்டமாகச் சேர அனுமதி இல்லை என்றும் காவல்துறை தெரிவித்துள்ளது.

முக்கிய முடிவு :

அக்டோபர் 1 அன்று,  இந்தியா  கூட்டணி ஒரு கூட்டுச் செயல் திட்டத்தை அறிவித்தது; இதில் நாடு தழுவிய போராட்டங்கள், எதிர்க்கட்சி எம்.பி.க்கள் தேர்தல் ஆணையத் தலைமையகத்திற்கு மேற்கொள்ளும் பேரணி மற்றும் நவம்பர் 1 அன்று டெல்லியில் நடைபெறவுள்ள பிரம்மாண்ட பேரணி ஆகியவை அடங்கும். டெல்லியில் நடைபெற்ற மூன்றரை மணி நேரக் கூட்டத்தில் இந்த முடிவுகள் எடுக்கப்பட்டன; இக்கூட்டத்தில் 19 கட்சிகளின் தலைவர்கள் மற்றும் சுயேச்சை எம்.பி. கபில் சிபல் ஆகியோர் பங்கேற்றனர் என்பது குறிப்பிடத்தக்கது. 

=============================