ஈரான், இஸ்ரேல், அமெரிக்கா இடையேயான போர் பதற்றம்:
ஈரானுக்கு எதிராக அணு ஆயுதங்களைப் பயன்படுத்தும் திட்டம் எதுவும் இல்லை
தடைப்படைகள் அனுப்புவதும் சாத்தியமில்லை என
அமெரிக்க அதிபர் டொனால்ட் டிரம்ப் அறிவிப்பு
வாஷிங்டன், அக்.16-ஈரான்-அமெரிக்கா இடையே மீண்டும் போர் பதற்றம் அதிகரித்துவரும் நிலையில், ஈரானுக்கு எதிராக அணு ஆயுதங்களைப் பயன்படுத்தும் திட்டம் தங்களுக்கு இல்லை என்று அமெரிக்க அதிபர் டொனால்ட் டிரம்ப் தெரிவித்துள்ளார்.
இந்தாண்டு பிப்ரவரி மாத இறுதியில் போர் தொடங்கியதில் இருந்து, இஸ்ரேல் மற்றும் வளைகுடா நாடுகளில் உள்ள அமெரிக்க ராணுவத் தளங்களை குறிவைத்து ஈரான் கடுமையாக தாக்கி வருகிறது. இதனால், மேற்காசியாவில் போர் பதற்றம் மீண்டும் அதிகரித்து வருகிறது. அண்மையில் இஸ்ரேலை குறிவைத்து ஈரான் நடத்திய கடும் தாக்குதலில் பெருத்த சேதம் ஏற்பட்டதாக தகவல்கள் தெரிவிக்கின்றன.
டொனால்ட் டிரம்ப் முடிவு :
இத்தகைய சூழ்நிலையில், ஈரானுக்கு தரைப்படைகளை அனுப்பப்படுவது சாத்தியமில்லை என்று அமெரிக்க அதிபர் டொனால்ட் டிரம்ப் தெரிவித்துள்ளார். மேலும், ஈரானுக்கு எதிராக அணு ஆயுதங்களைப் பயன்படுத்த மாட்டேன் என்றும் அமெரிக்க அதிபர் கூறியுள்ளார். இதன்மூலம் ஈரானின் வலிமை அமெரிக்கா உணர்ந்து இருக்கிறது என்றும் வளைகுடா நாடுகளில் உள்ள அமெரிக்க ராணுவத் தளங்கள் மீது ஈரான் நடத்திய, தொடர்ந்து நடத்திவரும் ஏவுகணை தாக்குதல்கள் மூலம் அமெரிக்காவிற்கு பெரும் நஷ்டம் ஏற்பட்டு இருப்பதாகவும் போர் ஆய்வு வல்லுநர்கள் தெரிவித்துள்ளனர். இதன் காரணமாகவே அமெரிக்க அதிபர் தற்போது இந்த முடிவை எடுத்து இருப்பதாக அவர்கள் கருத்து கூறியுள்ளனர்.
இதனிடையே, சவூதி அரேபியாவின் கிழக்கு மாகாணத்தை நோக்கி ஏவப்பட்ட ஆளில்லா விமானத்தை கூட்டணிப் படைகள் இடைமறித்து அழித்ததாக சவுதி தலைமையிலான கூட்டணி தெரிவித்துள்ளது. மேலும் அமெரிக்க-இஸ்ரேல் குண்டுவீச்சுகளில் குறைந்தது 78 ஆம்புலன்ஸ்கள் அழிக்கப்பட்டன என ஈரானின் சுகாதார அமைச்சர் முகமது ரெசா ஜஃபர்கண்டி தெரிவித்துள்ளார். சேதமடைந்த ஆம்புலன்ஸ்களுக்குப் பதிலாக புதியவற்றை வாங்குவதும், பழைய ஆம்புலன்ஸ்களைப் புதுப்பிப்பதும் தற்போதைய சூழ்நிலையில் சுகாதார அமைப்புக்கு மிகவும் அவசியமானவை என்றும் சுகாதாரத்துறை அமைச்சர் கூறியுள்ளார்.
- சிறப்புச் செய்தியாளர் : எஸ்.ஏ.அப்துல் அஜீஸ்
=====================
No comments:
Post a Comment