‘வாணியம்பாடி வரலாற்றின் மிகப்பெரிய துயரம்:
1903-ஆம் ஆண்டு பெருவெள்ளம்’
வாணியம்பாடியில் நடந்த நூல் வெளியீட்டு விழா
வாணியம்பாடி, நவ.13-திருப்பத்தூர் மாவட்டம் வாணியம்பாடியின் வரலாற்றில் மிகப்பெரிய துயரங்களில் ஒன்றாகக் கருதப்படும் 1903-ஆம் ஆண்டு பாலாற்று வெள்ளம் குறித்த ஆவண நூலான 'வாணியம்பாடி வரலாற்றின் மிகப்பெரிய துயரம்: 1903-ஆம் ஆண்டு பெருவெள்ளம்’ என்ற நூலின் வெளியிட்டு விழா ‘அஞ்சுமன்-ஏ-குத்தாமூல் இஸ்லாம்’ நூலக வளாகத்தில் நடைபெற்றது. இந்திய யூனியன் முஸ்லிம் லீக் மூத்த தலைவரும் சமூக ஆர்வலருமான நரி முஹம்மது நயீம் நூலை வெளியிட, முதல் பிரதியை அப்துர் ரவூஃப் காலித் பெற்றுக்கொண்டார்.
வரலாற்றில் இடம்பெற்ற சம்பவம் :
வாணியம்பாடியின் வரலாற்றில் இடம்பெற்ற இந்த பெருவெள்ளம் குறித்த நூல் உருவாக்கப்பட்டு, அஞ்சுமன்-ஏ-குத்தாமூல் இஸ்லாம் அமைப்பின் சார்பில் 11.11.2026 புதன்கிழமையன்று ஏற்பாடு செய்யப்பட்ட நிகழ்ச்சியில் வெளியிடப்பட்டது. இந்த நிகழ்விற்கு அமைப்பின் தலைவர் டி.எம். அப்துர் ரவூஃப் காலித் தலைமை தாங்கினார். பொதுச் செயலாளர் ஏ. ஷகீல் அகமது நிகழ்வை ஒருங்கிணைக்க, அப்துல் ஹலீம் அனைவரையும் வரவேற்றார்.
நிகழ்ச்சியில், வாணியம்பாடி இஸ்லாமியக் கல்லூரிப் பேராசிரியர் அபுல் ஃபசல், வரலாற்றாய்வாளரும் சமூகச் செயல்பாட்டாளருமான கொல்லு நதீம், ‘குழந்தைப் பாதுகாப்பு இயக்கம்’ பிரதிநிதி முத்தமிழ், எழுத்தாளர் குலசேகரன் மற்றும் சமூகச் செயல்பாட்டாளர் கஜேந்திரன் ஆகியோர் கலந்துகொண்டு வாழ்த்துரை வழங்கினர். இந்திய யூனியன் முஸ்லிம் லீக் வாணியம்பாடி நகரத் தலைவர் நரி முஹம்மது நயீம் சிறப்பு அழைப்பாளராகக் கலந்துகொண்டு சிறப்புரையாற்றினார்.
வரலாற்று ஆவண நூல் வெளியீடு :
எஹ்சான் அகமது எழுதிய, ‘வாணியம்பாடி வரலாற்றின் மிகப்பெரிய துயரம்: 1903-ஆம் ஆண்டு பெருவெள்ளம்’ என்ற இந்த நூலை, சமூக ஆர்வலர் முஹம்மது நயீம் வெளியிட, முதல் பிரதியை அப்துர் ரவூஃப் காலித் பெற்றுக்கொண்டார்.
நிகழ்ச்சியில் உரையாற்றிய நூலாசிரியர் எஹ்சான் அகமது, 1903-ஆம் ஆண்டு பாலாற்றில் ஏற்பட்ட வெள்ளம் குறித்தும், இந்த நூலை உருவாக்குவதற்குப் பின்னால் இருந்த வரலாற்று ஆய்வுகள் மற்றும் ஆவணங்கள் குறித்தும் விளக்கினார்.
அப்துல் ஹலீம் நிகழ்ச்சியைத் தொகுத்து வழங்கியதுடன், நன்றியுரையும் ஆற்றினார். இந்த சிறப்புமிகு நூல் வெளியீட்டு விழாவில் திருப்பத்தூர் மாவட்டத்தில் இருந்து ஏராளமான ஆர்வலர்கள் கலந்துகொண்டு சிறப்பித்தது குறிப்பிடத்தக்கது.
- சிறப்புச் செய்தியாளர் : எஸ்.ஏ.அப்துல் அஜீஸ்
No comments:
Post a Comment