உர்தூ ஆசிரியர் பயிற்சி மையம் - அமைச்சர் விஸ்வநாதன் அறிவிப்பு....!

 தமிழ்நாட்டில் உர்தூ ஆசிரியர் பயிற்சி மையம்  

அமைக்க நடவடிக்கை எடுக்கப்படும்

உயர்கல்வித்துறை அமைச்சர் விஸ்வநாதன் அறிவிப்பு 

சென்னை, நவ.12- தமிழ்நாட்டில் வாழும் சிறுபான்மையின மக்களின் கோரிக்கையை ஏற்று உர்தூ ஆசிரியர் பயிற்சி மையம் அமைக்க தேவையான நடவடிக்கைகள் மேற்கொள்ளப்படும் என மாநில உயர்கல்வித்துறை அமைச்சர் விஸ்வநாதன் தெரிவித்துள்ளார்.

சென்னையில் 11.11.2026 புதன்கிழமையன்று நடைபெற்ற தேசிய கல்வி தினம் மற்றும் உர்தூ தின விழாவில் அவர் சிறப்பு விருந்தினராக கலந்துகொண்டார். பின்னர் செய்தியாளர்களின் பேசிய அமைச்சர் விஸ்வநாதன், தமிழ்நாடு மாநில உர்தூ அகாடமி மிகச் சிறந்த முறையில் பணியாற்றி வருவதாக பாராட்டு தெரிவித்தார். அமைச்சரின் பேட்டியின் முழு விவரம் வருமாறு :

சிறப்பான விழாவிற்கு ஏற்பாடு :

தமிழ்நாடு உயர் கல்வித் துறையின் கீழ் இயங்கும் உர்தூ அகாடமி சார்பில் உர்தூ நாள் மற்றும் மௌலானா அபுல் கலாம் ஆசாத் அவர்களின் பிறந்தநாளை முன்னிட்டு நடைபெறும் தேசிய கல்வித் தினம் மிகச் சிறந்த முறையில் நடைபெற்றது மகிழ்ச்சி அளிக்கிறது. இந்த விழாவில் உர்தூ மொழிப்  பள்ளிகளில் 30 ஆண்டுகளுக்கு மேல் பணியாற்றிய 23 ஆசிரியர்களுக்குப் பாராட்டுச் சான்றிதழ்களும் நினைவுப் பரிசுகளும் வழங்கப்பட்டன.

உர்தூ இலக்கியத்திற்குச் சேவை செய்த கவிஞர்கள், எழுத்தாளர்களுக்கு பாராட்டி,  நினைவுப் பரிசுகள் வழங்கப்பட்டு அவர்களும் கௌரவிக்கப்பட்டனர். மேலும் கட்டுரை, பேச்சு மற்றும் கவிதை போன்ற பல்வேறு போட்டிகளில் வெற்றி பெற்ற 33 பள்ளிகள் மற்றும் 19 கல்லூரிகளைச் சேர்ந்த 627 மாணவர்களுக்கு நினைவுப் பரிசுகளும் பாராட்டுச் சான்றிதழ்களும் வழங்கப்பட்டன.  அந்த வகையில் தமிழ்நாடு மாநில உர்தூ அகாடமி மிகச் சிறந்த முறையில் பணியாற்றி இருப்பதற்கு என்னுடைய பாராட்டுதல்களை தெரிவித்துக் கொள்கிறேன். 

உர்தூ முஸ்லிம்களின் கோரிக்கைகள் :

தமிழ்நாட்டில் உர்தூ மொழி பேசும் மக்கள் 30 லட்சம் பேர் வாழ்ந்து வருகிறார்கள்.  அந்த மக்களுக்கு தமிழக அரசு பாதுகாப்பு அரணாக இருக்கும். மேலும், தமிழ்நாடு அரசும் உயர் கல்வித் துறையும் அவர்களுக்குப் பாதுகாப்புக் கவசமாக உறுதுணையாக நிற்கும். உர்தூ மொழி பேசும் மக்கள் ஒரு கோரிக்கையை வைத்து இருக்கிறார்கள். தமிழ்நாட்டில் உர்தூ ஆசிரியர் பயிற்சி மையம் ஒன்றை அமைக்க வேண்டும் என்பது அந்த சமூகத்தின் கோரிக்கையாக இருந்து வருகிறது.  உர்தூ ஆசிரியர் பயிற்சி மையம் ஒன்றை அமைக்க வேண்டும் என்ற அவர்களின் கோரிக்கை குறித்து  மாண்புமிகு முதலமைச்சருடன் பேசி சாத்தியக்கூறுகளை ஆராய்ந்து அந்த மையம் அமைக்கப்படுவதை உறுதி செய்வோம்.

இவ்வாறு உயர்கல்வித்துறை அமைச்சர் விஸ்வநாதன் தெரிவித்தார். இந்த செய்தியாளர்கள் சந்திப்பின்போது இ.யூ.முஸ்லிம் லீக் தமிழ்நாடு மாநில பொதுச் செயலாளர் கே.ஏ.எம்.முஹம்மது அபூபக்கர், துணைத் தலைவர் கே.நவாஸ் கனி எம்.பி., தமிழ்நாடு மாநில உர்தூ அகாடமி துணைத் தலைவர் முகமது நயீமுர் ரஹ்மான் ஆகியோர் உடனிருந்தனர். 

- சிறப்புச் செய்தியாளர் : எஸ்.ஏ.அப்துல் அஜீஸ்

===========================