இ.யூ.முஸ்லிம் லீக் வலியுறுத்தல்...!

 தமிழ்நாட்டில் உர்தூ ஆசிரியர் பயிற்சி மையம் அமைக்க

 நடவடிக்கை எடுக்க வேண்டும்

இ.யூ.முஸ்லிம் லீக் மாநில பொதுச் செயலாளர் 

கே.ஏ.எம்.முஹம்மது அபூபக்கர் வலியுறுத்தல்

சென்னை, நவ.12- தமிழகத்தில் வாழும் உர்தூ மக்களின் உணர்வுகளுக்கு மதிப்பு அளித்து உர்தூ ஆசிரியர் பயிற்சி மையம் அமைக்க அரசு நடவடிக்கை எடுக்க வேண்டும் என்று இ.யூ.முஸ்லிம் லீக் மாநில பொதுச் செயலாளர் கே.ஏ.எம்.முஹம்மது அபூபக்கர் வலியுறுத்தியுள்ளார்.

சென்னையில் 11.11.2026 புதன்கிழமையன்று நடைபெற்ற தேசிய கல்வித் தினம் மற்றும் உர்தூ தின விழாவில் அவர் கலந்துகொண்டு உரையாற்றினார். அந்த உரையின் முழு விவரம் வருமாறு:

வெளிமாநில உர்தூ ஆசிரியர்கள் :

தமிழ்நாட்டில் உள்ள பள்ளி மற்றும் கல்லூரிகளில் உர்தூ மொழி ஆசிரியர்கள் போதிய அளவில் இல்லாத காரணத்தினால், கர்நாடகா, ஆந்திரா போன்ற அண்டை மாநிலங்களில் இருந்து வந்து தமிழ்நாட்டில் பணிபுரியும் சூழல் நிலவி வருகிறது. 

எனவே, உர்தூ மக்களின் உணர்வுகளுக்கு எப்போதுமே மதிப்பளித்துச் செயல்படும் மாண்புமிகு அமைச்சர் அவர்கள், தமிழ்நாட்டிலேயே ஒரு உர்தூ ஆசிரியர் பயிற்சி மையத்தை உருவாக்கத் தகுந்த நடவடிக்களையும் உதவியையும் செய்து தர வேண்டும்.

தேசிய ஒருமைப்பாடு மற்றும் மனித நேயம் :

நாம் அனைவரும் அனைத்து சூழ்நிலைகளிலும் ஒருவரையொருவர் புரிந்து கொண்டும், நல்லிணக்கத்தோடு இணைந்தும் வாழ வேண்டும். தேசிய ஒருமைப்பாட்டைப் பாதுகாக்கக் கூடியவர்களாக நாம் வாழ வேண்டும். இதயங்களை இணைந்தவர்களாக வாழ வேண்டும். பிரபல உர்தூக் கவிஞர் அக்பர் இலகாபாத்தி அவர்களின் ஒரு உர்தூ கவிதை இருக்கிறது. 

மனிதன் மனிதனுடன் இணைகிறான். மனிதன் மனிதனுடன் சந்திக்கிறான். ஆனால் மனம் யாருடன் இணைகிறது. என்ற அவரின் கவிதை வரிகளை நாம் அனைவரும் உள் வாங்கிக் கொள்ள வேண்டும்.  வெறும் மனிதர்கள் இணைவது மட்டும் போதாது. இதயங்களும் மதங்களும் இணைய வேண்டும் என்பதே இன்றைய சவாலாகவும் தேவையாகவும் உள்ளது.

இந்தியாவில் பல்வேறு மதங்களைச் சார்ந்தவர்கள் வாழ்ந்தாலும், மதங்கள் மற்றும் இதயங்கள் இணைந்து ஒற்றுமையையும் ஒருமைப்பாட்டையும் நிலைநாட்ட வேண்டும் என்பதே இந்த கூட்டத்தின் முக்கிய நோக்கமாக இருக்கிறது. அதை உணர்ந்து நாம் செயல்பட வேண்டும்.  உர்தூ  மொழியின் முன்னேற்றத்திற்காகத் தொடர்ந்து பாடுபட்டுப் பணியாற்றுவோம் என்ற உறுதிமொழி ஏற்றுக் கொள்வோம். 

இந்த விழாவை மிகவும் சிறப்பாகவும் நேர்த்தியாகவும் ஏற்பாடு செய்த அருமைச் சகோதரர் நஹீம் அவர்களுக்கும், அவரோடு இணைந்து பணியாற்றிய அனைத்து நல்உள்ளங்களுக்கும், மேலும் இந்த நிகழ்வில் கலந்துகொண்ட மாண்புமிகு அமைச்சர் அவர்களுக்கும் நெஞ்சார்ந்த நன்றிகள் தெரிவித்துக் கொள்கிறேன். 

இவ்வாறு கே.ஏ.எம்.முஹம்மது அபூபக்கர் உரையாற்றினார். 

- சிறப்புச் செய்தியாளர் : எஸ்.ஏ.அப்துல் அஜீஸ்

================