சவூதியில் ஒட்டக பாஸ்போர்ட்.....!

 " சவூதி அரேபியாவில் ஒட்டக பாஸ்போர்ட் அறிமுகம் "

உலக அளவில் பொதுவாக, ஒரு நாட்டில் இருந்து மற்றொரு நாட்டிற்குச் செல்லும்போது, பாஸ்போர்ட், விசா ஆகியவை கட்டாயம் இருக்க வேண்டும். பாஸ்போர்ட், விசா இல்லாமல் வெளிநாடுகளுக்கு யாரும் செல்ல முடியாது. பயணிக்கவும் முடியாது. அப்படி யாராவது செல்கிறார்கள் என்றால், அவர்கள் சட்ட விதிகளுக்கு மாறாக, முறைகேடாக செல்கிறார்கள் என்பது தான் உண்மையாகும். 

இப்படி, உலகம் முழுவதும் ஒரு நிலை இருப்பதால், தற்போது மக்களிடையே வெளிநாடு மோகம் காரணமாக, பாஸ்போர்ட் எடுக்கும் போக்கு அதிகரித்து வருகிறது. வெளிநாடுகளுக்குச் செல்கிறார்களோ இல்லையோ, நம்மில் பலர் பாஸ்போர்ட்டை கட்டாயம் எடுத்து வைத்துக் கொள்கிறோம். 

ஒட்டக பாஸ்போர்ட்டை அறிமுகம் :

இதுபோன்ற நிலையில், சவூதி அரேபியாவில் ஒட்டக பாஸ்போர்ட் அறிமுகம் செய்யப்பட்டுள்ளது. என்னது, ஒட்டகத்திற்கு பாஸ்போர்ட்டா என நீங்கள் வியப்பு அடையலாம். ஆச்சரியத்துடன்  வினா எழுப்பலாம். ஆனால், அது தான் உண்மையாகும். சவூதி அரேபியாவில்  ஒட்டகத் துறையை ஒழுங்குபடுத்தவும், டிஜிட்டல் மயமாக்கவும் அந்நாட்டு அரசு ஒட்டக பாஸ்போர்ட் திட்டத்தை அறிமுகப்படுத்தியுள்ளது. 

ஒட்டகத் துறையை ஒழுங்குபடுத்துதல், உரிமை மற்றும் அடையாளத்தை ஆவணப்படுத்துதல் மற்றும் சேவை திறன் மற்றும் சந்தை நம்பகத்தன்மையை மேம்படுத்துதல் ஆகியவற்றை நோக்கமாகக் கொண்ட ஒரு புதிய ஒழுங்குமுறை மற்றும் டிஜிட்டல் கருவியான ஒட்டக பாஸ்போர்ட் முயற்சியை சவுதி அரேபியா கடந்த 03.02.2026 செவ்வாய்க்கிழமை அன்று அறிமுகப்படுத்தியது.

இந்தத் திட்டத்தை சுற்றுச்சூழல், நீர் மற்றும் வேளாண்மை துணை அமைச்சர் மன்சூர் அல்-முஷைதி தொடங்கி வைத்தார்.  இந்த திட்டம், கால்நடை மற்றும் மீன்வளத் துறையின் வளர்ச்சிக்கான தேசிய திட்டத்தின் கீழ் அமைச்சகத்தின் முயற்சிகளின் ஒரு பகுதியாகும்.

முக்கிய அம்சங்கள் :

இந்த ஒட்டக பாஸ்போர்ட்டின் முக்கிய அம்சங்களை நாம் அறிந்துகொள்ள வேண்டும். அதன்படி, ஒட்டகத் தரவு, உரிமை, இனங்கள் மற்றும் சுகாதார பதிவுகளை ஆவணப்படுத்துவதன் மூலம் ஒட்டகத் துறைக்கான ஒழுங்குமுறை மற்றும் டிஜிட்டல் கட்டமைப்புகளை ஒன்றிணைக்க இந்த முயற்சி முயல்கிறது. மேலும், கால்நடை பதில், சந்தை வெளிப்படைத்தன்மை மற்றும் ஒழுங்குமுறை மேற்பார்வையை ஆதரிக்கும் அதிகாரப்பூர்வமாக அங்கீகரிக்கப்பட்ட குறிப்பை உருவாக்குகிறது.

சவூதி அரசின் கூற்றுப்படி, ஒட்டக பாஸ்போர்ட் ஒரு விரிவான அடையாள ஆவணமாக செயல்படுகிறது. இதில் மைக்ரோசிப் எண், பாஸ்போர்ட் எண், ஒட்டக பெயர், பிறந்த தேதி, இனம், பாலினம், நிறம், பிறந்த இடம், வழங்கப்பட்ட தேதி மற்றும் இடம், அத்துடன் துல்லியமான அடையாள சரிபார்ப்பை உறுதி செய்வதற்காக இரு தரப்பிலிருந்தும் விலங்கின் புகைப்படங்கள் உள்ளன.

                                                =====================

"ஒட்டகத் துறையை ஒழுங்குபடுத்துதல், உரிமை மற்றும் அடையாளத்தை ஆவணப்படுத்துதல், சேவை திறன், சந்தை நம்பகத்தன்மையை மேம்படுத்துதல் ஆகியவற்றை நோக்கமாகக் கொண்ட ஒரு புதிய ஒழுங்குமுறை மற்றும் டிஜிட்டல் கருவியான ஒட்டக பாஸ்போர்ட் முயற்சியை சவுதி அரேபியா அறிமுகப்படுத்தியுள்ளது"

                                            =====================

பாஸ்போர்ட்டில் கால்நடை தடுப்பூசிகளை விவரிக்கும் ஒரு பிரத்யேக தடுப்பூசி பதிவேடும் அடங்கும். மேலும் கலந்துகொள்ளும் கால்நடை மருத்துவரின் பெயர், கையொப்பம் மற்றும் முத்திரையுடன் சான்றளிக்கப்பட்டது.

உரிமையாளர்களின் உரிமைகளைப் பாதுகாத்தல் :

போக்குவரத்து, உரிமை பரிமாற்றங்கள் மற்றும் அதிகாரப்பூர்வ ஆவணங்களை ஒழுங்கமைத்தல், உரிமையாளர்களின் உரிமைகளைப் பாதுகாத்தல் மற்றும் சந்தை பங்கேற்பாளர்களிடையே நம்பிக்கையை அதிகரிப்பதன் மூலம் விற்பனை மற்றும் வர்த்தக நடவடிக்கைகளை இந்த ஒட்டக பாஸ்போர்ட் திட்ட முயற்சி ஒழுங்குபடுத்தும் என்று சவூதி அரேபிய அரசு தெரிவித்துள்ளது.

உள்ளூர் மற்றும் சர்வதேச ஏலங்களில் வெளிப்படைத்தன்மையை அதிகரிக்கும் அதேவேளையில், சுகாதார நிலை, இனம் மற்றும் பரம்பரை போன்ற துல்லியமான தரவுகளின் அடிப்படையில் விலை நிர்ணயம் செய்வதன் மூலம் ஒட்டகங்களின் சந்தை மதிப்பை மேம்படுத்தவும் இந்த திட்டம் பலன் அளிக்கும் என எதிர்பார்க்கப்படுகிறது.

ஒட்டக எண்ணிக்கை குறித்த தரவு :

கூடுதலாக, வயது, பாலினம், இனம் மற்றும் நிறம் ஆகியவற்றின் அடிப்படையில் ஒட்டக எண்ணிக்கை குறித்த துல்லியமான தரவை வழங்குவதன் மூலம் மூலோபாய திட்டமிடலை இந்த திட்டம் ஆதரிக்கும். தேசிய கால்நடை விநியோகத்தை வழிநடத்தவும், மரபணு செயல்திறன் பகுப்பாய்வு மற்றும் உள்ளூர் இன மேம்பாட்டுத் திட்டங்கள் மூலம் இனப்பெருக்க செயல்திறனை மேம்படுத்தவும் உதவும் என்று சவூதி அரேபிய அரசு தெரிவித்துள்ளது. 

உங்களிடம் ஒட்டகம் இருந்தால், நீங்களும் ஒட்டக பாஸ்போர்ட் குறித்த தகவல்களை அறிந்துகொள்வது நல்லது. திடீரென சவூதி அரேபியாவிற்கு ஒட்டகம் மூலம் செல்ல நீங்கள் விரும்பினால், ஆசைப்பட்டால், உங்களுக்கு மட்டுமல்லாமல், உங்கள் ஒட்டகத்திற்கு பாஸ்போர்ட் கண்டிப்பாக இருக்க வேண்டும். என்ன, நான் சொல்வது சரி தானே!

- எஸ்.ஏ.அப்துல் அஜீஸ்