எஸ்.ஐ.ஆர். விதிகளின் குளறுபடிகளால், அனாதை இல்லங்கள், தொண்டு இல்லங்களில் வளர்க்கப்பட்டோர் பெரிதும் பாதிப்பு....!
பெற்றோர் விவரங்களைப் பதிவு செய்ய சிரமத்திற்கு ஆளாகும் நிலை...!!
நாடு முழுவதும் தேர்தல் ஆணையம் மேற்கொண்டுள்ள எஸ்.ஐ.ஆர். பணிகள் தற்போது தமிழகம் உள்ளிட்ட 12 மாநிலங்களில் முழுவீச்சில் நடைபெற்று வருகின்றன. இத்தயை சூழ்நிலையில், அரசு நடத்தும் அனாதை இல்லங்கள் மற்றும் தொண்டு இல்லங்களில் வளர்க்கப்பட்டவர்கள், பெற்றோர் விவரங்களைப் பதிவு செய்வதற்கான எஸ்ஐஆர் விதிகளால் சிரமப்படுகின்றனர் என்ற குற்றச்சாட்டு எழுந்துள்ளது.
பெற்றோருக்கான பத்தியில் அனாதை இல்லத்தின் பெயரைப் பதிவு செய்ய வேண்டும் என்று இந்தியத் தேர்தல் ஆணைய அதிகாரிகள் கூறியுள்ளனர். ஆனால், குறிப்பிட்ட வழிகாட்டுதல்கள் இல்லாததால் களத்தில் குழப்பம் நிலவுகிறது. வம்சாவளிக்கான ஆதாரம் இல்லாததால், தேவையான ஆவணங்களை அரசே வழங்க வேண்டும் என்ற கோரிக்கை எழுந்துள்ளது.
சிக்கலில் முகமது பலாஷ் ஷேக் :
மேற்கு வங்கத்தைச் சேர்ந்த முகமது பலாஷ் ஷேக், தற்போது எஸ்.ஐ.ஆர். விதிகளால் ஒரு சிக்கலில் சிக்கி இருக்கிறார். ரயில் நிலையத்திலிருந்து மீட்கப்பட்டு, மேற்கு வங்கத்தின் தெற்கு தினாஜ்பூர் மாவட்டத்தில் உள்ள அரசுக்குச் சொந்தமான சுபயான் சிறுவர் இல்லத்தில் வளர்க்கப்பட்ட அவர், 18 வயது ஆனதும் அந்த இல்லத்தை விட்டு வெளியேற வேண்டியிருந்தது. தனது சொந்த அடையாளத்தை நிரூபிக்கும் வாக்காளர் அடையாள அட்டை மற்றும் ஆதார் அட்டை அவரிடம் உள்ளது. ஆனால், மேற்கு வங்கம் மற்றும் 11 பிற மாநிலங்கள் மற்றும் யூனியன் பிரதேசங்களில் தற்போது நடைபெற்று வரும் சிறப்புத் தீவிர வாக்காளர் பட்டியல் திருத்தத்திற்கு (எஸ்.ஐ.ஆர்.) தேவைப்படும் தனது பெற்றோருக்கான எந்த ஆதாரத்தையும் அவரால் வழங்க முடியவில்லை.
முன்னதாக சிறப்புத் தீவிரத் திருத்தம் (எஸ்.ஐ.ஆர்.) மேற்கொள்ளப்பட்ட 2002 ஆம் ஆண்டு வாக்காளர் பட்டியலில் தனது பெற்றோரில் யாரையும் இணைக்க முடியாததால், ஷேக் 'இணைக்கப்படாதவர்' என்ற பிரிவில் இருந்து வருகிறார். மேலும் தற்போது தேர்தல் அதிகாரிகளிடமிருந்து விசாரணைக்கான அறிவிப்பைப் பெற்றுள்ளார். சிறப்புத் தீவிரத் திருத்தத்தில் (எஸ்.ஐ.ஆர்.) உரிமை கோர தனக்கு எந்த வம்சாவளியும் இல்லாததால், தேவையான ஆவணங்களை வழங்குவது மாநில அரசின் பொறுப்பு என்றும், அவ்வாறு செய்யத் தவறினால் தனக்கு வாக்குரிமை மறுக்கப்படலாம் என்றும் முகமது பலாஷ் ஷேக் வேதனை தெரிவிக்கிறார்.
எஸ்.ஐ.ஆர். விதிகளில் குளறுபடிகள் :
எஸ்.ஐ.ஆர். விதிகளின்படி, 1987 மற்றும் 2004-க்கு இடையில் பிறந்தவர்கள் தங்களின் சொந்த ஆவணங்களையும், தங்கள் பெற்றோரில் ஒருவரின் ஆவணங்களையும் சமர்ப்பிக்க வேண்டும். அதேசமயம், 2004-க்குப் பிறகு பிறந்தவர்கள், அவர்கள் 'இணைக்கப்படாதவர்களாக' இருந்தால், தங்களின் சொந்த ஆவணங்களையும், தங்கள் பெற்றோர் இருவரின் ஆவணங்களையும் காட்ட வேண்டும்.
யாராவது படிவம் 6-ஐப் பூர்த்தி செய்து புதிய வாக்காளராகப் பதிவு செய்ய விரும்பினாலும், 2002 ஆம் ஆண்டுப் பட்டியலில் பெற்றோரை இணைப்பது தொடர்பாக ஒரு தனி உறுதிமொழிப் பத்திரத்தில் கையெழுத்திட வேண்டும்.
பிரச்சினையின் முக்கியத்துவம் :
மாநிலத்தால் நடத்தப்படும் அனாதை இல்லங்கள் மற்றும் தொண்டு இல்லங்களில் வளர்க்கப்பட்ட ஷேக் போன்ற பலரும், விதிகளின்படி தங்கள் பெற்றோரின் பெயரை இணைக்க வழியின்றி, இதே இக்கட்டான சூழ்நிலையை எதிர்கொண்டுள்ளனர். மகளிர் மற்றும் குழந்தைகள் மேம்பாட்டு அமைச்சகத்தின் 2016 ஆம் ஆண்டு ஆய்வின்படி, இந்தியாவில் தோராயமாக 9 ஆயிரத்து 500 குழந்தை பராமரிப்பு நிறுவனங்கள் (அரசு நடத்தும் இல்லங்கள் மற்றும் தன்னார்வ தொண்டு நிறுவனங்களால் ஆதரிக்கப்படும் இல்லங்கள் உட்பட) உள்ளன. அவை எந்த நேரத்திலும் சுமார் 3 லட்சத்து 7 ஆயிரம் குழந்தைகளைத் தங்கவைத்துள்ளன என்று தெரியவந்துள்ளது. ஒவ்வொரு ஆண்டும், ஆயிரக்கணக்கான "பராமரிப்பு இல்லங்களில் வளர்ந்தவர்கள்" 18 வயதை அடைந்து இந்த இல்லங்களிலிருந்து வெளியேறுகின்றனர்.
======================
" ரயில் நிலையத்திலிருந்து மீட்கப்பட்டு, மேற்கு வங்கத்தின் தெற்கு தினஜ்பூர் மாவட்டத்தில் உள்ள அரசுக்குச் சொந்தமான சுபயான் சிறுவர் இல்லத்தில்வளர்க்கப்பட்ட முகமது பலாஷ் ஷேக், ஒரு இக்கட்டான சூழ்நிலைக்குத் தள்ளப்பட்டுள்ளார். தனது அடையாளத்தை நிரூபிக்கும் வாக்காளர் அடையாள அட்டை, ஆதார் அட்டை அவரிடம் உள்ளது. ஆனால் எஸ்.ஐ.ஆருக்கு தேவைப்படும் தனது பெற்றோருக்கான எந்த ஆதாரத்தையும் அவரால் வழங்க முடியவில்லை"
======================
நிறுவனங்களில் வளர்க்கப்பட்ட அனாதை குழந்தையின் விஷயத்தில், பெற்றோரின் பெயர்களுக்கான பத்தியில் அனாதை இல்லத்தின் பெயர் உள்ளிடப்படும் என்று தேர்தல் ஆணைய அதிகாரிகள் முன்னதாகக் கூறியுள்ளனர். இருப்பினும், இது தொடர்பாக குறிப்பிட்ட வழிகாட்டுதல்கள் எதுவும் இல்லாததால், களத்தில் நடப்பது மிகவும் வித்தியாசமாக உள்ளது.
சமூக ஆர்வலர்கள் வேண்டுகோள் :
இந்திய சிறார் நீதிச் சட்டத்தின் பிரிவு 53-இன் கீழ், குழந்தை பராமரிப்பு நிறுவனங்கள் பிறப்புப் பதிவு மற்றும் தேவைப்படும் இடங்களில் குழந்தைகளின் அடையாளச் சான்றுகளைப் பெறுவது தொடர்பாக அவர்களுக்கு உதவ வேண்டும். இருப்பினும், பல சமயங்களில், அத்தகைய குழந்தைகள் 18 வயதை அடையும்போது தங்களைத் தாங்களே கவனித்துக் கொள்ளும்படி விட்டுவிடப்படுகிறார்கள்.
சிறுவயதில் அஜ்மீரில் காவல்துறையினரால் மீட்கப்பட்ட பரத் ஜாட்டியாவின் வழக்கைக் கொஞ்சம் கவனிக்க வேண்டும். பெற்றோர்களால் கைவிடப்பட்ட அவர், பல்வேறு தங்குமிடங்களில் வளர்க்கப்பட்டு, ஜெய்ப்பூரில் உள்ள மனித உரிமைகளுக்கான வள நிறுவனத்தில் 12 ஆம் வகுப்பை முடித்தார். ஜாட்டியாவிடம் ஆதார் மற்றும் 10 மற்றும் 12 ஆம் வகுப்பு சான்றிதழ்கள் இருந்தாலும், வாக்காளராகப் பதிவு செய்வதற்கான படிவம் 6-ஐ அவரால் சமர்ப்பிக்க முடியவில்லை. ஏனெனில், கடைசியாக வாக்காளர் பட்டியல் திருத்தம் நடத்தப்பட்டபோது, 2002-03 பட்டியலில் இருந்த தனது பெற்றோரின் பெயர்கள் குறித்த பிரகடனத்துடன் ஒரு தனிப் படிவத்தை அவர் நிரப்ப வேண்டியுள்ளது.
புதிய வாக்காளர்களாகப் பதிவு செய்ய விரும்பும் அனாதைகள் தொடர்பான தேர்தல் ஆணையத்தின் வழக்கமான விதிமுறை, “ஒரு அனாதை குழந்தைப்பருவத்திலிருந்தே ஒரு அனாதை இல்லத்தில் வளர்க்கப்பட்டு, தனது பெற்றோரில் ஒருவரின் பெயரைக் கூடக் கூற முடியாத நிலையில் இருந்தால், அவனது பெயர் வாக்காளர் பட்டியலில் சேர்க்கப்படும். மேலும், தந்தை, தாய், கணவர் பெயருக்காக ஒதுக்கப்பட்ட பத்தியில், அந்த அனாதை இல்லத்தின் பெயர் குறிப்பிடப்பட வேண்டும்” என்று கூறுகிறது.
இருப்பினும், எஸ்.ஐ.ஆர் திட்டத்தின் கீழ், படிவம் 6-ஐப் பயன்படுத்தி புதிய வாக்காளர்கள் பதிவு செய்யப்படும்போது கூட, பெற்றோரின் பெயர்களை 2002 ஆம் ஆண்டுப் பட்டியலுடன் பொருத்துவது தொடர்பாக ஒரு தனி உறுதிமொழிப் படிவத்தில் கையெழுத்திட வேண்டும். இத்தகைய சூழ்நிலையில், “பெற்றோர்களால் கைவிடப்பட்டு, பல்வேறு தங்குமிடங்களில் வளர்க்கப்பட்ட இந்த மக்கள் இந்திய நாட்டில்தான் பிறந்தவர்கள். அரசாங்கம் அவர்களைத் தனது குடிமக்களாகக் கருத வேண்டும்” என்று மனித உரிமைகளுக்கான நிறுவன (ஆர்.ஐ.எச்.ஆர்.)அமைப்பின் சமூக ஆர்வலார் விஜய் கோயல் வேண்டுகோள் விடுத்துள்ளார்.
- நன்றி: தி இந்து ஆங்கில நாளிதழ்
- தமிழில்: சிறப்புச் செய்தியாளர் எஸ்.ஏ.அப்துல் அஜீஸ்
No comments:
Post a Comment