உலகின் மிகப்பெரிய கையெழுத்துப் பிரதியான திருக்குர்ஆன்...!

 " உலகின் மிகப்பெரிய கையெழுத்துப் பிரதியான திருக்குர்ஆன் "

 - மக்கா அருங்காட்சியகத்தில் கண்டு மக்கள் வியப்பு -

புனித நகரமான மக்காவில் உள்ள ஹிரா கலாச்சார மாவட்டத்தில் அமைந்துள்ள புனித குர்ஆன் அருங்காட்சியகம் உலக முஸ்லிம்கள் மத்தியில் மிகவும் புகழ்பெற்ற ஒன்றாகும். இந்த அருங்காட்சியகத்தில், உலகின் மிகப்பெரிய கையெழுத்துப் பிரதியாக அங்கீகரிக்கப்பட்ட, திருக்குர்ஆனின் ஒரு பிரமாண்டமான கையெழுத்துப் பிரதி ஒன்று காட்சிக்கு வைக்கப்பட்டு, பார்வையாளர்களின் கவனத்தை ஈர்த்து வருகிறது. .

அரிய சுவையான தகவல்கள் :

கி.பி. 16 ஆம் நூற்றாண்டைச் சேர்ந்த இந்த பிரமாண்டமான கையெழுத்துப் பிரதி, 312 சென்டிமீட்டர் நீளமும் 220 சென்டிமீட்டர் அகலமும் கொண்டது. அத்துடன், 700 பக்கங்களைக் கொண்டுள்ளது. உலகின் மிகப்பெரிய குர்ஆனை காட்சிப்படுத்தியதற்காக இந்த அருங்காட்சியகம், கின்னஸ் உலக சாதனைகள் புத்தகத்தில் இடம்பிடித்துள்ளது. இந்தக் கையெழுத்துப் பிரதி, 16 ஆம் நூற்றாண்டைச் சேர்ந்த ஒரு வரலாற்றுச் சிறப்புமிக்க குர்ஆனின் பெரிதாக்கப்பட்ட நகலாகும்.

                                                =====================

"உலகின் மிகப்பெரிய குர்ஆனை காட்சிப்படுத்தியதற்காக மக்காவில் உள்ள குர்ஆன் அருங்காட்சியகம், கின்னஸ் உலக சாதனைகள் புத்தகத்தில் இடம்பிடித்துள்ளது. இந்தக் கையெழுத்துப் பிரதி, 16 ஆம் நூற்றாண்டைச் சேர்ந்த ஒரு வரலாற்றுச் சிறப்புமிக்க குர்ஆனின் பெரிதாக்கப்பட்ட நகலாகும்"

                                                =====================

அசல் பிரதியின் அளவு 45 சென்டிமீட்டர் நீளமும் 30 சென்டிமீட்டர் அகலமும் கொண்டது. அதன் அத்தியாயங்கள் முக்கியமாக துலூத் எழுத்து வடிவத்தில் எழுதப்பட்டுள்ளன. அதேசமயம்,  சூரத்துல் ஃபாத்திஹா நஸ்க் எழுத்து வடிவத்தில் எழுதப்பட்டுள்ளது. இது அந்த காலத்தின் நுட்பமான கலைத் தேர்வுகள் மற்றும் எழுத்துக்கலையின் பன்முகத்தன்மையை பிரதிபலிக்கிறது.

தனித்துவமான எடுத்துக்காட்டு :

இந்த பிரமாண்டமான குர்ஆன், அரபு எழுத்துக்கலை, தங்க முலாம் பூசுதல் மற்றும் புத்தகக் கட்டுதல் ஆகியவற்றிற்கு ஒரு தனித்துவமான எடுத்துக்காட்டாகத் திகழ்கிறது. சிக்கலான அலங்காரங்கள், தொடக்கப் பக்கத்தில் சூரிய வடிவ உருவங்கள், மற்றும் உயர் மட்ட கலைத்திறனைப் பிரதிபலிக்கும் விரிவாக வடிவமைக்கப்பட்ட முகப்பு மற்றும் தலைப்புப் பக்கங்கள் மூலம் இஸ்லாமிய கலையை இது வெளிப்படுத்துகிறது.

அரிய இந்தக் கையெழுத்துப் பிரதி கி.பி. 1883 ஆம் ஆண்டில் ஒரு வக்பாக வழங்கப்பட்டது. அதன் அசல் பதிப்பு தற்போது கிங் அப்துல்அஜிஸ் வக்பு நூலக வளாகத்தில் பாதுகாக்கப்பட்டு வருகிறது. இது குர்ஆன் மீது முஸ்லிம்கள் கொண்டுள்ள நீடித்த பக்தியையும், பல நூற்றாண்டுகளாக இஸ்லாமிய கலைகளின் செழுமையையும் பறைசாற்றும் ஒரு நீடித்த சான்றாக விளங்குகிறது.

வாய்ப்பு கிடைத்தால் அவசியம் பாருங்கள் :

ஏக இறைவன் உங்களுக்கு வாய்ப்பு வழங்கினால், மக்காவில் உள்ள குர்ஆன் அருங்காட்சியகத்திற்கு அவசியம் சென்று,  உலகின் மிகப்பெரிய கையெழுத்துப் பிரதியான திருக்குர்ஆனை கண்டு ஆனந்தம் அடையுங்கள். கின்னஸ் உலக சாதனை புத்தகத்தில் இடம்பெற்றுள்ள இந்த  உலகின் மிகப்பெரிய பிரமாண்டமான குர்ஆன் குறித்து முஸ்லிம்களிடம் மட்டுமல்லாமல், சகோதரச் சமுதாய மக்களிடமும் எடுத்துக் கூறுங்கள்.  மூலப் பிரதியின் பெரும்பாலான பகுதி துலூத் எழுத்துருவில் எழுதப்பட்டிருந்தாலும், சூரத்துல் ஃபாத்திஹா நஸ்க் எழுத்துருவில் எழுதப்பட்டுள்ளது போன்ற அரிய தகவல்களையும் மற்றவர்களிடம் பகிர்ந்து கொள்ளுங்கள். 

அத்துடன் இந்த பிரமாண்டமான குர்ஆன், தனித்துவமான அரபு கையெழுத்துக் கலையைக் கொண்டிருப்பதுடன், தங்க முலாம் பூசுதல் மற்றும் புத்தகக் கட்டுதல் கலைகளையும், சிக்கலான அலங்காரங்கள், தொடக்கப் பக்கத்தில் சூரிய வடிவ உருவங்கள், மற்றும் விரிவாக வடிவமைக்கப்பட்ட முகப்பு மற்றும் தலைப்புப் பக்கங்களையும் காட்சிப்படுத்துகிறது போன்ற அரிய தகவல்களையும் பரப்பி மகிழ்ச்சி அடையுங்கள்.

- எஸ்.ஏ.அப்துல் அஜீஸ்