அலா குதா என்ற ஹிஜ்ரா பாதை திட்டம்....!

 சவூதி அரேபியா அறிமுகம் செய்த அலா குதா என்ற வரலாற்று சிறப்புமிக்க ஹிஜ்ரா பாதை திட்டம்

சவூதி அரேபியா, "அலா குதா" என்ற திட்டத்தை அறிமுகப்படுத்தியுள்ளது. இது, இறைத்தூதர் நபிகள் நாயகம் முஹம்மது (ஸல்) அவர்கள், மக்காவிலிருந்து மதீனாவிற்கு மேற்கொண்ட ஹிஜ்ரத் தொடர்பான வரலாற்றுப் பாதையை பார்வையாளர்கள் ஆராய்வதற்கான வாய்ப்பை வழங்குகிறது. இஸ்லாமிய நாட்காட்டியின் முதல் ஆண்டில், நபிகள் நாயகம் (ஸல்) அவர்கள் மக்காவிலிருந்து மதீனாவுக்கு மேற்கொண்ட வரலாற்றுச் சிறப்புமிக்க பயணத்தை மீண்டும் அனுபவிக்கும் வகையில்,  'அலா குதா' திட்டம் வடிவமைக்கப்பட்டுள்ளது.  

அலா குதா திட்டத்தின் நோக்கம் :

சுமார் 470 கிலோமீட்டர் நீளமுள்ள இந்தப் பாதை, இஸ்லாமிய வரலாற்றின் மிக முக்கியமான நிகழ்வுகளில் ஒன்றைப் பற்றி யாத்ரீகர்களும் சுற்றுலாப் பயணிகளும் அறிந்துகொள்ள உதவுவதை நோக்கமாகக் கொண்டுள்ளது. ஹிஜ்ரா, முஸ்லிம் சமூகத்தின் வளர்ச்சியில் ஒரு திருப்புமுனையாக அமைந்ததுடன், ஆழ்ந்த மார்க்க மற்றும் வரலாற்று முக்கியத்துவத்தையும் கொண்டுள்ளது.

இந்தத் திட்டத்தில் 41 வரலாற்றுச் சின்னங்கள், ஊடாடும் அனுபவங்கள் மற்றும் கல்வி நிலையங்கள் இடம்பெற்றுள்ளன. இறைத்தூதர் நபிகள் நாயகம் (ஸல்) அவர்களின்  ஹிஜ்ரத் நிகழ்வுகள், இடங்கள் மற்றும் முக்கியத்துவத்தை பார்வையாளர்கள் புரிந்துகொள்ள உதவும் வகையில் இந்த ஈர்ப்புகள் வடிவமைக்கப்பட்டுள்ளன.

இந்த முயற்சியின் மூலம், சவூதி அரேபியா தனது இஸ்லாமிய பாரம்பரியத்தைப் பாதுகாப்பதோடு, முக்கியமான வரலாற்றுத் தளங்களை பார்வையாளர்கள் எளிதில் அணுகும்படி செய்வதையும் நோக்கமாகக் கொண்டுள்ளது. மேலும், இந்தத் திட்டம் இரு புனித நகரங்களுக்கு இடையே பயணிக்கும் யாத்ரீகர்களுக்கும் சுற்றுலாப் பயணிகளுக்கும் ஆழமான கலாச்சார மற்றும் ஆன்மீக அனுபவத்தை வழங்குவதையும் நோக்கமாகக் கொண்டுள்ளது.

ஹிஜ்ராவின் மரபை ஆராய்வதற்கான வழி :

பாரம்பரிய, கலாச்சார சுற்றுலாவை மேம்படுத்துவதற்கும், சவூதி இராச்சியத்தின் வளமான இஸ்லாமிய வரலாற்றை பார்வையாளர்கள் அறிந்துகொள்ள வாய்ப்புகளை உருவாக்குவதற்கும் மேற்கொள்ளப்படும் பரந்த முயற்சிகளின் ஒரு பகுதியாக இந்த முன்னெடுப்பு அமைகிறது.

===================

"அலா குதா திட்டத்தில் 41 வரலாற்றுச் சின்னங்கள், ஊடாடும் அனுபவங்கள் மற்றும் கல்வி நிலையங்கள் இடம்பெற்றுள்ளன. இறைத்தூதர் நபிகள் நாயகம் (ஸல்) அவர்களின்  ஹிஜ்ரத் நிகழ்வுகள், இடங்கள் மற்றும் முக்கியத்துவத்தை பார்வையாளர்கள் புரிந்துகொள்ள உதவும் வகையில் இந்த ஈர்ப்புகள் வடிவமைக்கப்பட்டுள்ளன"

===================

வரலாற்றுச் சிறப்புமிக்க இடங்களைக் கல்விசார் அனுபவங்களுடன் இணைப்பதன் மூலம், 'அலா குதா' திட்டமானது, வழக்கமான சுற்றிப்பார்த்தலுக்கு அப்பாற்பட்டு, ஹிஜ்ராவின் மரபை ஆராய்வதற்கான ஒரு வழியைப் பார்வையாளர்களுக்கு வழங்குகிறது. மேலும் இறைத்தூர் நபிகள் நாயகம் அவர்களின்  அடிச்சுவடுகளைப் பின்பற்றி நடக்கும் வாய்ப்பை இந்த திட்டம் வழங்குகிறது. 

ஆவணப்படுத்தும் வரலாற்று மைல்கற்கள் :

இந்த திட்டம் குறித்து கருத்து தெரிவித்துள்ள சவூதி பொது பொழுதுபோக்கு ஆணையத்தின் தலைவர் துருக்கி அல் ஷேக், இந்தத் திட்டம் "வரலாற்று மைல்கற்களை ஆவணப்படுத்துகிறது என்றும், "நபிகளாரின் வாழ்க்கையைப் பற்றிய ஆழமான புரிதலை ஊக்குவிக்கிறது" என்றும் தெரிவித்துள்ளார். சவூதி பொது பொழுதுபோக்கு ஆணைய இணையதளத்தின்படி, 470 கி.மீ நீளமுள்ள இந்தப் பாதை, வரலாற்றுப் பயணத்தை மீண்டும் காட்டுவது மட்டுமின்றி, பார்வையாளர்களுக்கு ஆழ்ந்த அனுபவங்கள், பயிலரங்குகள் மற்றும்  மேம்படுத்தப்பட்ட மெய்நிகர் தொழில்நுட்பம் மூலம் நிகழ்வுகளை மீண்டும் கண்முன் கொண்டுவரும் வசதிகளையும் வழங்குகிறது. இந்த அனுபவம் "ஹிஜ்ரத்தின் (மக்காவிலிருந்து மதீனாவுக்கான பயணம்) வரலாற்று மற்றும் ஆன்மீக அம்சங்களில்" கவனம் செலுத்துகிறது. 

இந்த 470 கிலோ மீட்டர் பயணத்தில், 305 கிலோ மீட்டர் தூரத்தை மக்கள் நடந்தே கடக்கலாம். இந்தப் பாதையில் ஏழு தங்குமிடங்கள், 112-க்கும் மேற்பட்ட உணவகங்கள் மற்றும் 68-க்கும் மேற்பட்ட கடைகளும் உள்ளன. சவூதி செய்தி முகமையின் தகவல்படி, இந்தத் திட்டத்தின் முதற்கட்டமாக பத்து லட்சம் பார்வையாளர்களை வரவேற்பது இலக்காகக் கொள்ளப்பட்டுள்ளது. 2030-ஆம் ஆண்டிற்குள் இந்த எண்ணிக்கை ஐம்பது லட்சமாக உயரும் என்றும், எதிர்காலத்தில் இது ஒரு கோடியாக  அதிகரிக்க வாய்ப்புள்ளதாகவும்சவூதி பொது பொழுதுபோக்கு ஆணையத்தின் தலைவர் துருக்கி அல் ஷேக் நம்பிக்கை தெரிவித்துள்ளார். 

- எஸ்.ஏ.அப்துல் அஜீஸ்