ரபாத்தில் நடைபெற்ற சர்வதேச மாநாடு....!

"அமைதியான சமூகங்களை உருவாக்குவதில் இஸ்லாத்தின் பங்கு" 

- மொராக்கோவின் ரபாத்தில் நடைபெற்ற சர்வதேச மாநாடு -

உலகில் தற்போது நிலவும் பல்வேறு பிரச்சினைகளுக்கு சரியான புரிதல் இல்லாமையே முக்கிய காரணமாக இருந்து வருகிறது. மதங்களுக்கு இடையே மோதல் வெடிக்க ஒரு முக்கிய காரணமாக இருப்பது, மக்களிடையே நல்ல புரிதல் இல்லாமையாகும். இதன் காரணமாக உலகின் பல்வேறு பகுதிகளில் அடிக்கடி மோதல்கள் வெடிக்கின்றன. இந்த மோதல்களால், மக்களின் அமைதி பறிபோகிறது. கடும் பொருளாதார நெருக்கடிகள் ஏற்படுகின்றன. இதனால் மக்களின் துன்பங்கள் தொடர்கதையாக மாறுகின்றன. 

இந்த பிரச்சினைக்கு தீர்வு காண பல்வேறு முயற்சிகளை மேற்கொள்ளப்பட்டு வருகின்றன. அந்த வகையில், இஸ்லாமிய உலக கல்வி, அறிவியல் மற்றும் கலாச்சார அமைப்பு (ICESCO) நல்ல முயற்சிகளை முன்னெடுத்து வருகிறது. இந்த முயற்சிகள் மூலம், உலகில் மதங்களுக்கு இடையே நிலவும் கசப்புகள் நீங்கி, அமைதியான சூழ்நிலை உருவாக வாய்ப்புகள் அதிகரித்து வருகின்றன. அந்த வகையில் உலகளவில் அமைதியான சகவாழ்வை மேம்படுத்துவதற்கான வழிகளைப் பற்றி விவாதிக்கும் சர்வதேச மத நல்லிணக்கம் குறித்த மாநாடு, மொராக்கோவின் தலைநகரம் ரபாத்தில் நடைபெற்றது. 

சர்வதேச மத நல்லிணக்கம்  மாநாடு: 

கடந்த டிசம்பர் மாதம் கடைசி வாரத்தில், இஸ்லாமிய உலக கல்வி, அறிவியல் மற்றும் கலாச்சார அமைப்பின் (ICESCO) தலைமையகம், அஜர்பைஜான் குடியரசின் மத விவகாரங்களுக்கான மாநிலக் குழு மற்றும் மொராக்கோவின் ரபாத்தில் உள்ள அஜர்பைஜான் தூதரகத்துடன் இணைந்து  சர்வதேச மத நல்லிணக்கம் குறித்த மாநாடு ஒன்றை வெற்றிகரமாக நடத்தியது. அமைதியான சமூகங்களை உருவாக்குவதில் மதத்தின் பங்கு மற்றும் மோதல் தீர்வுக்கான ஒரு கருவியாக சகவாழ்வு மற்றும் மதங்களுக்கு இடையேயான உரையாடலை மேம்படுத்துவதில் உள்ள சவால்களை எதிர்கொள்வதற்கான வழிகளைப் பற்றி விவாதிக்க ஏற்பாடு செய்யப்பட்ட இந்த "சர்வமத நல்லிணக்கம்: அமைதியான சகவாழ்வை வளர்ப்பது" என்ற சர்வதேச மாநாடு ஒரு சிறப்பான மாநாடாக அமைந்தது என்றே கூறலாம். 

இந்த மாநாடு, பல்வேறு சமூகங்களிடையே அமைதியான சகவாழ்வு, பரஸ்பர மரியாதை மற்றும் மத சகிப்புத்தன்மையை வளர்ப்பதை மையமாகக் கொண்டதாக இருந்தது. இந்த மாநாடு, மதத் தலைவர்கள், கொள்கை வகுப்பாளர்கள் மற்றும் அறிஞர்கள் இடையே உரையாடல் மற்றும் ஒத்துழைப்பை வலுப்படுத்துதல், மத சகிப்பின்மையைப் புரிந்துகொள்வதற்கும் எதிர்ப்பதற்கும் ஒரு முக்கியப் பங்களிப்பை வழங்குதல், நல்லிணக்கம் மற்றும் பரஸ்பர மரியாதை கலாச்சாரத்தை ஊக்குவிப்பதற்கான சிறந்த நடைமுறைகளைப் பகிர்ந்து கொள்ளுதல் ஆகிய பல முக்கிய கருப்பொருள்களைக் கொண்டதாக இருந்தது.  

அறிவுஜீவிகள் பங்கேற்பு:

இந்த மாநாடு, புனித குர்ஆனின் வசனங்களை (கிராத்) ஓதுதலோடு தொடங்கியது. அதைத் தொடர்ந்து ICESCOவின் நாகரிக உரையாடல் மையத்தின் தலைவர் தூதர் காலித் ஃபத்தல்ரஹ்மான், உலக அமைதியை நிலைநாட்டும் பாதையில் இந்த சர்வதேச மாநாட்டின் முக்கியத்துவத்தை வலியுறுத்தினார் .மாநாட்டில், அஜர்பைஜான், மொராக்கோ, எகிப்து, லிபியா, துனிசியா, இத்தாலி, இங்கிலாந்து மற்றும் பிற நாடுகளைச் சேர்ந்த பிரபல அறிவுஜீவிகள், விஞ்ஞானிகள் மற்றும் மத நிபுணர்கள், சமூக ஆர்வலர்கள் கலந்துகொண்டு உரையாற்றினார்கள்.  அப்போது, இணக்கமான மற்றும் செழிப்பான சமூகங்களை உருவாக்குவதற்கான ஒரு மூலக்கல்லாக சகவாழ்வுக்கான முக்கிய அங்கமாக இருப்பதை அவர்கள்  குறிப்பிட்டனர். வெவ்வேறு நம்பிக்கைகளைப் பின்பற்றுபவர்களிடையே ஆக்கபூர்வமான மற்றும் நிலையான தொடர்புகளை வளர்ப்பதற்கான ஒரு முக்கிய தளமாக மாநாட்டை அவர்கள் எடுத்துரைத்தனர்.

ICESCO இயக்குநர் ஜெனரல் டாக்டர் சலீம் எம். அல்-மாலிக் தனது உரையில், தற்போதைய உலகளாவிய முன்னேற்றங்கள் மற்றும் மாற்றங்கள் அமைதியைக் கட்டியெழுப்பவும் பாதுகாப்பைப் பராமரிக்கவும் அனைவருக்கும் பெரும் பொறுப்புகளை வழங்குகின்றன என்று வலியுறுத்தினார், ஏனெனில் தற்போதைய சூழ்நிலைக்கு மனித கூட்டாண்மையின் மதிப்புகளை நிலைநிறுத்த ஒரு கணம் தேவைப்படுகிறது, மனிதகுலத்தின் எதிர்காலத்தை வடிவமைப்பதில் அமைதியைத் தாங்குபவர்களாக நம்பிக்கை மற்றும் அதன் மக்களின் செயல்திறனை அங்கீகரிக்க வேண்டியதன் அவசியத்தை சுட்டிக்காட்டினார்.

அஜர்பைஜானின் பங்களிப்பு:

அஜர்பைஜானின் மத விவகாரங்களுக்கான மாநிலக் குழுவின் தலைவரான ராமின் மம்மடோவ், தனது பங்கிற்கு, பன்முகத்தன்மை, சகவாழ்வு மற்றும் நல்லிணக்க கலாச்சாரத்தை மேம்படுத்துவதற்கும், மத சுதந்திரத்தின் மதிப்புகளை ஆதரிப்பதற்கும் அஜர்பைஜான் செலுத்தும் மிகுந்த கவனத்தை எடுத்துரைத்தார், சகவாழ்வு மற்றும் அமைதியை மேம்படுத்த ICESCOவின் முயற்சிகளைப் பாராட்டினார்.

அஜர்பைஜான் குடியரசின் மில்லி மஜ்லிஸ் (பாராளுமன்றம்) துணைத் தலைவர் ரஃபேல் ஹுசைனோவ், இஸ்லாமிய உலகின் நாகரிகம் என்பது பல்வேறு மொழிகள், மதங்கள், பழக்கவழக்கங்கள் மற்றும் மரபுகளைப் பொருட்படுத்தாமல் நாகரிகத்தின் குடையின் கீழ் ஒன்றுபட்ட பல மக்களால் பகிர்ந்து கொள்ளப்படும் ஒரு பொதுவான மற்றும் பன்முகத்தன்மை கொண்ட பாரம்பரியம் என்று வலியுறுத்தினார்.

எகிப்து, அஜர்பைஜான், லிபியா மற்றும் செனகல் ஆகிய நாடுகளைச் சேர்ந்த நிபுணர்களின் பங்கேற்புடன், "நிலையான வளர்ச்சியின் அடிப்படை அங்கமாக மதங்களுக்கு இடையேயான நல்லிணக்கம்" பற்றி முதல் அமர்வு விவாதித்தது. இரண்டாவது அமர்வு அஜர்பைஜான், இத்தாலி, பிரிட்டன் மற்றும் துனிசியாவைச் சேர்ந்த நிபுணர்களின் பங்கேற்புடன் "மத சகவாழ்வில் சிறந்த நடைமுறைகள்" பற்றி விவாதித்தது.

சிறப்பு கண்காட்சி:

நிகழ்வின் ஒரு பகுதியாக, "பொது மனித மதிப்புகள் மற்றும் பல்வேறு மதங்கள்" என்ற கருப்பொருளில் ஒரு கண்காட்சி நடைபெற்றது. இதில் அஜர்பைஜானின் சகிப்புத்தன்மை மரபுகளை பிரதிபலிக்கும் புகைப்படங்கள் இடம்பெற்றன. 2024 ஆம் ஆண்டிற்கான இஸ்லாமிய உலகின் தலைநகராக ஐசெஸ்கோ அறிவித்த ஷுஷாவின் வரலாற்று மற்றும் கலாச்சார நினைவுச்சின்னங்களும் இடம்பெற்றன. மேலும், உள்ளடக்கிய மற்றும் புரிந்துகொள்ளும் உலகத்தை உருவாக்குவதில் பல்வேறு கலாச்சாரங்கள் மற்றும் மதங்கள் இணைந்து பணியாற்றுவதற்கான உறுதிப்பாட்டை இந்த மாநாடு அடிக்கோடிட்டுக் காட்டியது.

அஜர்பைஜானில் மத பன்முகத்தன்மை மற்றும் சகிப்புத்தன்மையை எடுத்துக்காட்டும் வகையில் "பகிரப்பட்ட மனிதநேயம், பன்முகத்தன்மை கொண்ட நம்பிக்கைகள்" என்ற பக்கவாட்டு கண்காட்சி மாநாட்டில் கலந்துகொண்டவர்களை வெகுவாக கவ்ர்ந்தது.  உலகளவில் அமைதியான சகவாழ்வை மேம்படுத்துவதற்கான வழிகளைப் பற்றி விவாதிக்க நடைபெற்ற இந்த சர்வதேச மத நல்லிணக்கம் மாநாடு, உலகில் அமைதி நிலவ ஒரு நல்ல முயற்சி என்றே கூறலாம்.

- எஸ்.ஏ.அப்துல் அஜீஸ்