தலைவராக டபுள்யு.எஸ்.ஹபீப் பதவியேற்பு...!

இந்திய ரியல் எஸ்டேட் டெவலப்பர்கள் சங்கங்களின் கூட்டமைப்பு (கிரெடாய்) தமிழ்நாடு பிரிவின் தலைவராக டபுள்யு.எஸ்.ஹபீப் பதவியேற்பு

சென்னை, ஏப்.13- இந்திய மாநிலங்கள் முழுவதும் உள்ள தனியார் ரியல் எஸ்டேட் டெவலப்பர்களைப் பிரதிநிதித்துவப்படுத்தும் உச்ச அமைப்பான இந்திய ரியல் எஸ்டேட் டெவலப்பர்கள் சங்கங்களின் கூட்டமைப்பின் (CREDAI) தமிழ்நாடு பிரிவின் தலைவராக ஆர்.டபுள்யு.டி.யின்  (RWD) தலைவரும், நிர்வாக இயக்குநருமான டபுள்யு.எஸ்.ஹபீப் பதவியேற்றுக் கொண்டுள்ளார். 2025-2027 காலத்திற்கான அதன் புதிய தலைமைக் குழுவை, முறையாக இணைத்து அவர் வழிநடத்திச் செல்வார் என அறிவிக்கப்பட்டுள்ளது.

இந்திய ரியல் எஸ்டேட் மேம்பாட்டாளர் சங்கங்களின் கூட்டமைப்பான, 'கிரெடாய்' அமைப்பின் தமிழக பிரிவுக்கு, 2025-27 ஆண்டு காலத்துக்கான புதிய நிர்வாகிகள், சமீபத்தில் தேர்வு செய்யப்பட்டனர். அதன்படி, கிரெடாய் தமிழக பிரிவு புதிய தலைவராக ஹபீப், துணைத் தலைவராக கோபிநாத், செயலராக ஸ்ரீகுமார், இணைச் செயலராக சதாசிவம், பொருளாளராக ஜெய்பிரகாஷ் ஆகியோர் சனிக்கிழமையன்று (12.04.2025) பொறுப்பேற்றனர். அவர்களுக்கு, அமைச்சர் சேகர்பாபு வாழ்த்து தெரிவித்தார். மேலும், கிரெடாய் தேசிய செயலர் சுரேஷ்கிருஷ்ணா, முன்னாள் தலைவர் இளங்கோவன் உள்ளிட்டோர் வாழ்த்து தெரிவித்து, கிரெடாய் செயல்பாடுகள் குறித்து விரிவாக பேசினர்.

ஹபீப் மகிழ்ச்சி:

இந்திய ரியல் எஸ்டேட் டெவலப்பர்கள் சங்கங்களின் கூட்டமைப்பின் தமிழ்நாடு பிரிவின் தலைவராக பதவி ஏற்றக் கொண்டபிறகு, செய்தியாளர்களிடம் பேசிய ஹபீப், "ரியல் எஸ்டேட் என்பது வெறும் வணிகம் மட்டுமல்ல. வேலைவாய்ப்பு, உள்கட்டமைப்பு, பொருளாதார மீள்தன்மை ஆகியவற்றின் அடித்தளமாகும். நமது துறை தமிழ்நாட்டின் GSDP-க்கு குறிப்பிடத்தக்க பங்களிப்பை அளிக்கிறது. மேலும் நகரமயமாக்கல் தீவிரமடையும் போது அதன் ஆற்றல் வரும் தசாப்தங்களில் பெருகும். ஒரு டிரில்லியன் டாலர் பொருளாதாரம் என்ற இலக்கை அடைய உதவும் என்பதால், தமிழ்நாட்டின் முக்கிய நகரங்கள் மற்றும் நகரங்களுக்கான மாஸ்டர் பிளான்களை நிறுவ வேண்டியதன் அவசியம் இருக்கிறது" என்று  வலியுறுத்தினார்.

தமிழக அரசுடன் இணைந்து செயல்படும்:

மேலும் பேசிய அவர், "சரியான நேரத்தில் செயல்படுத்துதல், கொள்கை ஒத்திசைவு மற்றும் நெறிப்படுத்தப்பட்ட ஒப்புதல்களை உறுதி செய்வதற்காக CREDAI தமிழ்நாடு அரசாங்கத்துடன் கைகோர்த்து செயல்பட தயாராக உள்ளது," என்று கூறினார்.

இதேபோன்று பேசிய நகர மற்றும் கிராம திட்டமிடல் இயக்குநரகத்தின் இயக்குநர் பி. கணேசன், கோயம்புத்தூர் மற்றும் மதுரைக்கான மாஸ்டர் பிளான்கள் விரைவில் வெளியிடப்படும் என்று கூறினார். மேலும் கிரெடாய் குழுவின் கருத்துகள் பரிசீலிக்கப்படும் என்றும் மலைவாசஸ்தலங்களுக்கான பிரத்யேக மாஸ்டர் பிளானை அரசாங்கம் விரைவில் வெளியிடும் என்றும் அவர் தெரிவித்தார்.  தமிழகத்தில், 135 நகரங்கள் மற்றும் சிறுநகரங்களுக்காக உருவாக்கப்படும் 'மாஸ்டர் பிளான்'களால், அடிப்படை வசதிகளில் பெரிய மாற்றம் ஏற்படும் என்றும்  தமிழக நகர் மற்றும் ஊரமைப்பு துறை இயக்குநர் கணேசன் கூறினார்.

வாழ்க்கை குறிப்பு:

ஆர்.டபுள்யு.டி.யின் (RWD) நிர்வாக இயக்குனர் டபுள்யு.எஸ்.ஹபீப், பெங்களூரு பல்கலைக்கழகத்தில் வேதியியல் பொறியியலில் பட்டம் பெற்றுள்ளார். ரியல் எஸ்டேட் துறையில் அவருக்கு இரண்டு தசாப்தங்களுக்கும் மேலான அனுபவம் உள்ளது. அவர் ஒரு முதல் தலைமுறை தொழில்முனைவோர். 2006 ஆம் ஆண்டு, ஹைதராபாத்தின் ராம்கி குழுமத்துடன் இணைந்து, பொறியியல் சிறப்பின் மிக உயர்ந்த தரத்தை அடைவதற்கும், புதுமையான வாழ்க்கை முறையின் அளவுகோல்களை உயர்த்துவதற்கும் ஒரு தனித்துவமான தொலைநோக்குப் பார்வையுடன் ஆர்.டபுள்யு.டி-ஐ உருவாக்கினார். ராம்கி மற்றும் ஆர்.டபுள்யு.டி. சென்னை மற்றும் தென்னிந்தியாவின் முக்கிய நகரங்களில் திட்டங்களுடன் 10 மில்லியன் சதுர அடி அனுபவத்தை இணைத்துள்ளது.

- சிறப்புச் செய்தியாளர்: எஸ்.ஏ.அப்துல் அஜீஸ்