கிராமத்தின் வாழ்வாதாரத்தைக் காக்கும் ஆப்கானியப் பெண் விவசாயிகள்...!

  " கிராமத்தின் வாழ்வாதாரத்தைக் காக்கும் 

ஆப்கானியப் பெண் விவசாயிகள் "

ஆப்கானிஸ்தானில் பெண்கள் அடிமையாக நடத்தப்படுகிறார்கள் என்ற தவறான செய்திகள் உலகம் முழுவதும் பரவிக் கிடக்கின்றன.  அங்குள்ள பெண்களுக்கு சம வாய்ப்புகள் வழங்கப்படுவதில்லை என்று பல மேற்காசிய ஊடகங்கள் கூக்குரல் எழுப்பிக் கொண்டே இருக்கின்றன. ஆனால் ஆப்கானிஸ்தானில் பெண்கள், விவசாயம் உள்ளிட்ட பல்வேறு தொழில்களில் ஈடுபட்டு, தங்களுடைய பொருளாதார நிலையை மேம்படுத்திக் கொண்டே இருக்கிறார்கள் என்பது தான் உண்மையாகும். அந்த வகையில் ஆப்கானிஸ்தானின் எஷ்டிவி கிராமத்தில் வாழும் முஸ்லிம் பெண்கள் எப்படி வேளாண் தொழிலில் ஈடுபட்டு சாதித்து வருகிறார்கள் என்பதை அறிந்தால், உண்மையில் நமக்கு வியப்பு ஏற்படும். 

வடகிழக்கு ஆப்கானிஸ்தானின் தொலைதூர மாகாணத்தில், பனி மூடிய மலைகளுக்கு இடையே அமைந்துள்ள தங்கள் சமூகத்தின் வாழ்வாதாரத்தைக் காப்பதில் பெண் விவசாயிகள் முக்கியப் பங்காற்றி வருகின்றனர். ஜூன் மாதத்தில் எஷ்டிவி கிராமத்தின் வயல்களில் பயிர் வளர்ச்சியின் ஆரம்ப அறிகுறிகள் மட்டுமே தென்படுகின்றன. கிராமத்தைச் சுற்றிச் சிறிய பச்சை நிறத் தளிர்கள் முளைக்கத் தொடங்கியுள்ளன.

களை எடுக்கும் பணியில் மும்முரமாக இருந்தபோது பேசிய ஹபீபா என்ற பெண்மணி, நூரிஸ்தான் மாகாணத்தில் பல தசாப்தங்களாக விவசாயம் செய்து வருவதில் பெருமிதம் கொள்கிறார். "எனக்கு எட்டு வயதாக இருந்தபோதே என் தாயாருடன் வயலுக்குச் செல்லத் தொடங்கிவிட்டேன்," என்று ஒற்றைப் பெயரை மட்டுமே கொண்ட 46 வயதான அவர் கூறுகிறார். "இலையுதிர் காலத்தில் கோதுமை, பீன்ஸ், உருளைக்கிழங்கு மற்றும் சோளம் ஆகியவற்றை அறுவடை செய்து வீட்டிற்குக் கொண்டு வரும்போது நாங்கள் மகிழ்ச்சியடைகிறோம்," என்றும் அவர் மேலும் கூறி மகிழ்ச்சி அடைகிறார். 

விவசாயத்தில் பட்டம் பெற்ற பெண் :

ஆப்கானிஸ்தானில் தலிபான் அரசாங்கம் பெண்களுக்குப் பெரும்பாலான வேலைவாய்ப்புகளைத் தடை செய்திருந்தாலும், அவர்கள் விவசாயம் செய்யப் பொதுவாக அனுமதிக்கப்படுகிறார்கள். விவசாயத்தில் பட்டம் பெற்ற 34 வயதான முகமது யஹ்யா ஃபைசி, அப்பெண்களின் பணியை மதிப்பதாகக் கூறுகிறார். "அவர்களின் உழைப்பு இல்லையென்றால், குளிர்காலத்தின் நடுப்பகுதியில் எங்களுக்கு உணவு கிடைக்காது," என்றும் அவர் குறிப்பிட்டார்.

கோடைக்காலத்தில் எஷ்டிவி கிராமத்தை ஒரு மண் பாதையின் வழியாக மட்டுமே சென்றடைய முடியும். பல ஆண்டுகளாக எந்தவொரு சர்வதேச ஊடகமும் இந்தக் கிராமத்தை வந்தடைந்ததில்லை. உள்ளூர் வட்டார மொழியைப் பேசும் மக்கள் வசிக்கும் பருன்  பள்ளத்தாக்கில், தலைமுறைகளாகவே "ஆண்களுக்கும் பெண்களுக்கும் இடையே பணிகள் பிரித்து வழங்கப்பட்டுள்ளன" என்று ஃபைசி கூறினார். "பெண்கள் விவசாயம், பயிர் நடுதல், நீர் பாய்ச்சுதல் மற்றும் வீட்டில் சமைத்தல் போன்ற பணிகளில் மும்முரமாக ஈடுபடுகிறார்கள்," என்று ஐக்கிய நாடுகள் சபையின் உணவு மற்றும் விவசாய அமைப்பில்  தன்னார்வலராகப் பணியாற்றும் கிராமத்து விவசாயியான ஃபைசி தெரிவித்தார்.

===========

"ஆப்கானிஸ்தானில் பெண்கள் விவசாயம் செய்யப் பொதுவாக அனுமதிக்கப்படுகிறார்கள். அங்குள்ள விவசாயப் பெண்களின் பணி மதிப்படுகிறது. பல சிரமங்கள் இருந்தபோதிலும், பெண்கள் ஒன்றாக வயல்களில் வேலை செய்வதை விரும்புகிறார்கள். அவர்களின் உழைப்பு இல்லையென்றால், குளிர்காலத்தின் நடுப்பகுதியில் ஆப்கானிஸ்தானில் பல கிராமங்களுக்கு உணவு கிடைக்காது " 

===========

இங்குள்ள ஆண்கள், விலங்குகள் மூலம் இழுக்கப்படும் கலப்பைகளைப் பயன்படுத்துதல், கால்நடைகளைப் பராமரித்தல் மற்றும் குளிர்காலத்திற்கான விறகு சேகரித்தல் போன்ற பணிகளை மேற்கொள்கிறார்கள். குளிர்காலத்தில் பனிப்பொழிவு காரணமாக இந்தக் கிராமம் கிட்டத்தட்ட ஆறு மாதங்களுக்கு வெளியுலகத் தொடர்பை இழந்து தனித்துவிடப்படுகிறது. ஹபீபாவின் நாள் அதிகாலை 4 மணியளவில் தொடங்குகிறது. அப்போது அவர் எழுந்து பிரார்த்தனை செய்த பிறகு, விறகு அடுப்பில் தன் மகள்களுடன் இணைந்து காலை உணவைத் தயாரிக்கிறார்.

அவர் தனது வயலில் விளைந்த கோதுமை மாவைக் கொண்டு ரொட்டி தயாரிக்கிறார். அதனுடன் தனது வயலில் விளைந்த சிவப்பு பீன்ஸ் மற்றும் தனது கணவர் தயாரித்த வெண்ணெய் மற்றும் உலர்ந்த தயிர் ஆகியவற்றைச் சேர்த்து உண்கிறார். சமையலறையாகவும் படுக்கையறையாகவும் பயன்படும் அந்த அறை, ஹபீபாவின் 11 வயது மகள் நஹிதா வரைந்த பூக்களால் அலங்கரிக்கப்பட்டிருந்தது. கிராமத்துப் பள்ளியில் கற்ற ஆங்கிலத்தை அவள் அங்கு பயிற்சி செய்து கொண்டிருந்தாள். அவளது தாய்க்குப் பள்ளிக்குச் செல்லும் வாய்ப்பு கிடைக்காத நிலையில், நஹிதாவின் கல்வியும் விரைவில் நின்றுபோகும் சூழல் உள்ளது. ஏனெனில், நாடு முழுவதும் 12 வயதுக்கு மேற்பட்ட சிறுமிகள் கல்வி கற்பதற்குத் தடை விதிக்கப்பட்டுள்ளது.

அங்கீகரிக்கப்படாதவை :

உணவுப் பாதுகாப்பை உறுதி செய்வதில் பெண் விவசாயிகளின் முக்கியப் பங்கு "அங்கீகரிக்கப்படாமல்" இருப்பதைச் சுட்டிக்காட்டி, 2026-ஆம் ஆண்டை 'சர்வதேச பெண் விவசாயி ஆண்டாக' ஐ.நா.வின் உணவு மற்றும் வேளாண்மை அமைப்பு அறிவித்துள்ளது. ஆப்கானிஸ்தானில் இது மிகவும் உண்மையான ஒரு சூழலாக உள்ளது. அங்கு மக்கள் தொகையில் மூன்றில் ஒரு பகுதியினருக்கு அவசர உணவு உதவி தேவைப்படுவதாக ஐ.நா. கூறுகிறது.

பீன்ஸ் மற்றும் உருளைக்கிழங்கு பயிரிடும் 70 வயதான பிபி ஜான், விவசாயம் மிகவும் கடினமான பணி என்று கூறினார். "நாங்கள் கடுமையாக உழைக்கிறோம். எங்கள் கைகள் உரிந்து போகின்றன. ஆனால் குழந்தைகளுக்கு உணவளிக்க வேண்டியுள்ளது," என்று அவர் கூறினார். ஹபீபா ஒரு டிராக்டரை வைத்திருக்க விரும்புகிறார். ஆனால் அது மிகவும் விலை உயர்ந்தது. கிராமத்தில் ஒரே ஒரு டிராக்டர் மட்டுமே உள்ளது. அதை ஒரு குடும்பம் பணம் செலுத்தக்கூடியவர்களுக்கு வாடகைக்கு விடுகிறது. "எனக்கு அவ்வளவு உடல் வலிமை இல்லை. என் முதுகும் கால்களும் வலிக்கின்றன," என்று அவர் கூறினார். தனியுரிமை காரணங்களுக்காகத் தனது குடும்பப் பெயரை வெளியிட வேண்டாம் என்று கேட்டுக்கொண்ட நாஜியா, உள்ளூர் விவசாயிகளுக்கு அதிகளவிலான கருவிகளும் வர்த்தக வாய்ப்புகளும் தேவை என்பதை ஒப்புக்கொள்கிறார்.

விவசாயம் ஒரு சிறந்த தொழில் :

"விவசாயம் ஒரு சிறந்த தொழில். அது ஆண்களுக்கு மட்டுமேயானதல்ல," என்று பாகிஸ்தானில் பல்கலைக்கழகக் கல்வி பயின்ற 28 வயதான அவர் கூறுகிறார். விவசாயிகளிடம் பெரும்பாலும் உபரி விளைச்சல் கிடைப்பதாகக் கூறிய அவர், "ஆனால் எங்கள் விளைபொருட்களை விற்பனை செய்ய முறையான சந்தை அமைப்பு இல்லை," என்று குறிப்பிட்டார். மிகவும் தொலைதூரப் பகுதியில் இருப்பதால் வாடிக்கையாளர்களுக்கு நேரடியாக விற்பனை செய்வது சாத்தியமற்றதாக உள்ளது. மேலும், அவ்வழியே செல்லும் வர்த்தகர்களைச் சந்திப்பதற்கான வாய்ப்புகளும் குறைவாகவே உள்ளன. "நான் ஏழு கிலோ உருளைக்கிழங்கை 70 ஆப்கானிகளுக்கு விற்கிறேன். ஆனால் கண்ணியமான வருமானம் ஈட்ட எனக்கு 150 ஆப்கானிகள் தேவை," என்று நாஜியா தெரிவிக்கிறார்.

அறுவடை செய்யப்பட்ட பயிர்களைச் சேமித்து வைத்து, சந்தை நிலைமை மேம்படும்போது விற்பனை செய்வதற்காக ஐ.நா.வின் நிதியுதவியுடன் சேமிப்புக் கிடங்குகள் அமைக்கப்பட்டுள்ளன. மேலும் சில பெண்களுக்குச் சிறந்த ரக விதைகள் வழங்கப்பட்டுள்ளன. வருமானத்தைப் பன்முகப்படுத்த, ஒரே நிலப்பரப்பில் மரங்களையும் பயிர்களையும் இணைத்து வளர்க்கும் 'வேளாண் காடு வளர்ப்பு' (agroforestry) முறையும் அறிமுகப்படுத்தப்பட்டுள்ளது. ஒரு காலத்தில் ஆப்பிள் மற்றும் வால்நட் பழங்களை மட்டுமே விளைவித்த அந்த கிராமத்தில், இப்போது செர்ரி, பேரிக்காய், பீச் மரங்கள் உள்ளிட்டவை உள்ளன என்று ஃபைசி கூறினார். ஆனால், கணிக்க முடியாத பனி மற்றும் மழை, அல்லது பயிர்களை அழிக்கும் வெள்ளப்பெருக்குகள் போன்றவற்றால் ஏற்படும் காலநிலை மாற்றம் ஒரு பெரிய கவலையாக உள்ளது. "புவி வெப்பமயமாதலுக்கு மிகக் குறைந்த பங்களிப்பைச் செய்திருந்தாலும், அதன் கடுமையான பாதிப்புகளைச் சுமக்கும்" நாடுகளின் குழுவில் ஆப்கானிஸ்தானும் உள்ளது என்று ஐ.நா. மேம்பாட்டுத் திட்டம் கண்டறிந்துள்ளது.

நஜியாவைப் பொறுத்தவரை, வானிலை ஒரு கூடுதல் சவாலாக இருந்தது. "எங்களால் அதைக் கணிக்க முடியாது. அது திடீரென்று எங்களைத் தாக்கிவிடுகிறது." ஆனால், இந்தச் சிரமங்கள் இருந்தபோதிலும், பெண்கள் ஒன்றாக வெளியில் வேலை செய்வதை விரும்புவதாக அவர் கூறினார். "நாங்கள் ஒருவருக்கொருவர் உதவ முடியும்," என்று அவர் கூறினார். அதேநேரத்தில் கிராமத்திற்கு சத்தான உணவையும் வழங்குகிறார். "நாங்கள் எங்கள் சொந்தக் கைகளால் விளைவிப்பவை மிகவும் ஆரோக்கியமானவை"  என்று நஜியா கூறும்போது, உண்மையில் விவசாயத்தின் மீது அவர் கொண்டிருக்கும் ஆர்வம் மற்றும் ஈடுபாடு நன்றாக அறிய முடிகிறது. 

- எஸ்.ஏ.அப்துல் அஜீஸ்