கிங் அப்துல்அஜீஸ் சர்வதேச குர்ஆன் போட்டி-பெண் போட்டியாளர்கள் அறிமுகம்.....!

 கிங் அப்துல்அஜீஸ் சர்வதேச குர்ஆன் போட்டி:

 வரலாற்றுச் சிறப்புமிக்க வகையில் பெண் போட்டியாளர்கள் அறிமுகம்

புனித குர்ஆனை மனப்பாடம் செய்தல், ஓதுதல் மற்றும் அதன் விளக்கவுரை ஆகியவற்றுக்கான 'கிங் அப்துல்அஜீஸ் சர்வதேசப் போட்டி'யின் 46-வது பதிப்பின் வெற்றியாளர்கள் மக்காவில் கௌரவிக்கப்பட்ட நிலையில், இப்போட்டியின் வரலாற்றிலேயே முதன்முறையாகப் பெண் போட்டியாளர்களும் பங்கேற்று சாதனை புரிந்துள்ளனர். 

சவூதி அரேபியாவில் உள்ள இரு புனித மஸ்ஜித்துகளின் பாதுகாவலரான மன்னர் சல்மான் அவர்களின் ஆதரவில் நடைபெற்ற இந்த கிங் அப்துல்அஜீஸ் சர்வதேச குர்ஆன் போட்டி விருது வழங்கும் விழாவில், மக்கா பிராந்தியத்தின் துணை ஆளுநர் இளவரசர் சவுத் பின் மிஷால் பின் அப்துல்அஜீஸ், மன்னரின் சார்பாக ஆண் வெற்றியாளர்களை மஸ்ஜிதுல் ஹராம் (புனித மசூதி) வளாகத்தில் கௌரவித்து வாழ்த்து தெரிவித்தார். 

பெண் போட்டியாளர்கள் கவுரவிப்பு :

இரு புனித மஸ்ஜித்துகளின் பாதுகாவலரின் மனைவியான இளவரசி ஃபஹ்தா பின்ட் ஃபலாஹ் அல் ஹித்லைன், மக்காவில் உள்ள ஹில்டன் கன்வென்ஷன் ஹோட்டலில் பெண் வெற்றியாளர்களைத் தனித்தனியாகக் கௌரவித்து தமது வாழ்த்துகளையும் அன்பையும் வெளிப்படுத்தினார். 

=======================

"புனித குர்ஆனை மனப்பாடம் செய்தல், ஓதுதல் மற்றும் அதன் விளக்கவுரை ஆகியவற்றுக்கான 'கிங் அப்துல்அஜீஸ் சர்வதேசப் போட்டி'யின் 46-வது பதிப்பின் வரலாற்றிலேயே முதன்முறையாகப் பெண் போட்டியாளர்களும் பங்கேற்று சாதனை புரிந்துள்ளனர்" 

=======================

இஸ்லாமிய விவகாரங்கள், அழைப்புப் பணி (தாவா) மற்றும் வழிகாட்டுதல் அமைச்சகத்தால் ஏற்பாடு செய்யப்பட்ட இந்த நிறைவு விழாவில் இளவரசர்கள், அமைச்சர்கள், தூதர்கள், பங்கேற்கும் தூதுக்குழுக்களின் தலைவர்கள் மற்றும் அரசு அதிகாரிகள் ஆகியோர் கலந்துகொண்டு சிறப்பித்தனர். .

334 போட்டியாளர்கள் பங்கேற்பு :

இப்போட்டியின் இறுதிச் சுற்றுகள் புனித மஸ்ஜித்தில் பல நாட்களாக நடைபெற்றன. இதில் 133 நாடுகளைச் சேர்ந்த 334 ஆண் மற்றும் பெண் போட்டியாளர்கள், சவுதி மற்றும் சர்வதேச நிபுணர்களைக் கொண்ட நடுவர் குழுக்களின் முன்னிலையில் போட்டியிட்டனர். போட்டியில்  நடுவர்களாக இருந்தவர்களும் கௌரவிக்கப்பட்டனர். 

வெற்றியாளர்கள் ஐந்து பிரிவுகளின் கீழ் கௌரவிக்கப்பட்டார்கள். ஓதுதல், தஜ்வீத் (ஓதும் முறை) மற்றும் கிராஅத் (ஓதும் பாணி) ஆகியவற்றுடன் முழு புனித குர்ஆனையும் மனப்பாடம் செய்தல்; ஓதுதல், தஜ்வீத் மற்றும் விளக்கவுரையுடன் முழு புனித குர்ஆனையும் மனப்பாடம் செய்தல்; ஓதுதல் மற்றும் தஜ்வீத்துடன் தொடர்ந்து வரும் 20 ஜூஸ்-களை (பகுதிகளை) மனப்பாடம் செய்தல்; ஓதுதல் மற்றும் தஜ்வீத்துடன் தொடர்ந்து வரும் 15 ஜூஸ்-களை மனப்பாடம் செய்தல்; மற்றும் ஓதுதல் மற்றும் தஜ்வீத்துடன் தொடர்ந்து வரும் ஐந்து ஜூஸ்-களை மனப்பாடம் செய்தல் என்ற பிரிவுகளின் கீழ் போட்டி நடத்தப்பட்டது. 

வெற்றியாளர்களின் எண்ணிக்கை அதிகரிப்பு :

இந்த 2026ஆம் ஆண்டு வெற்றியாளர்களின் எண்ணிக்கை 50-ஆக உயர்ந்துள்ளது. இதில் ஒவ்வொரு பிரிவிலும் தலா ஐந்து ஆண்கள் மற்றும் ஐந்து பெண்கள் வெற்றியாளர்களாகத் தேர்ந்தெடுக்கப்பட்டனர். 

இப்போட்டிக்கான மொத்தப் பரிசுத் தொகை 10 புள்ளி 26 மில்லியன் சவுதி ரியால்கள் (இந்திய சுமார் மதிப்பில் 26 கோடியே 21 லட்சத்து 43 ஆயிரம் ரூபாய்) ஆகும். இது புனித குர்ஆனுக்கும் அதைச் சார்ந்த மக்களுக்கும் சேவை செய்வதில் இப்போட்டி வகிக்கும் முக்கியப் பங்கை மற்றும் அதன் உலகளாவிய முக்கியத்துவத்தை அடிக்கோடிட்டுக் காட்டுகிறது.

- எஸ்.ஏ.அப்துல் அஜீஸ்