பழமையான சுபான் பேக்கரியின் கதை....!

 " உலகம் முழுவதும் பயணிக்கும் ஹைதராபாத் பிஸ்கட் "

 - 75 ஆண்டுகள் பழமையான சுபான் பேக்கரியின் கதை -

தெலுங்கானா மாநிலம் ஹைதராபாத் நாம்ப்பள்ளி  சாலையில் செல்லும்போது, ​​புகழ்பெற்ற  சுபான் பேக்கரிக்குச் செல்லாமல் கடந்து செல்வது சாத்தியமற்றது. ஏனெனில், அங்குள்ள புதிய பிஸ்கட் மற்றும் ரொட்டியின் நறுமணம் உங்களை உள்ளே இழுக்கும். உள்ளே நுழைந்ததும், காற்றில் கலந்திருக்கும் வெண்ணெய் கலந்த இதமான நறுமணமும், கவுண்டர்களில் இருந்து வெளியே வரும் புதிதாகத் தயாரிக்கப்பட்ட பேக்கரி பொருட்களின் தட்டுகளும் உங்களை வரவேற்கும். கடையைச் சுற்றிப் பார்த்தால், யாராவது ஒருவர் தங்கள் கூடையில் அந்தப் புகழ்பெற்ற சிவப்பு நிறப் பெட்டிகளை அடுக்கிக் கொண்டிருப்பதைக் காணலாம். பெரும்பாலும், விமான நிலையத்திற்குச் செல்லும் முன் பொருட்களை வாங்கிக்கொள்ளும் வெளிநாட்டில் வசிக்கும் ஹைதராபாத் வாசிகளாகவே அவர்கள் இருப்பார்கள்.

அன்பை வெளிப்படுத்தும் மொழி :

ஹைதராபாத்தில், உணவு என்பது அன்பை வெளிப்படுத்தும் மிகச்சிறந்த மொழியாகும். சுபான் பேக்கரியின் 'உஸ்மானியா பிஸ்கட்'கள் அந்த அன்பின் அதிகாரப்பூர்வ அடையாளமாக மாறியுள்ளன. சூட்கேஸ்களுக்குள் பாதுகாப்பாக வைக்கப்படும் இவை, ராஜீவ் காந்தி சர்வதேச விமான நிலையத்திலிருந்து சவூதி அரேபியா, இங்கிலாந்து, கனடா, அமெரிக்கா மற்றும் பிற நாடுகளுக்குப் பயணிக்கின்றன. சொந்த ஊரை விட்டுத் தொலைவில் வசிக்கும் ஹைதராபாத் மக்களுக்கு, ஊருக்கு வந்து திரும்பும்போது சுபான் பேக்கரியின் உஸ்மானியா பிஸ்கட்களை எடுத்துச் செல்லாமல் அந்தப் பயணம் முழுமையடைவதில்லை.

ஆறு தலைமுறைகளாக பேக்கரி தொழில் :

சுபான் பேக்கரியின் கதை பாரம்பரியம் மற்றும் தொடர்ச்சியான வளர்ச்சியின் கதையாகும். நாம்ப்பள்ளி கடை 1951 முதல் வாடிக்கையாளர்களை வரவேற்று வந்தாலும், இக்குடும்பம் ஆறு தலைமுறைகளாக பேக்கரி தொழிலில் ஈடுபட்டு வருகிறது. "என் தாத்தா சையத் காதர், செகந்திராபாத்தில் வசித்தபோது பிரிட்டிஷ் படைப்பிரிவுக்கு ரொட்டி விநியோகம் செய்து வந்தார்," என்று இன்று பேக்கரியை நிர்வகிக்கும் நான்காம் தலைமுறை உரிமையாளர் சையத் இர்பான் கூறுகிறார். 1950-களில் அந்தக்குடும்பம் நம்பல்லியில்  தங்கள் கடையைத் தொடங்கியபோது, ​​அங்கு தயாரிக்கப்பட்ட புதிய வகை ரொட்டி விரைவில் உள்ளூர் மக்களின் அன்றாட விருப்பமான உணவாக மாறியது.

பல தசாப்தங்களாகத் தொடர்ந்து பிரபலமாக இருப்பதற்கு, காலத்திற்கேற்ப தங்களை மாற்றிக்கொள்ளும் திறனே இந்த பேக்கரியின் ரகசியமாகும். "ஒவ்வொரு சில ஆண்டுகளுக்கும் ஒருமுறை, சுபான் பேக்கரி ஒரு குறிப்பிட்ட தயாரிப்பின் மூலம் தனித்து அறியப்பட்டது," என்று சையத் இர்பான் விளக்குகிறார். "1950-களில் எங்கள் ரொட்டி மிகவும் பிரபலமாக இருந்தது. பின்னர் எங்கள் கிறிஸ்துமஸ் கேக்குகள் மற்றும் பிளம் கேக்குகள் மக்களின் விருப்பமான தேர்வாகின. அதைத் தொடர்ந்து சந்த் (chand), காரா (khara), ஃபைன் (fine) மற்றும் நிச்சயமாக உஸ்மானியா (Osmania) போன்ற பல்வேறு வகையான பிஸ்கட்டுகளின் காலம் வந்தது. 70-களில் 'பஃப்ஸ்' (puffs) பிரபலமாக இருந்தன. 80 மற்றும் 90-களில் பர்கர்கள் மற்றும் குளிர்ச்சியான பேஸ்ட்ரிகள் (cold pastries) ட்ரெண்டாகின. நாங்கள் எப்போதும் எங்கள் தயாரிப்புகளைக் காலத்தின் தேவைக்கேற்ப மாற்றியமைத்து வந்துள்ளோம்." என்று அவர் கூறி மகிழ்ச்சி அடைகிறார். 

உஸ்மானியா பிஸ்கட்டுகள் :

இன்று, பழைய காலத்துக்கே உரிய தனித்துவமான ஈர்ப்பையும் நவீன காலச் செயல்பாட்டுத் திறனையும் இணைத்துக்கொண்டு, இந்த பேக்கரி முன்னெப்போதையும் விட மும்முரமாக இயங்கி வருகிறது. உஸ்மானியா பிஸ்கட்டுகள் இவர்களின் முதன்மையான விற்பனைப் பொருளாகத் திகழ்கின்றன; அதைத் தொடர்ந்து 'தம் கே ரோட்' (Dum ke Roat), ரமலான் சிறப்பு 'ஹலீம்' (Haleem) மற்றும் மிலாதுன் நபி சிறப்பு 'பூரி' (Puri) போன்ற பருவகாலத்திற்கு ஏற்ற சிறப்புத் தயாரிப்புகளும் மக்களால் பெரிதும் விரும்பப்படுகின்றன. அன்றாடத் தேவைக்கான சிறிய அளவிலான ஆர்டர்கள் முதல், குஜராத்தில் நடைபெற்ற போரா  சமூகத்தினரின் ஒன்றுகூடலுக்காக அண்மையில் பெறப்பட்ட 2 புள்ள 4 டன் அளவிலான மிகப்பெரிய ஆர்டர் வரை, பல்வேறு அளவிலான ஆர்டர்கள் இவர்களுக்கு வருகின்றன.

=====================

"1951 முதல் வாடிக்கையாளர்களை வரவேற்று வரும் சுபான் பேக்கரியின் கதை, பாரம்பரியம் மற்றும் தொடர்ச்சியான வளர்ச்சியின் கதையாகும். ஹைதராபாத்தின் 75 ஆண்டுகள் பழமையான இந்த பேக்கரியில் உலகம் முழுவதும் பயணிக்கும் சிறப்பு பிஸ்கட் உள்ளது"

=====================

ஹைதராபாத்தில், அன்பையும் அக்கறையையும் வெளிப்படுத்த 'சுபான்' பிஸ்கட் பெட்டியை எடுத்துச் செல்வது ஒரு வழக்கமான விஷயமாகும். தனது காலை நடைப்பயிற்சி நண்பர் ஒருவரைப் பற்றிய நெகிழ்ச்சியான மற்றும் வேடிக்கையான கதையை உரிமையாளர் இர்பான் பகிர்ந்துகொள்கிறார்: "அவரது உடல்நலம் குன்றிய மனைவியைப் பார்க்க வருபவர்கள் அனைவரும் நல்லெண்ண அடிப்படையில் 'சுபான்' நிறுவனத்தின் 'உஸ்மானியா' பிஸ்கட்டுகளை வாங்கி வந்ததால், அவரது வீடு முழுவதும் அந்த பிஸ்கட்டுகளாகவே நிறைந்திருந்ததாக அவர் என்னிடம் குறைபட்டுக் கொண்டார். எங்கள் பிஸ்கட்டுகளுக்கு மக்கள் மத்தியில் அப்படி ஒரு மவுசு இருக்கிறது." என்றும் அவர் ஆனந்தம் அடைகிறார். 

அசல் உஸ்மானியா பிஸ்கட்டின் ரகசியம் :

ஹைதராபாத் முழுவதும் பல பேக்கரிகள் உஸ்மானியா பிஸ்கட்டுகளைத் தயாரித்தாலும், சுபான் பேக்கரியின் பிஸ்கட்டுகள் ஒரு தனித்துவமான இடத்தைப் பிடித்துள்ளன. அதனால் மக்கள் மீண்டும் மீண்டும் அங்கு செல்கிறார்கள். அந்தத் தனித்துவமான சுவை, முந்தைய தலைமுறையினர் பல ஆண்டுகளாக மிகுந்த ஆர்வத்துடன் மேற்கொண்ட தொடர்ச்சியான முயற்சிகள் மற்றும் மாற்றங்களின் விளைவாக உருவானது.

"நான் 5 வயதிலிருந்தே இந்த பேக்கரிக்குச் சென்று வருகிறேன். அப்போதிலிருந்தே, என் தந்தை சையத் சுபான் இந்த பிஸ்கட்டுகளைத் தயாரிப்பதில் மிகுந்த ஆர்வம் காட்டுவதை நான் பார்த்திருக்கிறேன்," என்று இர்பான் கூறுகிறார். "புதிய செய்முறைகளை (recipes) முயற்சிப்பதில் அவருக்கு மிகுந்த விருப்பம் இருந்தது. அவர் பிஸ்கட்டில் 'அமுல்' (Amul) சீஸ் சேர்ப்பது எனக்கு நன்றாக நினைவிருக்கிறது. அது பிஸ்கட்டிற்கு சீஸ் சுவையையும், லேசான உப்புத்தன்மையையும், மென்மையான தன்மையையும் அளித்தது." என்றும் அவர் தெரிவிக்கிறார். இக்குடும்பத்தினர் 2001-ஆம் ஆண்டில் தற்போதைய செய்முறையை இறுதி செய்தனர். இது சுவைக்கான ஒரு மிக உயர்ந்த தரநிலையை (gold standard) உருவாக்கியது. 

வாடிக்கையாளர்களின் பாராட்டு :

ஹைதராபாத்வாசியான அரிபா ஃபாத்திமாவுக்கு, இதற்கு ஈடு இணையே இல்லை. "பல ஆண்டுகளாக இதன் தரம் மாறாமல் அப்படியே இருக்கிறது. நாங்கள் இந்தியாவில் இல்லாதபோது பலமுறை வீட்டிலேயே உஸ்மானியா பிஸ்கட்டுகளைச் செய்ய முயன்றிருக்கிறோம். அப்போது 'சுபான் பேக்கரி பிஸ்கட் போலவே இருக்கிறது' என்று சொல்லப்படுவதே எங்களுக்குக் கிடைக்கும் மிகப்பெரிய பாராட்டு." என்று ஃபாத்திமா மகிழ்ச்சி அடைகிறார். 

மற்றொரு விசுவாசமான வாடிக்கையாளரான அஃபிஃபாவிற்கு, இந்தச் சுவை குடும்பப் பழைய நினைவுகளைத் தருகிறது. “அதன் அசல் சுவைதான் என்னை மீண்டும் மீண்டும் வர வைக்கிறது. என் பாட்டிக்கு அதன் மென்மையான தன்மையும், லேசான உப்புச் சுவையும் மிகவும் பிடிக்கும் என்பதால், அதை வாங்கும்படி அவர் எப்போதும் எங்களிடம் கூறுவார்.”

28 வயதான சையத் முதாசிர் அலி, தன் தந்தையின் வழக்கத்தை நினைவுகூர்கிறார்.  “என் அப்பா தன் வாழ்நாளின் பெரும்பகுதியை சவூதி அரேபியாவில் கழித்துள்ளார். அவர் ஹைதராபாத் வரும் ஒவ்வொரு முறையும், ஜித்தாவிற்குத் திரும்பும் வழியில், அவருக்காக மட்டுமல்லாமல், அவருடைய நண்பர்களுக்காகவும் குறைந்தது 3 முதல் 4 பெட்டி பிஸ்கட்டுகளை எடுத்துச் செல்வார்.”

இங்கிலாந்துக்குச் செல்லும்போது, “எங்கள் பயணப் பையில் 4 பெரிய பெட்டிகளை எடுத்துச் செல்வது கட்டாயம்” என்று அஃபிஃபா குறிப்பிடுகிறார். அதே சமயம், “8 முதல் 10 பெட்டி உஸ்மானியா பிஸ்கட்டுகளும் தம் கே ரோத்தும் கட்டாயம்” என்று அரிபா ஃபாத்திமா கூறுகிறார்.

இந்தியாவுக்குள் இடம் பெயர்ந்தால்கூட இதே ஏக்கம் ஏற்படுகிறது. பெங்களூருவில் வசிக்கும் மர்சியா அலி, கர்நாடகாவிற்கு 5 முதல் 6 பெட்டிகளை எடுத்துச் செல்கிறார்: “நான் பெங்களூருக்கு வந்ததிலிருந்து, பிஸ்கட்டுகளை எவ்வளவு மிஸ் செய்கிறேன் என்பதை உணர்ந்தேன். அது எனக்கு வீட்டைப் போன்ற ஓர் இடம்.” இப்படி பல வாடிக்கையாளர்களின் பாராட்டை சுபான் பேக்கரி பெற்று வருகிறது. 

நவீனமயமான பேக்கரி :

தங்கள் தயாரிப்புகள் சரக்குப் பெட்டிகளில் ஆயிரக்கணக்கான மைல்கள் பயணிக்கின்றன என்பதை அறிந்த சுபான் பேக்கரி, தங்கள் செயல்பாடுகளை நவீனமயமாக்கியது. "நாங்கள் புதிய அடுப்புகளை வாங்கியுள்ளோம். மேலும் கைகளால் தொடப்படாமல் இருப்பதற்காக ரோபோட்டிக் பேக்கேஜிங்கைப் பயன்படுத்துகிறோம்," என்று இர்பான் விளக்குகிறார். மிக முக்கியமாக, அவர்கள் அந்தப் பெட்டியை மறுவடிவமைக்க ஆறு மாதங்கள் செலவிட்டனர், "சர்வதேசப் பயணங்களில் பிஸ்கட்கள் எளிதில் நசுங்காமல் இருப்பதற்காக, நாங்கள் அவற்றைத் தனித்தனியாக பேக் செய்கிறோம்." இந்தக் கவனமான வடிவமைப்பின் காரணமாக, நம்பள்ளியில் சுடப்பட்ட ஒரு உடையக்கூடிய பிஸ்கட், லண்டன், ஜித்தா அல்லது பெங்களூருவில் உள்ள தேநீர் மேசைகளுக்குப் பழுதின்றிச் சென்று சேர்கிறது.

நன்றி : சியாசத் உர்தூ நாளிதழ்

தமிழில் : எஸ்.ஏ.அப்துல் அஜீஸ்