பருந்து ஏல விற்பனை.....!

 சவூதி அரேபியாவில் 115 கோடி ரூபாய்க்கு பருந்து ஏல விற்பனை 

சவூதி அரேபியாவின் ரியாத்திற்கு வடக்கே உள்ள மல்ஹாமில் அமைந்துள்ள மையத்தின் தலைமையகத்தில் ஒவ்வொரு ஆண்டும் பருந்து ஏலம்  நடைபெறுகிறது. இது தொலைக்காட்சி மற்றும் சமூக ஊடகங்களில் ஒளிபரப்பப்படுகிறது.  கடந்த 2020-இல் தொடங்கப்பட்ட இந்த ஏலத்தில், 102 பருந்துகள் மூலம் 10 மில்லியன் சவூதி ரியால்  வருவாய் ஈட்டப்பட்டது.

அந்த வகையில் 'தேசிய ஃபால்கன் மையம்' (National Center for Falcons), உள்ளூரில் பிடிக்கப்பட்ட பருந்துகளுக்கான ஏழாவது வருடாந்திர ஏலத்தை அக்டோபர் 1 முதல் நவம்பர் 30 வரை ரியாத்தில் நடத்தவுள்ளது. 2020 முதல் 455 பருந்துகள் விற்கப்பட்டதன் மூலம் இந்த ஏலம் சுமார் 45 புள்ளி 3 மில்லியன் சவூதி ரியால் (12 மில்லியன் டாலர்) வருவாயை ஈட்டியுள்ளது. மேலும் இது நாடு முழுவதிலுமிருந்து நூற்றுக்கணக்கான பருந்து வளர்ப்பாளர்களைத் தொடர்ந்து ஈர்த்து வருகிறது.

புள்ளிவிவரங்களில் தகவல் :

2020-இல் தொடங்கப்பட்ட இந்த ஏலத்தில், 102 பருந்துகள் மூலம் 10 மில்லியன் சவூதி ரியால் வருவாய் கிடைத்தது. 2021-இல், 237 பருந்து வளர்ப்பாளர்கள் பங்கேற்க, 95 பருந்துகள் மூலம் 8 புள்ளி 3 மில்லியன் சவூதி ரியால் வருவாய் ஈட்டப்பட்டது. 2022-இல், 81 பருந்துகள் மூலம் மொத்தம் 7 புள்ளி 1 மில்லியன் சவூதி ரியால் விற்பனை நடைபெற்றது. 2023-இல், 278 பருந்து வளர்ப்பாளர்கள் பங்கேற்க, 87 பருந்துகள் ஏலத்திற்கு விடப்பட்டு 7 புள்ளி 4 மில்லியன் சவூதி ரியால் வருவாய் கிடைத்தது. 2024-ஆம் ஆண்டு ஏலத்தில், நாடு முழுவதும் உள்ள 30 இடங்களிலிருந்து கொண்டுவரப்பட்ட 50 பருந்துகள் இடம்பெற்றன.

===================

"ரியாத்திற்கு வடக்கே மல்ஹாம் பகுதியில் அமைந்துள்ள மையத்தின் தலைமையகத்தில் இந்த ஏலம் நடைபெறுகிறது. இது தொலைக்காட்சி மற்றும் சமூக ஊடகங்கள் வாயிலாக ஒளிபரப்பப்படுகிறது"

===================

 இதன் மூலம் சுமார் 6 மில்லியன் சவூதி ரியால் வருவாய் ஈட்டப்பட்டது. 2025-ஆம் ஆண்டு நிகழ்வில், 119 பருந்து வளர்ப்பாளர்கள் பங்கேற்க, 40 பருந்துகள் மொத்தம் 6 புள்ளி 4 மில்லியன் சவூதி ரியாலுக்கு விற்கப்பட்டன.

அரிய வகை பருந்து :

இந்த ஏலமானது, சவூதி அரேபியாவில் பிடிக்கப்பட்ட, வலசை வரும் இளம் 'பெரெக்ரின் ஃபால்கன்' (Peregrine falcon) வகை பருந்துகளுக்காக (இவை 'ஷாஹீன் பஹ்ரி' என்று அழைக்கப்படுகின்றன) பிரத்யேகமாக நடத்தப்படுகிறது. பருந்து பிடிக்கும் பருவத்தில், பிடிப்பவர்களை வரவேற்கவும், ஏலத்திற்குப் பருந்துகளைக் கொண்டு செல்ல உதவவும் மையத்தின் களக் குழுக்கள் நாடு முழுவதும் பணியில் ஈடுபடுத்தப்படுகின்றன. மேலும், அவர்கள் போக்குவரத்து மற்றும் தங்குமிட வசதிகளை வழங்குவதோடு, விற்பனை தொடர்பான விவரங்களையும் பதிவு செய்கின்றனர்.

- எஸ்.ஏ.அப்துல் அஜீஸ்