அரண்மனைகளில் உருவான ஒரு பேரரசு....!

 " அரண்மனைகளில் உருவான ஒரு பேரரசு "

புதிய சவூதி அரசு வளர்ச்சியடைந்தபோது, ​​அதன் மிக முக்கியமான பல நிகழ்வுகள் தலைமைத்துவம், நிர்வாகம் மற்றும் ராஜதந்திரத்தின் மையங்களாகத் திகழ்ந்த அரண்மனைகளுக்குள்ளேயே அரங்கேறின.

அவை அரச குடும்பத்தினரின் இருப்பிடங்களாக மட்டுமல்லாமல், வளர்ந்து வரும் ஒரு நாட்டின் செயல்பாட்டு மையங்களாகவும் விளங்கின.

ரியாத்தில் உள்ள அல்-முரப்பா அரண்மனை, ஜித்தாவில் உள்ள குசாம் அரண்மனை மற்றும் தலைநகரில் உள்ள 'ரெட் பேலஸ்' (சிவப்பு அரண்மனை) ஆகியவற்றில், அரச வாழ்க்கைக்கும் அரசு நிர்வாகப் பணிகளுக்கும் இடையிலான பிணைப்பு காணப்பட்டது. அங்கு முக்கிய முடிவுகள் எடுக்கப்பட்டன/ அதிகாரிகள் மற்றும் குடிமக்கள் வரவேற்கப்பட்டனர்/ வெளிநாட்டு விருந்தினர்கள் உபசரிக்கப்பட்டனர் மற்றும் நாட்டின் விரிவடைந்து வந்த பொறுப்புகள் நிர்வகிக்கப்பட்டன.

இவை அனைத்தும் இணைந்து, சவூதி அரேபியாவின் வளர்ச்சியில் ஒரு முக்கிய காலகட்டத்தின் கட்டடக்கலைச் சான்றாகத் திகழ்கின்றன. 

அல்-முரப்பா அரண்மனை :

அவற்றில் அல்-முரப்பா அரண்மனை மிகவும் குறிப்பிடத்தக்க ஒன்றாகும்.

பழைய ரியாத் நகரின் எல்லைச் சுவர்களுக்கு வெளியே இதனை அமைக்குமாறு மன்னர் அப்துல்அஜீஸ் பின் அப்துல்ரஹ்மான் அல் சவூத் உத்தரவிட்டார். இது, வரலாற்றுச் சிறப்புமிக்க மையப்பகுதியைத் தாண்டி விரிவடையத் தொடங்கிய தலைநகரின் வளர்ச்சியைப் பிரதிபலிப்பதாக அமைந்தது.

இந்த அரண்மனை வளாகம், மன்னர் அப்துல்அஜீஸின் ஆட்சியின் பிந்தைய ஆண்டுகளில் அவருடனும், நாட்டின் நிர்வாகத்துடனும் நெருங்கிய தொடர்புடையதாக மாறியது.

இருப்பினும், அல்-முரப்பா வெறும் அரசு நிர்வாகம் சார்ந்த இடமாக மட்டும் இருக்கவில்லை.

அது ஒரு இல்லமாகவும் திகழ்ந்தது.

மன்னர் அப்துல்அஜீஸின் குடும்ப உறுப்பினர்கள் பாதுகாத்து வைத்துள்ள நினைவுகள் அங்குள்ள வாழ்க்கையைப் பற்றிய காட்சிகளை வழங்குகின்றன. இதனால், நாட்டின் நிறுவனரின் பொது மற்றும் தனிப்பட்ட வாழ்க்கை அம்சங்கள் சங்கமிக்கும் ஒரு அரிய இடமாக இந்த அரண்மனை விளங்குகிறது.

மன்னர் அப்துல்அஜீஸ் அரண்மனை :

அல்-முரப்பாவில் உள்ள மன்னர் அப்துல்அஜீஸ் அரண்மனை.

ஜித்தாவில் உள்ள குசாம் அரண்மனையும், உருவாகிக்கொண்டிருந்த அந்தப் பேரரசில் மற்றொரு முக்கிய இடத்தைப் பிடித்திருந்தது.

இந்நகரில் தங்கியிருந்த காலங்களில் மன்னர் அப்துல்அஜீஸ் இந்த அரண்மனையைப் பயன்படுத்தினார். மேலும் இது அதிகாரப்பூர்வ சந்திப்புகள் மற்றும் விருந்தினர்களை வரவேற்கும் இடமாகவும் திகழ்ந்தது.

காலப்போக்கில் இதன் கட்டடக்கலை பாணி நாடு முழுவதும் அறியப்பட்ட ஒரு அடையாளமாக மாறியது.

'தாரா' (Darah) என்று அழைக்கப்படும் 'ஆராய்ச்சி மற்றும் ஆவணங்களுக்கான மன்னர் அப்துல்அஜீஸ் அறக்கட்டளை'யின் பதிவுகளின்படி, 1955-ல் வெளியிடப்பட்ட சவூதி காகித நாணயத்தில் குசாம் அரண்மனையின் பிரதான நுழைவாயில் இடம்பெற்றிருந்தது.

அந்தப் படம் மிகவும் பொருத்தமானதாக அமைந்திருந்தது: பேரரசின் உருவாக்கக் காலத்துடன் தொடர்புடைய ஒரு முக்கிய அடையாளம், நாடு முழுவதும் கொண்டு செல்லப்படும் ஒரு தேசியச் சின்னமாகவும் மாறியிருந்தது.

சிவப்பு அரண்மனை :

ரியாத்தில் உள்ள 'ரெட் பேலஸ்' (சிவப்பு அரண்மனை) இந்த வளர்ச்சியின் மற்றொரு கட்டத்தைப் பிரதிபலித்தது.

மன்னர் அப்துல்அஜீஸின் ஆட்சிக்காலத்தில் கட்டப்பட்டதும், இளவரசர் சவூத் பின் அப்துல்அஜீஸுடன் தொடர்புடையதுமான இந்த அரண்மனை, பின்னர் முக்கிய அதிகாரப்பூர்வ பணிகளை மேற்கொண்டது. ஒரு கட்டத்தில் அரச சபையாகச் (Royal Court) செயல்பட்ட இந்த அரண்மனை, அரச விருந்தினர்களை வரவேற்றதுடன், பின்னர் அமைச்சர்கள் சபையின் செயலகமாகவும் பயன்படுத்தப்பட்டது.

====================

"ரியாத்தில் உள்ள அல்-முரப்பா அரண்மனை, ஜித்தாவில் உள்ள குசாம் அரண்மனை மற்றும் தலைநகரில் உள்ள 'ரெட் பேலஸ்' (சிவப்பு அரண்மனை) ஆகியவற்றில், அரச வாழ்க்கைக்கும் அரசு நிர்வாகப் பணிகளுக்கும் இடையிலான பிணைப்பு காணப்பட்டது"

====================

அது வெளிநாட்டுத் தலைவர்களையும் பிரமுகர்களையும் வரவேற்று, வளர்ந்து வரும் இராச்சியத்தின் இராஜதந்திர வாழ்வில் தன்னை நிலைநிறுத்திக் கொண்டது.

அந்த மூன்று அரண்மனைகளும் வெவ்வேறு வரலாறுகளைக் கொண்டிருந்தன. ஆனால் அவை அனைத்தும் சேர்ந்து, அரசைக் கட்டியெழுப்புவதில் கட்டடக்கலை எவ்வாறு துணை நின்றது என்பதை நிரூபிக்கின்றன.

கற்பனை செய்ய முடியாத களங்கள் :

ரியாத் விரிவடைந்தபோது, அல்-முரப்பா பழைய நகரச் சுவர்களுக்கு அப்பால் ஒரு புதிய அரச மற்றும் நிர்வாக மையமாக விளங்கியது.

ஜித்தா இராச்சியத்தின் உலகத்திற்கான நுழைவாயிலாகச் செயல்பட்டபோது, குஸாம் அரச மற்றும் உத்தியோகபூர்வ விவகாரங்களுக்கான ஒரு களமாக மாறியது.

மேலும், அரசாங்க நிறுவனங்கள் வளர்ந்தபோது, செம்மண்டபம் பெருகிவரும் ஒழுங்கமைக்கப்பட்ட அரசு அமைப்பின் ஒரு பகுதியாக மாறியது.

இறுதியில், சவூதி அரசாங்கம் அந்த ஆரம்ப தசாப்தங்களில் கற்பனை செய்ய முடியாத அளவில் அமைச்சகங்கள், தலைமையகங்கள் மற்றும் சிறப்பு நிறுவனங்களாக விரிவடைந்தது.

ஆனால் சில அடித்தளங்கள் இந்த இடங்களில்தான் இடப்பட்டன.

எனவே, அவற்றின் முக்கியத்துவம் அவற்றின் சுவர்கள், வாயில்கள் மற்றும் முற்றங்களை விடப் பெரியது.

அவை தலைமைத்துவம் வெளிப்படுத்தப்பட்ட, இராஜதந்திரம் நடத்தப்பட்ட மற்றும் ஒரு இளம் இராச்சியத்தின் விவகாரங்கள் முன்னெடுக்கப்பட்ட இடங்களைக் குறிக்கின்றன.

கிட்டத்தட்ட ஒரு நூற்றாண்டுக்குப் பிறகும், நவீன சவூதி அரேபியா உருவாகி வந்த காலகட்டத்தின் கட்டிடக்கலைச் சின்னங்களாக அவை திகழ்கின்றன.

- எஸ்.ஏ.அப்துல் அஜீஸ்