சவூதி தேசிய தினம்....!

 சவூதி தேசிய தினம்: 

பாரம்பரியத்தின் கொண்டாட்டம்

1932-ஆம் ஆண்டில் சவூதி அரேபிய இராச்சியம் வரலாற்றுச் சிறப்புமிக்க வகையில் ஒன்றிணைக்கப்பட்டதைக் குறிக்கும் வகையில், ஒவ்வொரு ஆண்டும் செப்டம்பர் 23 அன்று சவூதி தேசிய தினம் கொண்டாடப்படுகிறது. நஜ்த், ஹிஜாஸ் மற்றும் பிற பகுதிகளை ஒன்றிணைத்து சவூதி அரேபிய இராச்சியத்தை உருவாக்கிய மன்னர் அப்துல்அஜிஸ் இப்ன் சவூதின் ஆணையை இந்நாள் நினைவுகூருகிறது. மேலும் 2005-ஆம் ஆண்டு முதல் இந்நாள் அதிகாரப்பூர்வ பொது விடுமுறை நாளாகக் கடைபிடிக்கப்பட்டு வருகிறது.

களைகட்டிய கொண்டாட்டங்கள் :

சவூதி தேசிய தினத்தின்போது ஜித்தா, ரியாத் உள்ளிட்ட பல நகரங்களில் கொண்டாட்டங்களுக்கு சிறிதும் குறைவு இருப்பதில்லை. பச்சை நிற அலங்காரங்கள் மற்றும் சவூதி தேசியக் கொடிகள் பறக்கும் கார்கள் முதல் குடும்ப ஒன்றுகூடல்கள், பாரம்பரிய உணவுகள் மற்றும் தலைமுறைகளுக்கு இடையே பகிரப்படும் கதைகள் வரை, செப்டம்பர் 23ஆம் தேதி புதன்கிழமையன்று கொண்டாடட்டங்கள் களைகட்டி இருந்தன. சவூதி தேசிய தினம் அந்நாட்டின் பல்வேறு சமூகத்தினரையும் கொண்டாட்டத்தில் ஒன்றிணைத்தது. 

"கிங் அப்துல்அஜிஸ் சாலையில் என் கார் போக்குவரத்து நெரிசலில் சிக்கிக்கொள்ளும் அந்தத் தருணம்தான் எனக்கு மிகவும் பிடித்தமானது," என்று ஜித்தாவைச் சேர்ந்த கடல்சார் பொறியாளரான 28 வயது மொஹன்னத் கரோட் கூறி மகிழ்ச்சி அடைகிறார்.. "கொண்டாட்டங்களை ரசிக்கவும், மற்றவர்கள் தங்கள் கார்களை எவ்வாறு அலங்கரித்துள்ளார்கள் என்பதைப் பார்க்கவும் மக்கள் தங்கள் வீடுகளை விட்டு வெளியே வருகிறார்கள். ஒவ்வொருவரும் தங்கள் சொந்த பாணியில் கொண்டாடுகிறார்கள்."  என்றும் அவர் ஆனந்தம் அடைகிறார்.

தனித்துவமான கலாச்சாரம் :

ஜாசான் நகரில், தேசியப் பெருமித உணர்வும் அப்பகுதிக்கே உரித்தான தனித்துவமான கலாச்சார பாரம்பரியமும் கொண்டாட்டங்களில் ஒன்றிணைகின்றன என்று நான்கு குழந்தைகளின் தாயான 36 வயது நஹ்லா ஜமீம் கூறினார். "தெருக்களும் கடற்கரை ஓரங்களும் பச்சை நிறத்தால் ஜொலிக்கின்றன," என்று அவர் குறிப்பிட்டார்.

================

"1932-ஆம் ஆண்டில் சவூதி அரேபிய இராச்சியம் வரலாற்றுச் சிறப்புமிக்க வகையில் ஒன்றிணைக்கப்பட்டதைக் குறிக்கும் வகையில், ஒவ்வொரு ஆண்டும் செப்டம்பர் 23 அன்று சவூதி தேசிய தினம் கொண்டாடப்படுகிறது"

================

ரியாத்தைச் சேர்ந்த மாணவர் அப்துல்லா அல்-ஓதைம், "ஒரே தலைமுறைக்குள் இந்த நாடு அடைந்துள்ள மிகப்பெரிய மாற்றமே என்னை மிகவும் ஈர்க்கிறது. இன்றைய சவூதி அரேபியாவை மட்டுமே இளைய தலைமுறையினர் அறிந்திருக்கிறார்கள். எனவே, அதற்கு முந்தைய நிலை எப்படி இருந்தது என்பது பற்றிய எந்தப் புரிதலும் அவர்களுக்கு இல்லை," என்று கூறி, சவூதி அரேபியாவின் வரலாறு குறித்து இளம் தலைமுறையினர் அறிந்துகொள்ள ஆர்வத்தை தூண்டுகிறார். 

சிறப்பு உணவு வகைகள் :

உணவகங்கள் சிறப்பு உணவு வகைகளையும் பச்சை மற்றும் வெள்ளை நிறத்திலான படைப்புகளையும் வழங்கும் அதே வேளையில், அல்-கோபாரைச் சேர்ந்த சமையல் கலை மாணவியான லாமா அலிட்ரிஸ்ஸி "உணவு மூலமாகவே கொண்டாட" உள்ளதாக 'தெரிவித்தார். "எனது படிப்பின் ஒரு பகுதியாக, பாரம்பரிய சுவைகளை நவீன வடிவத்திற்குக் கொண்டுவரும் வகையில், ஹிஜாஸி சுவைகளால் ஈர்க்கப்பட்ட ஒரு மேம்படுத்தப்பட்ட சவூதி இனிப்பு வகையை நான் உருவாக்கி வருகிறேன்." என்றும் அவர் மகிழ்ச்சியுடன் தெரிவிக்கிறார். 

- எஸ்.ஏ.அப்துல் அஜீஸ்