புதிய ஹஜ் பயணத் தொகுப்பு...!

 சர்வதேச ஹஜ் பயணிகளுக்காக புதிய ஹஜ் பயணத் தொகுப்பு

சவூதி அரேபியா அரசு அறிமுகம்

ரியாத், செப்.29- வரும் 2027-ஆம் ஆண்டு ஹஜ் பருவத்திற்கு முன்னதாக, சர்வதேச ஹஜ் பயணிகளுக்காக ஒருங்கிணைந்த தொகுப்பு ஒன்றை சவூதி அரேபியாவின் ஹஜ் மற்றும் உம்ரா அமைச்சகம், செப்டம்பர் 28, திங்கள்கிழமையன்று அறிமுகப்படுத்தியுள்ளது. இது முக்கிய சேவைகளை ஒரே தொகுப்பின் கீழ் கொண்டு வருகிறது.

புதிய தொகுப்பு அறிமுகம் :

ஹிஜ்ரி 1448ஆம் ஆண்டிற்கான  ஹஜ் ஏற்பாடுகளை சவூதி அரேபியாவின் ஹஜ் மற்றும் உம்ரா அமைச்சகம் முழுவீச்சில் தொடங்கியுள்ளது. இத்தகைய சூழ்நிலையில், சர்வதேச ஹஜ் பயணிகளின் வசதிக்காக ஒருங்கிணைந்த தொகுப்பு ஒன்றை சவூதி அரேபிய அரசு அறிமுகம் செய்துள்ளது. இத்தொகுப்பு நான்கு முக்கிய சேவைகளை உள்ளடக்கியது. புனிதத் தலங்களில் வழங்கப்படும் சேவைகள், மக்கா மற்றும் மதீனாவில் விருந்தோம்பல் வசதிகள், போக்குவரத்து மற்றும் தங்குமிடம் ஆகிய சேவைகள் வழங்கப்படும் என அறிவிக்கப்பட்டுள்ளது. 

ஒரே விண்ணப்பத்தைப் பயன்படுத்தி எலக்ட்ரானிக் பாத் (Electronic Path) தளத்தின் மூலம் ஒப்பந்தப் பணிகள் மின்னணு முறையில் மேற்கொள்ளப்படும். ஹஜ் விவகார அலுவலகங்கள், சர்வதேச ஹஜ் முகமைகள் மற்றும் சேவை வழங்குநர்களுக்கு இடையிலான ஒப்பந்தங்களில் நடைமுறைகளை எளிதாக்கவும், வெளிப்படைத்தன்மையை மேம்படுத்தவும் இந்த அமைப்பு வடிவமைக்கப்பட்டுள்ளது.

முக்கிய அம்சங்கள் :

கூடுதல் விருப்பச் சேவைகளைச் சேர்க்கவும், பல்வேறு குழுக்களாக உள்ள யாத்ரீகர்களின் விருப்பங்களுக்கு ஏற்ப நிகழ்ச்சிகளை வடிவமைக்கவும் இந்தத் தொகுப்பு முகமைகளுக்கு வாய்ப்பளிக்கிறது. 2027 ஹஜ் பருவத்திற்கான முன்கூட்டியே மேற்கொள்ளப்படும் தயாரிப்புகளின் ஒரு பகுதியாகவும், யாத்ரீகர்களுக்கான சேவைகளை மேம்படுத்தும் முயற்சியாகவும் இந்தத் திட்டம் அமைந்துள்ளதாக ஹஜ் மற்றும் உம்ரா அமைச்சகம் தெரிவித்துள்ளது. மேலும், இது 'சவூதி விஷன் 2030' மற்றும் 'இறைவனின் விருந்தினர்கள் சேவைத் திட்டம்' ஆகியவற்றின் நோக்கங்களுக்கும் ஆதரவளிக்கிறது.

2027-ஆம் ஆண்டிற்கான ஹஜ் பயணம் மே 14 முதல் மே 19, 2027 வரை, அதாவது ஹிஜ்ரி 1448  துல் ஹஜ் மாதம் 8 முதல் 13-ஆம் தேதி வரை நடைபெறும் என்று எதிர்பார்க்கப்படுகிறது. அரஃபா தினம் மே 15, 2027 அன்று அமையும் என்று கணிக்கப்பட்டுள்ளது. பிறை தெரிவதைப் பொறுத்தே இந்தத் தேதிகள் அதிகாரப்பூர்வமாக உறுதி செய்யப்படும் என்பது குறிப்பிடத்தக்கது. 

- சிறப்புச் செய்தியாளர் : எஸ்.ஏ.அப்துல் அஜீஸ்