உர்தூ மொழியும், தமிழ்நாடு உர்தூ அகாடமியும் - சிறப்பு நேர்காணல்...!

 " உர்தூ மொழியும், தமிழ்நாடு உர்தூ அகாடமியும் " 

தமிழகத்தில் உர்தூ மொழியை பிரபலப்படுத்த 

செய்யும் பணிகள் என்ன?

தமிழ்நாடு உர்தூ அகாடமி 

துணைத் தலைவர்  

முனைவர் நயீமூர் ரஹ்மான் 

சிறப்பு நேர்காணல் 

இந்திய முஸ்லிம்கள் அதிகம் பேசும் மொழிகளில் உர்தூ மொழியும் ஒன்றாக இருந்து வருகிறது.  தமிழ்நாட்டில், சென்னை, வேலூர், ராணிப்பேட்டை, திருப்பத்தூர், கிருஷ்ணகிரி, தருமபுரி, காஞ்சிபுரம், செங்கல்பட்டு, திருவள்ளூர், கடலூர் மற்றும் திருச்சி ஆகிய மாவட்டங்களில் வாழும் முஸ்லிம்களில், பெரும்பாலானோரின் தாய் மொழியாக உர்தூ இருந்து வருகிறது.  இத்தகைய சூழ்நிலையில், பாரம்பரியம் மற்றும் கலாச்சாரப் பெருமைக் கொண்ட உர்தூ மொழியின் மேன்மையை கட்டிக் காக்கும் வகையில், மறைந்த முன்னாள் முதலமைச்சர் கலைஞர் கருணாநிதி அவர்களின் ஆட்சிக் காலத்தில் கடந்த 2000ஆம் ஆண்டில் தமிழ்நாடு உர்தூ அகாடமி உருவாக்கப்பட்டது.  தமிழ்நாட்டில் உர்தூ மொழியைப் பாதுகாக்கவும், அதன் வளர்ச்சி மற்றும் இலக்கியப் பணிகளை ஊக்குவிக்கவும் இந்த அகாடமி தோற்றுவிக்கப்பட்டாலும், மிகப்பெரிய அளவுக்கு எந்தவிதப் பணிகளும் சிறப்பாக நடைபெறவில்லை. சில காலம் தொய்வடைந்திருந்த இந்த அகாடமி, மீண்டும் 2021ஆம் ஆண்டு முதல்  புனரமைக்கப்பட்டு, பல்வேறு பணிகளை சிறப்பாக செய்து வருகிறது. 

தமிழ்நாடு உர்தூ அகாடமியின் துணைத் தலைவராக முனைவர் நயீமூர் ரஹ்மான், கடந்த ஆறரை ஆண்டுகளாக செயல்பட்டு வருகிறார்.  இத்தகைய சூழ்நிலையில், உர்தூ அகாடமியின் பணிகள் குறித்தும், அதுகுறித்த தமிழக மக்களிடையே விழிப்புணர்வை ஏற்படுத்தும் வகையிலும் ஒரு சிறப்பு நேர்காணலை நடத்த விரும்பினோம். சென்னை காயிதே மில்லத் மகளிர் கல்லூரி வளாகத்தில் உள்ள தமிழ்நாடு உர்தூ அகாடமி அலுவலகத்தில் முனைவர் நயீமூர் ரஹ்மான் அவர்களை நேரில் சந்தித்து மணிச்சுடர் சிறப்புச் செய்தியாளர் எஸ்.ஏ.அப்துல் அஜீஸ், சிறப்பு நேர்காணல் ஒன்றை நடத்தினார். அப்போது தமிழ்நாடு உர்தூ அகாடமி குறித்து பல அரிய தகவல்கள் கிடைத்தன. அதன் முழு விவரம் இதோ உங்கள் பார்வைக்கு :

தமிழ்நாடு உர்தூ அகாடமி அலுவலகம் :

சென்னை அண்ணா சலையில் புகழ்பெற்று விளங்கிய முஹம்மதன் கல்லூரி, தற்போது காயிதே மில்லத் மகளிர் கலைக் கல்லூரியாக பெயர் மாற்றம் செய்யப்பட்டு இயங்கி வருகிறது. இந்த கல்லூரியின் வளாகத்திற்குள் நுழைந்தால், பழமையான அழகிய கட்டடக்கலையுடன் கட்டப்பட்ட கல்லூரி தென்படுகிறது. அங்குள்ள பலகையில், கடந்த 1918ஆம் ஆண்டு முதல் தற்போது வரை கல்லூரியின் முதல்வராக பணியாற்றிவர்களின் பட்டியில் இடம்பெற்றுள்ளது. இந்த சுவையான தகவல்களை அறிந்துகொண்டே, உர்தூ அகாடமி இருக்கும் அலுவலகத்தை நோக்கிச் சென்றோம். நம்மை அன்புடன் வரவேற்ற அகாடமியின் துணைத் தலைவர் முனைவர் நயீமூர் ரஹ்மான், அலுவலகத்தை சுற்றிக் காட்டினார். 

அது ஒரு சிறிய அறை என்றாலும், சிறப்பாக புனரமைக்கப்பட்டு, கருத்தரங்க அறையுடன் அலுவலகம் அமைந்து இருந்தது. மேஜையில் ஏராளமான கோப்புகள் குவிந்து கிடந்தன. மேலும், அறை முழுவதும் விதவிதமான நிறைய விருதுகள் அடுக்கி வைக்கப்பட்டு இருந்தன. அவற்றை பார்த்து வியப்பு அடைந்த நாம், தொடர்ந்து தமிழ்நாடு உர்தூ அகாடமியின் பணிகள் குறித்து நயீமூர் ரஹ்மானிடம் பேசினோம். அப்போது, கடந்த 6 ஆண்டுகளுக்கும் மேலாக நடைபெற்று வரும் பணிகள் குறித்து அவர் விரிவாக எடுத்துரைத்தார். 

பள்ளி, கல்லூரிகளில் உர்தூ மொழி :

நாட்டில் 22 மாநிலங்களில் உர்தூ அகாடமிகள் இயங்கி வருகின்றன. அந்த வகையில் தமிழ்நாட்டில், உர்தூ அகாடமி கடந்த 2000ஆம் ஆண்டு தொடங்கப்பட்டு, இயங்கி வருகிறது. இந்த அகாடமியின் துணைத் தலைவராக நான் 6 ஆண்டுகளுக்கும் மேலாக செயல்பட்டு வருகிறேன். உர்தூ மொழி ஒரு சிறப்பான எளிய இலக்கிய நயம் கொண்ட மொழி என்பதால், உர்தூ மொழி பேசும் மக்கள் அந்த மொழியில் கல்வி கற்க விரும்புகிறார்கள். எனினும், ஆசிரியர் பற்றாக்குறை, கட்டமைப்பு வசதிகள் குறைவு, வேலைவாய்ப்புகள் குறித்த கவலை உள்ளிட்ட பல காரணங்களால் உர்தூ பள்ளிகளில் மாணவர்களின் சேர்க்கை குறைந்துகொண்டே வந்தது. இடை நிற்றல் கூட அதிகமாக இருந்தது. 

இந்த பிரச்சினைக்கு தீர்வு காண முடிவு செய்து மாநகராட்சி அரசு உர்தூ பள்ளிகளில் போதிய ஆசிரியர்களை நியமிக்க நாங்கள் முயற்சிகளை மேற்கொண்டோம். இதுதொடர்பாக, தொடர்ந்து தமிழ்நாடு அரசிடம் கோரிக்கைகளை வைத்துகொண்டே இருந்தோம். அதன்படி, சென்னையில் உள்ள 23 உர்தூ பள்ளிகளில் உர்தூ ஆசிரியர்களை நியமனங்கள் நடைபெற்றன. இதன்மூலம் மாணவர்களின் சேர்க்கையும் அதிகரித்தது. உர்தூ மொழி குறித்து மாநிலம் முழுவதும் உள்ள 280 உர்தூ பள்ளிகளில் விழிப்புணர்வு நிகழ்ச்சிகளை நடத்தினோம். அதற்கு நல்ல பலன்கள் கிடைத்தன. சென்னை, காஞ்சிபுரம், வேலூர், ராணிப்பேட்டை, திருப்பத்தூர், கிருஷ்ணகிரி, தருமபுரி உள்ளிட்ட மாநிலங்களில் உர்தூ பள்ளிகளில் காலியாக இருந்த உர்தூ ஆசிரியர் பணியிடங்களை நிரப்ப நாங்கள் மேற்கொண்ட முயற்சிகள் மூலம், அங்கு படிப்படியாக உர்தூ ஆசிரியர்கள் நியமிக்கப்பட்டனர். 

=====================

"உர்தூ மொழியை சமுதாய மக்கள் மத்தியில் பிரபலப்படுத்த அகாடமி பல்வேறு சிறப்பு திட்டங்களை செயல்படுத்தி வருகிறது. தேசிய உர்தூ நாள் ஒவ்வொரு ஆண்டும் கொண்டாடப்பட்டு வருகிறது. பள்ளி, கல்லூரிகளில் உர்தூ மொழியில் சிறந்து விளங்கும் மாணவர்களுக்கு விருதுகள் வழங்கப்பட்டு வருகின்றன"

=====================

அத்துடன், உர்தூ மொழி மூலம்  கல்வி கற்பதால், என்னென்ன பயன்கள் உள்ளன? வேலைவாய்ப்புகள் எப்படி உள்ளன என்பது குறித்தும், விழிப்புணர்வை ஏற்படுத்தினோம். உர்தூ மொழி மட்டுமல்லாமல் ஆங்கிலம், தமிழ் மற்றும் கணிதம் ஆகிய பாடங்களில் உர்தூ பிரிவு மாணவர்கள் நல்ல ஆர்வம் செலுத்தும் வகையில் அந்த மொழிகள் குறித்தும் தகுந்த விழிப்புணர்வை ஏற்படுத்தினோம். இதன்மூலம் மாணவர்களின் சேர்க்கை தொடர்ந்து அதிகரித்து தொடங்கியது. 278 உர்தூ பள்ளிகளில் நிரப்பப்படாமல் இருந்த ஆசிரியர் பணியிடங்கள் 15 ஆண்டுகளுக்குப் பிறகு மீண்டும் நிரப்பப்பட்டன. உர்தூ பள்ளிகளின் தரத்தை உயர்த்தவும், கட்டமைப்பு வசதிகளை மேம்படுத்தவும் அகாடமியின் உறுப்பினர்களுடன் இணைந்து நாங்கள் தொடர்ந்து முயற்சிகளை மேற்கொண்டு வருகிறோம். 

அகாடமியின் சிறப்பு திட்டங்கள்  :

உர்தூ மொழியை சமுதாய மக்கள் மத்தியில் பிரபலப்படுத்த அகாடமி பல்வேறு சிறப்பு திட்டங்களை செயல்படுத்தி வருகிறது. அதன்படி, தேசிய உர்தூ நாள் ஒவ்வொரு ஆண்டும் கொண்டாடப்பட்டு வருகிறது. பள்ளி, கல்லூரிகளில் உர்தூ மொழியில் சிறந்து விளங்கும் மாணவர்களுக்கு விருதுகள் வழங்கப்பட்டு வருகின்றன. இதேபோன்று, சிறந்த உர்தூ ஆசிரியர்களும் கவுரவிக்கப்பட்டு வருகிறார்கள். அத்துடன், உர்தூ கவியரங்கம், உர்தூ பேச்சு போட்டி, கட்டுரை போட்டி, ஆகியவற்றை அடிக்கடி நடத்தி, மாணவர்கள் மத்தியில் உற்சாகத்தை உருவாக்கி வருகிறோம். 

வேலூர் மாவட்டம் பேரணாம்பட்டில் ஒரு உர்தூ பள்ளி நலிவடைந்து இருந்தது. அதனை சீரமைக்க அகாடமி சிறந்தமுறையில் தனது பணிகளை ஆற்றியது. அதன் காரணமாக தற்போது, அந்த பள்ளி மட்டுமல்லாமல், அந்த பகுதியே கம்பீரமாக காட்சி அளித்து வருகிறது. இதேபோன்று, உர்தூ நூலகம் ஒன்றை உருவாக்கும் முயற்சிகளையும் நாங்கள் எடுத்து வருகிறோம். நாங்கள் மேற்கொண்ட தொடர் முயற்சிகள் காரணமாக தமிழ்நாட்டில் உள்ள 17 கலைக் கல்லூரிகளில் இளநிலை உர்தூ பாடப்பிரிவு மற்றும் உர்தூ மொழியினை இரண்டாம் மொழிப்பாடமாகவோ தொடங்க அரசு அனுமதி கிடைத்துள்ளது. 

முந்தைய திமுக அரசு உர்தூ அகாடமியின் செலவினங்களுக்காக சுமார் 45 லட்சம் ரூபாய் நிதி ஒதுக்கிடு செய்தது. தற்போதை த.வெ.க. அரசு, மாநில உர்தூ அகாடமியில் உர்தூ மொழி மேம்பாட்டிற்காக ஒரு கோடி ரூபாய் நிதியை ஒதுக்கீடு செய்துள்ளது. இதன்மூலம் உர்தூ மொழி மற்றும் அதன் பண்பாட்டு மரபுகள் தொடர்பான கல்வியில் மற்றும் ஆராய்ச்சிப் பணிகள் ஊக்குவிக்கப்பட நல்ல வாய்ப்பு உருவாகியுள்ளது. 

தகுதி தேர்வுகளுக்கு பயிற்சி வகுப்புகள் :

உர்தூ மொழியின் மேம்பாட்டிற்காக நாடு முழுவதும் உள்ள 13 பல்கலைக்கழங்களில் நாங்கள் புரிந்துணர்வு ஒப்பந்தங்களை செய்துள்ளோம். அதன்மூலம் உர்தூ சான்றிதழ் படிப்பு வகுப்புகளை நடத்த வாய்ப்பு உருவாகியுள்ளது. தற்போது தேசிய அளவில் அனைத்து படிப்பு மற்றும் வேலைவாய்ப்புகளுக்கு தகுதி தேர்வு கட்டாயம் என்ற நிலை உருவாகி விட்டது. எனவே, மருத்துவம் பயில விரும்பும் மாணவர்களுக்காக அகாடமி மூலம் நீட் தேர்வு பயிற்சி வகுப்புகளை நடத்த முடிவு செய்துள்ளோம். தற்போது மாணவர்களுக்கான பேச்சுப் போட்டிகள் மற்றும் திறன் மேம்பாட்டுத் திட்டங்களைச் சிறப்பாக நடத்தி வருகிறோம்.

உர்தூ மொழியில் வெளிவந்துள்ள நூல்களை தமிழ் மொழியில் மொழிபெயர்க்க நடவடிக்கை எடுக்கப்பட்டுள்ளது. உர்தூ மொழியில் ஒரு இதழ் வெளியிடவும் முயற்சிகள் மேற்கொள்ளப்பட்டுள்ளன. உர்தூ மொழியின் மேன்மை குறித்து மக்கள் மத்தியில் விழிப்புணர்வை ஏற்படுத்தும் வகையில் கடந்த 6 ஆண்டுகளில் 50க்கும் மேற்பட்ட நிகழ்ச்சிகளை நாங்கள் நடத்தியுள்ளோம். 

தன்னம்பிகையோடு பணி :

தமிழ்நாடு உர்தூ அகாடமியில் துணைத் தலைவர் என்னையும் சேர்த்து மொத்தம் 15 பேர் உறுப்பினர்களாக இருந்து வருகிறார்கள். இவர்கள் அனைவரும் உர்தூ அகாடமியின் வளர்ச்சிக்கும் முன்னேற்றத்திற்கும் தங்களது பங்களிப்பை சிறந்தமுறையில் வழங்கி வருகிறார்கள். தற்போதைய சூழலில், தமிழ்நாடு உர்தூ அகாடமியின் முன்பு நிறைய சவால்கள் உள்ளன. ஏராளமான பணிகள் குவிந்து கிடக்கின்றன. எனினும், நாங்கள் சிறிதும் நம்பிக்கை இழக்காமல், தன்னம்பிக்கையோடு, உர்தூ மொழியின் மேன்மைக்காக தொடர்ந்து பணியாற்றி வருகிறோம். 

ஒருசில விமர்சனங்கள் இருந்தாலும், அவற்றையும் நிவர்த்தி செய்து நல்ல முறையில் அகாடமியின் பணிகள் அமைய முயற்சிகளை மேற்கொண்டு வருகிறோம். தமிழ்நாடு உர்தூ அகாடமி, நிச்சயம் தமிழ்நாட்டில் ஒரு மாற்றத்தை ஏற்படுத்தி, சிறப்பான இடத்தை பெற்று சமுதாயத்தின் பாராட்டை பெறும் என்று நாங்கள் உறுதியாக நம்புகிறோம். 

இவ்வாறு தமிழ்நாடு உர்தூ அகாடமி துணைத் தலைவர் முனைவர் நயீமூர் ரஹ்மான், அகாடமியின் பணிகள் குறித்த விரிவாக எடுத்துரைத்தார். தமிழ்நாடு உர்தூ அகாடமியின் பணிகள் மேலும் சிறப்பாக அமைய, அவரை வாழ்த்திவிட்டு விடைப்பெற்றோம். 

- சந்திப்பு : சிறப்புச் செய்தியாளர் : எஸ்.ஏ.அப்துல் அஜீஸ்