இந்திய யூனியன் முஸ்லிம் லீகின் ஆலோசனைக் கூட்டம்....!

வரும் 24ஆம் தேதி டெல்லியில் இந்திய யூனியன் முஸ்லிம் லீகின்

தேசிய நிர்வாகிகளின் ஆலோசனைக் கூட்டம் 

 தேசிய பொறுப்பாளர்கள், மாநில அமைச்சர்கள், மாநில தலைவர்கள்,

பொதுச் செயலாளர்களுக்கு

தேசிய பொதுச் செயலாளர் பி.கே.குஞ்ஞாலிக் குட்டி அழைப்பு 

முக்கிய தீர்மானங்கள் நிறைவேற்ற திட்டம்

 

புதுடெல்லி, செப்.22- நாட்டில் தற்போது நிலவும் பரபரப்பான, சவால்கள் நிறைந்த அரசியல் சூழ்நிலையில், இந்திய யூனியன் முஸ்லிம் லீகின் அவசர ஆலோசனைக் கூட்டம் புதுடெல்லியில் வரும் 24ஆம் தேதி நடைபெறுகிறது. இதுதொடர்பாக லீகின் தேசிய பொதுச் செயலாளரும், கேரள மாநில தொழில் மற்றும் வர்த்தகத்துறை அமைச்சருமான பி.கே.குஞ்ஞாலிக் குட்டி, அறிவிப்பு ஒன்றை வெளியிட்டுள்ளார். அதில், தேசிய தலைவர் பேராசிரியர் கே.எம்.காதர் மொகிதீன் தலைமையில் லீகின் அரசியல் விவகாரக்குழுத் தலைவர் இமாமே-இ-ஹிந்த் சையத் சாதிக் அலி ஷிஹாப் தங்ஙள் முன்னிலை வகிப்பார் என்று தெரிவிக்கப்பட்டுள்ளது.  

முஸ்லிம்கள் மீது குறி :

நாட்டில் தற்போது முஸ்லிம்களுக்கு எதிரான செயல்கள் அதிகரித்தவண்ணம் உள்ளன. குறிப்பாக மஸ்ஜித்துகள் குறிவைத்து இடிக்கப்பட்டு வருகின்றன. உத்தரப் பிரதேச மாநிலம் சஹரான்பூர் மாவட்ட ஆட்சியர் அலுவலகத்தில் இருந்து 100 ஆண்டுகளுக்கும் மேலான மஸ்ஜித் மாநில பாஜக அரசால் இடிக்கப்பட்டு விட்டது. மேலும் பல மஸ்ஜித்துகள் குறிவைக்கப்பட்டு நோட்டீஸ் அனுப்பப்பட்டுள்ளன. மத ரீதியாக முஸ்லிம்கள் மீதான வன்முறைகளும் அதிகரித்து வருகின்றன.

இ.யூ.முஸ்லிம் லீக் ஆலோசனை :

இத்தகைய சவால்கள் நிறைந்த சூழ்நிலையில், டெல்லி தரியா கஞ்ச், ஷியாம் லால் சாலையில் உள்ள இந்திய யூனியன் முஸ்லிம் லீகின் தேசிய அலுவலகமான காயிதே மில்லத் சென்டரில் வரும் 24ஆம் தேதி வியாழன்கிழமை காலை 11 மணிக்கு லீகின் அவசரக் கூட்டத்திற்கு அழைப்பு விடுக்கப்பட்டுள்ளது. தேசிய தலைவர் பேராசிரியர் கே.எம்.காதர் மொகிதீன் தலைமையில் நடக்கும் இந்த கூட்டத்திற்கு லீகின் அரசியல் விவகாரக்குழுத் தலைவர் இமாமே-இ-ஹிந்த் சையத் சாதிக் அலி ஷிஹாப் தங்ஙள் முன்னிலை வகிக்கிறார்.

இந்த கூட்டத்தில் அனைத்து தேசிய பொறுப்பாளர்கள், இ.யூ.முஸ்லிம் லீகின் மாநில அமைச்சர்கள், மாநில தலைவர்கள், மற்றும் மாநில செயலாளர்கள் ஆகியோர் பங்கேற்கிறார்கள்.

முக்கிய அம்சங்கள் :

கூட்டத்தில் தற்போது நாட்டில் நிலவும் அரசியல் சூழ்நிலை, சிறுபான்மையினர் குறிப்பாக முஸ்லிம்கள் சந்திக்கும் சவால்கள் ஆகியவை குறித்து விரிவாக விவாதிக்கப்பட்டு முக்கிய முடிவுகள் என்று அறிவிக்கப்பட்டுள்ளது.

மேலும், இ.யூ.முஸ்லிம் லீகை வலுப்படுத்தும் வகையில் அமைப்பு ரீதியான  விவகாரங்கள் குறித்தும் ஆலோசிக்க திட்டமிட்டப்பட்டுள்ளது. அத்துடன், நாடு முழுவதும் நிலவும் இதர முக்கிய பிரச்சினைகள் உள்ளிட்ட அம்சங்களும் இந்த கூட்டத்தில் விவாதிக்க முடிவு செய்யப்பட்டுள்ளது.

இவ்வாறு இ.யூ.முஸ்லிம் லீக் தேசிய பொதுச் செயலாளர் பி.கே.குஞ்ஞாலிக் குட்டி விடுத்துள்ள அறிவிப்பில் தெரிவிக்கப்பட்டுள்ளது.

- சிறப்புச் செய்தியாளர் : எஸ்.ஏ.அப்துல் அஜீஸ்