அதிகரித்துவரும் நினைவாற்றல் இழப்பு....!

 ” இந்தியர்களுக்கு அதிகரித்துவரும் நினைவாற்றல் இழப்பு நோய் ”

- ஓர் அதிர்ச்சி ரிப்போர்ட் -

- ஜாவீத் -

நினைவாற்றல் என்பது, மனித இனத்திற்கு ஏக இறைவன், கொடுத்த மிகப்பெரிய அருட்கொடைகளில் மிக முக்கிய அருட்கொடையாகும்.  இந்த மிகச் சிறந்த அருட்கொடையை மனித இனம் சிறப்பான முறையில் பயன்படுத்த தவறி வருவதால், தற்போது உலகம் முழுவதும் மனிதர்கள் மத்தியில் நினைவாற்றல் இழப்பு நோய் அதிகரித்து வருகிறது. இந்தியாவும் இதற்கு விதிவிலக்கல்ல என்ற வகையில் இருந்து வருகிறது. 

இந்தியாவில் தற்போது 60 வயது மற்றும் அதற்கு மேற்பட்டவர்களில் சுமார் 88 லட்சம் பேர் டிமென்ஷியாவால் அதாவது நினைவாற்றல் இழப்பு நோயால் பாதிக்கப்பட்டுள்ளனர். இந்த எண்ணிக்கை அடுத்த பத்து ஆண்டிற்குள் அதாவது வரும் 2036-க்குள் கிட்டத்தட்ட இருமடங்காகி சுமார் இரண்டு கோடியாக உயரும் என்று கணிக்கப்பட்டுள்ளது. எனவே, அறிவாற்றல் மாற்றங்களை முன்கூட்டியே கண்டறிவதும், சரியான நேரத்தில் மருத்துவ ஆலோசனையைப் பெறுவதும் அவசியம் என்று சுகாதார நிபுணர்கள் அறிவுறுத்தியுள்ளனர். 

மருத்துவர்கள் வலியுறுத்தல் :

டிமென்ஷியா பாதிப்புகளில் பெரும்பகுதி அல்சைமர் நோயால் ஏற்படுவதால், நினைவாற்றல், அறிவாற்றல் மற்றும் அன்றாடச் செயல்பாடுகளில் ஏற்படும் மாற்றங்களை முதுமையின் இயல்பான அம்சம் என்று மட்டும் கருதிக் கடந்து செல்லக்கூடாது என்று மருத்துவர்கள் வலியுறுத்துகிறார்கள்.  நினைவாற்றால் இழப்பு குறித்து முன்கூட்டியே கண்டறிந்தால், நோயாளியின் பராமரிப்பைத் திட்டமிட குடும்பத்தினருக்கு உதவும். மேலும், நோயின் தன்மையைப் புரிந்துகொள்ளவும், பராமரிப்பைத் திட்டமிடவும், தகுந்த உதவிகளைப் பெறவும், பாதிக்கப்பட்டவரின் தேவைகள் மற்றும் விருப்பங்கள் குறித்துப் பேசவும் முன்கூட்டியே கண்டறிதல் உதவும் என்று மருத்துவர்கள் யோசனை தெரிவிக்கிறார்கள். 

அல்சைமர் நோய் குறித்த தகவல்கள் :

அல்சைமர் நோய் என்பது மூளையின் நரம்பு மண்டலத்தைப் படிப்படியாகப் பாதிக்கும் ஒரு நோயாகும். இது அறிவாற்றல், தகவல் தொடர்பு, முடிவெடுக்கும் திறன், சுயசார்பு மற்றும் அன்றாட வாழ்க்கையைப் பாதிக்கக்கூடியது. வழக்கமான அறிகுறிகள் தென்படுவதற்கு 20 ஆண்டுகளுக்கு முன்பே, மூளையில் 'அமைலாய்டு' புரதம் அசாதாரணமாகச் சேரத் தொடங்கும்போதே இந்நோய் உருவாகலாம் என்று சுகாதார நிபுணர்கள் தெரிவிக்கின்றனர்.

=====================

"நினைவாற்றல், அறிவாற்றல் மற்றும் அன்றாடச் செயல்பாடுகளில் ஏற்படும் மாற்றங்களை முதுமையின் இயல்பான அம்சம் என்று மட்டும் கருதிக் கடந்து செல்லக்கூடாது. நினைவாற்றால் இழப்பு குறித்து முன்கூட்டியே கண்டறிந்தால், நோயாளியின் பராமரிப்பைத் திட்டமிட குடும்பத்தினருக்கு உதவும்"

=====================

"அல்சைமர் நோய் என்பது நினைவாற்றல் இழப்பால் மட்டுமே வரையறுக்கப்படுவதில்லை. இது ஒரு சிக்கலான, படிப்படியாக மோசமடையும் நரம்பியல் கோளாறு ஆகும். இதில் ஏற்படும் அறிவாற்றல் மாற்றங்கள், ஒருவரின் தகவல் தொடர்பு, முடிவெடுக்கும் திறன் மற்றும் சுயாதீனமாகச் செயல்படும் திறனைப் படிப்படியாகப் பாதிக்கலாம்," என்று இந்தியாவின் பிரபல நரம்பியல் மருத்துவர் வினித் பங்கா தெரிவித்துள்ளார்.  இத்தகைய மாற்றங்களுக்கான மருத்துவப் பரிசோதனை, அதற்கான காரணங்களை மதிப்பிடவும், அடுத்தகட்ட நடவடிக்கைகளைத் தீர்மானிக்கவும் உதவும் என்று அவர் குறிப்பிட்டுள்ளார். 

மருத்துவர்கள் ஆலோசனை :

நினைவாற்றல் இழப்பு நோயின் ஆரம்ப அறிகுறிகளைக் கண்டறிந்து மருத்துவரிடம் பேசுவது, குடும்பங்கள் தகவலறிந்த முடிவுகளை எடுக்கவும், பராமரிப்பைத் திட்டமிடவும் உதவும் என்று அரியானா மாநிலம் குருகிராமில் உள்ள ஃபோர்டிஸ் மெமோரியல் ஆராய்ச்சி நிறுவனத்தின் நரம்பியல் துறை கூடுதல் இயக்குநர் டாக்டர் சாஹில் கோலி ஆலோசனை கூறியுள்ளார். உலக அல்சைமர் தினத்தை முன்னிட்டு எலி லில்லி அண்ட் கம்பெனி இந்தியா மற்றும் ஃபோர்டிஸ் ஹெல்த்கேர் இணைந்து ஏற்பாடு செய்திருந்த விழிப்புணர்வு நிகழ்ச்சியின் போது இந்தக் கருத்துகள் தெரிவிக்கப்பட்டன.

ஒரு பராமரிப்பாளராகத் தனது அனுபவத்தைப் பற்றிப் பேசிய முன்னாள் மிஸ் யுனிவர்ஸ் மற்றும் நடிகை லாரா தத்தா, இந்த நோய் முழு குடும்பத்தையும் பாதிக்கிறது என்றும், நினைவாற்றல் மற்றும் அறிவாற்றல் ஆரோக்கியத்தில் ஏற்படும் மாற்றங்களில் மக்கள் கவனம் செலுத்த வேண்டும் என்றும் வலியுறுத்தினார். எலி லில்லி இந்தியாவின் மருத்துவப் பிரிவு மூத்த இயக்குநர் டாக்டர் ராகுல் கபூர், அதிகரித்து வரும் இந்தச் சுமையைச் சமாளிக்க, அதிக விழிப்புணர்வு, சுகாதார நிபுணர்களுடன் சரியான நேரத்தில் ஈடுபடுதல் மற்றும் சுகாதாரச் சூழல் அமைப்பு முழுவதும் ஒத்துழைப்பு தேவை என்று அறிவுறுத்தியுள்ளார்.  நினைவாற்றல், அறிவாற்றல் மற்றும் அன்றாடச் செயல்பாடுகளில் ஏற்படும் மாற்றங்களை, முதுமையின் இயல்பான ஒரு பகுதியாகக் கருதி அலட்சியப்படுத்தக் கூடாது என்றும் மருத்துவர்கள் வலியுறுத்தினர்.

நினைவாற்றலை அதிகரிக்க பயிற்சிகள் :

தற்போதைய நவீன விஞ்ஞான யுகத்தில், மனிதர்களின் கவனம் பல்வேறு வகைகளில் சிதைக்கப்பட்டு பறிக்கப்பட்டு வருகின்றன. மனிதனின் மூளையை சரியாக இயங்க முடியாமல் இருக்க  சமூக வலைத்தளங்கள் முக்கிய காரணிகளாக இருந்து வருகின்றன. இத்தகைய சூழ்நிலையில், நினைவாற்றலை அதிகரிக்க நாள்தோறும் சிறுசிறு பயிற்சிகளை செய்ய மனித சமுதாயம் பழகிக் கொள்ள வேண்டும். 

முதுமை என்பது ஒரு வேதனை என்றாலும், நினைவாற்றல் இழப்பது அதைவிட மிகப்பெரிய நரகமாகும். எனவே, சரியான பயிற்சிகள் மூலம் நினைவாற்றல் சக்தியை அதிகரிக்க நாம் முயற்சிகளை தொடர்ந்து செய்ய வேண்டும். சரியான முறையில் ஒவ்வொரு நாளின் நேரத்தையும் கணக்கிட்டு, வாழ்க்கை முறைகளை அமைத்துக் கொண்டு செயல்பட்டால், நினைவாற்றல் இழப்பு நோயில் இருந்து நிச்சயம் தப்பிக்கலாம் என்பது முதுமையிலும் நல்ல நினைவாற்றல் கொண்ட பலரின் அனுபவங்களாக இருந்து வருகின்றன. 

============================