பெண்களின் வாழ்வில் ஒளியேற்றும் செயற்கை நுண்ணறிவு படிப்பு....!

 எஸ்.எம்.பி. டிரஸ்ட் ஜம் ஜம் குழுமத்தின் புதிய முயற்சி

" பெண்களின் வாழ்வில் ஒளியேற்றும் செயற்கை நுண்ணறிவு படிப்பு "

சிறப்பு அம்சங்கள், பயன்கள் என்ன?

மில்லத் முஹம்மது இஸ்மாயில் சிறப்பு நேர்காணல்

தங்க மங்கைக்கான ஏ.ஐ. அதாவது செயற்கை நுண்ணறிவு நிகழ்ச்சி தமிழக வரலாற்றில் முதல்முறையாக அய்யம்பேட்டை சக்கராப்பள்ளியில் கடந்த ஜுலை மாதம் நடைபெற்றது.  அய்யம்பேட்டை சக்கராப்பள்ளியில்  எத்தனையோ வரலாற்று நிகழ்ச்சிகள் நடைபெற்றாலும் ஏ.ஐ. நிகழ்ச்சி என்பது பொன் எழுத்துக்களால் பொறிக்கப்பட வேண்டிய நிகழ்ச்சியாக அமைந்து இருந்தது. ஒரேநேரத்தில் 100க்கு மேற்பட்ட பெண்கள் AI course certificate (செயற்கை நுண்ணறிவு படிப்பு சான்றிதழ்) பெற்றது,  அய்யம்பேட்டை சக்கராப்பள்ளியில் மட்டுமே என்று பெருமையாக சொல்லிக் கொள்ளலாம். 

சமுதாய பெண்கள் தன்னம்பிக்கையுடன் வீட்டில் இருந்தபடியே நல்ல கல்விபெற்று வருவாய் ஈட்டி, சொந்த கால்களில் நிற்க வேண்டும் என்ற உயர்ந்த எண்ணத்தில், எந்தவித ஆர்ப்பாட்டமும், ஆரவாரமும் இல்லாமல், எஸ்.எம்.பி.டிரஸ்ட் ஜம் ஜம் குழுமம் இந்த நல்ல பணியை செய்து வருகிறது. சென்னையில் புகழ்பெற்ற வணிக நிறுவனமான ஜம் ஜம் ரியல் ஸ்டேட் நிறுவனத்தின் நிறுவனர் மறைந்த அல்ஹாஜ் எஸ்.எம்.பக்ருதீன் அவர்களின் நினைவாக தொடங்கப்பட்டுள்ள இந்த எஸ்.எம்.பி.டிரஸ்ட் ஜம் ஜம் குழுமத்தின் முக்கிய தூணாக  மில்லத் முஹம்மது இஸ்மாயில் செயல்பட்டு வருகிறார். அவரை நேரில் சந்தித்து, இந்த குழுமம் ஆரம்பிக்கப்பட்டதன் முதன்மை நோக்கம் மற்றும் பணிகள் குறித்து அறிய விரும்பினோம். அதன்படி மணிச்சுடர் சிறப்புச் செய்தியாளர் எஸ்.ஏ.அப்துல் அஜீஸ், சென்னை ராயப்பேட்டையில் உள்ள மில்லத் முஹம்மது இஸ்மாயிலின் அலுவலகத்தில் அவரை நேரில்  சந்தித்து சிறப்பு நேர்காணல் ஒன்றை நடத்தினார். அதன் முழு விவரம் இதோ உங்கள் பார்வைக்கு :

பெண்களுக்கு ஒரு தன்னம்பிக்கை :

நம்முடைய சமுதாயத்தில், குறிப்பாக முஸ்லிம் பெண்கள் பல்வேறு பிரச்சினைகளால் பொருளாதார நெருக்கடிகளை சந்தித்து வருகிறார்கள். நன்கு படித்தபிறகும் கூட, அவர்களால், சொந்த கால்களில் தன்னம்பிக்கையுடன் வாழ முடியவில்லை. இதனால் தொடர்ந்து சவால்களை எதிர்கொள்ள வேண்டிய கட்டாய சூழ்நிலைக்கு அவர்கள் தள்ளப்பட்டு வருகிறார்கள். இப்படி பல பெண்கள் வேதனை அடைந்து வருவதை அறிந்து, அவர்களுக்கு ஒரு நல்ல தீர்வு அளிக்க வேண்டும். அவர்கள் வாழ்வில் மீண்டும் ஒளி பிறக்க வழிவகை செய்ய வேண்டும் என்ற எண்ணம் எங்கள் உள்ளத்தில் பிறந்தது. இயற்கையாகவே எங்கள் குடும்பம் சமுதாய நலனில் அக்கறை கொண்ட குடும்பமாகும். மறைந்த எங்கள் தந்தையார் அல்ஹாஜ் எஸ்.எம்.பத்ருதீன் அவர்கள் இ.யூ.முஸ்லிம் லீகின் முக்கிய தூண்களில் ஒருவராக இருந்து பல்வேறு சிறப்பான பணிகளை செய்து தம்முடைய வாழ்க்கைப் பயணத்தை முடித்தார். அவரது வழியில் வந்த எங்களுக்கும், சமுதாயத்திற்கு ஏதாவது செய்தாக வேண்டும் என்ற எண்ணம் தோன்றியது. 

அந்த வகையில் வீட்டில் இருந்தபடியே நல்ல வருவாய் கிடைக்க பெண்கள் எந்த வகையில் தங்களுடைய திறமைகளை வளர்த்துக் கொள்ள வேண்டும் என்று சிந்தித்தோம். இதுதொடர்பாக கல்வி வல்லுநர்கள் உள்ளிட்ட பலரிடம் ஆலோசனை செய்தோம். அலுவலகம் செல்லாமல் வீட்டில் இருந்தபடியே பணிசெய்யும் வகையில் பெண்களுக்கு எந்த வகையில் தீர்வுகள் உள்ளன என்று ஆராய்ந்தோம். தற்போது செயற்கை நுண்ணறிவு காலம் என்பதால், அதன் தொழில் நுட்பங்களை அறிந்துகொண்டு, நல்ல பயிற்சி பெற்று, வீட்டில் இருந்தபடியே பணியாற்றினால், நல்ல வருவாய் பெண்களுக்கு கிடைக்கும் என்று வல்லுநர்கள் ஆலோசனைகளை தந்தார்கள். பெண்கள் விரும்பும் பணி குறித்த வழிகாட்டல், புதிய தொழிலை தொடங்கி வெற்றிபெற வழிகாட்டல், நவீன உயர்கல்வியை பெற வழிகாட்டல் என பல்வேறு ஆலோசனைகள் முன்வைக்கப்பட்டன. 

பெண்களுக்கான ஏ.ஐ. பயிற்சி :

அந்த ஆலோசனைகள் மிகவும் சிறப்பாக இருந்ததால், எந்தவித தாமதமும் செய்யாமல், எஸ்.எம்.பி.டிரஸ்ட் ஜம் ஜம் குழுமம் என்ற பெயரில் நிறுவனம் ஒன்றை ஆரம்பித்து செயலில் இறங்கினோம். அதன்படி, 20 முதல் 30 வயது உடைய பெண்களுக்கு பயிற்சி அளிக்க முடிவு செய்தோம். இப்படி எடுக்கப்பட்ட முதல்படியில், 60க்கும் மேற்பட்ட பெண்கள் வீட்டில் இருந்தபடியே பணி செய்ய தயாராக இருந்தார்கள். தேர்வு செய்யப்பட்ட அவர்களுக்காக ஒரு சிறப்பு நிகழ்ச்சி ஏற்பாடு செய்யப்பட்டது. அதன்படி 'செயற்கை நுண்ணறிவுத் திறன் கொண்ட பெண்' என்ற ஆன்லைன் வகுப்பு கடந்த ஏப்ரல் 10ஆம் தேதி தொடங்கப்பட்டது. இந்த பயிற்சி வகுப்பில் 100க்கும் மேற்பட்ட பெண்கள் ஆர்வத்துடன் பங்கேற்றார்கள். இவர்களுக்கு செயற்கை நுண்ணறிவு நிபுணர்  Rural Bites சையத் சாகுல் அமீது சிறப்பான முறையில் செயற்கை நுண்ணறிவு குறித்து அழகிய முறையில் எடுத்துரைத்தார்கள். மேலும் பயிற்சியில் பங்கேற்ற பெண்கள் எழுப்பிய பல்வேறு சந்தேகங்களுக்கும் அவர் விளக்கம் அளித்தார். 

==================

"எஸ்.எம்.பி.டிரஸ்ட் ஜம் ஜம் குழுமம் மூலம் நடத்தப்பட்ட தங்கமான மங்கைகள் செயற்கை நுண்ணறிவுத் திறன் கொண்ட பெண் என்ற ஆன் லைன் வகுப்பில் சேர்ந்து 100 பெண்கள் நிறைவு செய்து சான்றிதழ் பெற்று இருக்கிறார்கள்.  அய்யம்பேட்டை பகுதியில் இன்னும் அதிகமான பெண் சாதனையாளர்களை உருவாக்குவோம். இலக்கை அடைவோம்"

==================

செயற்கை நுண்ணறிவின் அடிப்படையை தொழில்நுட்பங்களை கற்றுக் கொண்டால் நல்ல வருவாய் கிடைக்கும். அதன்மூலம் பெண்கள் ஐ.டி. நிறுவனங்களில் சேர்ந்து வீட்டில் இருந்தபடியே பணிபுரிந்து, நல்ல வருவாயை ஈட்டலாம் என்றும் ஆலோசனைகள் வழங்கினார். இந்த ஆலோசனைகள் நல்ல பலனை தந்தன.  அத்துடன், அய்யம்பேட்டை பட்டதாரி பெண்களை சாதனையாளர்களாக உருவாக்கும் முயற்சியாக, கட்டணமில்லா பைதான் நேரடி வகுப்பு கடந்த ஜுலை மாதம் நடத்தப்பட்டது. அப்போது விஸ்டம் குழுவினர் சிறப்பான முறையில் வகுப்புகளை நடத்தி விளக்கம் அளித்தனர். 

முயற்சியில் பலர் ஒத்துழைப்பு :

இந்த அரிய முயற்சியில் எங்களுடன் பலர் ஒத்துழைத்தார்கள். குறிப்பாக, விஸ்டம் சித்திக் குழுவினருக்கு எங்களுடைய மனமார்ந்த நன்றியை தெரிவித்துக் கொள்கிறோம். நிகழ்ச்சியை  சீரும் சிறப்பாக வழி நடத்திய மர்ஹபா பைசல் அவர்களுக்கு எங்களது மனமார்ந்த நன்றியை தெரிவித்துக் கொள்கிறோம்.  இதை ஆரம்பம் முதல் சிறப்பாக வழிநடத்திய என்னுடைய அருமை நண்பர் ஆவூர் இஸ்மாயில் அவர்களுக்கும் மனமார்ந்த நன்றியை தெரிவித்துக் கொள்கிறோம்.  அதைப்போல் இதை சிறப்பாக நடத்திய ஆவூர் இஸ்மாயில் அருமை மகளார் மற்றும் மருமகள் ஜுபைதா சல்மான் அவர்களுக்கும் மனமார்ந்த நன்றியை தெரிவித்துக் கொள்கிறோம். இந்த நிகழ்ச்சியை ஆரம்பம் முதல் ஒருங்கிணைத்து வழி நடத்திய என்னுடைய அருமை மருமகள் முபினா சுஹைல் அவர்களுக்கும் இந்த நேரத்தில் நன்றியை தெரிவித்துக் கொள்கிறோம்.

இந்த நிகழ்ச்சிக்காக சென்னையிலிருந்து பல சிரமங்களுக்கு இடையே வருகை தந்த ஓய்வுபெற்ற ஐ.ஏ.எஸ். அதிகாரி ஜனாப் மிஹ்ராஜ் அவர்களுக்கும் எங்களுடைய மனமார்ந்த நன்றியை தெரிவித்துக் கொள்கிறோம். அத்துடன் முழு ஒத்துழைப்பு அளித்த  ஜமாத் பெருமக்களுக்கும் நன்றியை தெரிவித்துக் கொள்கிறோம். இதன்மூலம் பெண்கள் சுயமாக தங்களுடைய அறிவை வளர்த்துக்கொண்டு தங்களுடைய தேவைகளை நிறைவேற்றிக் கொள்ள இந்த ஏ.ஐ. வகுப்புகள் மூலம் முழுமையாக பயன் பெற்று இருக்கிறார்கள். 

ஏ.ஐ. கூகுள் சான்றிதழ் பெற்று சாதனை :

மூன்று மாதம் தொடர்ந்து ஆன்லைன் வழியாக நடைபெற்ற பயிற்சி வகுப்பில், 99 சதவீத பெண்கள் முழு அர்ப்பணிப்புடன் ஈடுபட்டு பயிற்சி பெற்றார்கள். நவீன செயற்கை நுண்ணறிவு திறன்கள் மற்றும் நடைமுறை தீர்வுகளை உருவாக்க அளிக்கப்படும் பயிற்சியில் சேர்ந்து பயிற்சி பெற்ற அனைவரும் ஆன்லைன் மூலம் தேர்வு எழுதி தேர்ச்சி பெற்று ஏ.ஐ. தொழில்நுட்பம் தொடர்பாக கூகுள் தொழில் சான்றிதழ் (Google Certificate) பெற்று சாதித்து இருக்கிறார்கள். சான்றிதழ் பெற்ற நூறு பேரில், 25க்கும் மேற்பட்ட தனியார் ஐ.டி. நிறுவனங்களில் சேர்ந்து, வீட்டில் இருந்தபடியே பணிபுரிந்து வருவாய் ஈட்டி வருகிறார்கள்.  இவர்களில் சில பெண்கள், தனியாக அகாடமி ஆரம்பித்து சிலரை பணியில் அமர்த்தி, அவர்களுக்கு நல்ல சம்பளம் கொடுக்கும் அளவுக்கு உயர்ந்து இருக்கிறார்கள் என்பதை அறியும்போது உண்மையில் மனம் மகிழ்ச்சி அடைகிறது. 

எங்களுடைய இந்த புதிய முயற்சி முழுமையாக வெற்றி பெற்றதற்கு காரணமாக இருந்த அனைவருக்கும் இந்த நேரத்தில் எங்களுடைய நன்றியை தெரிவித்துக் கொள்கிறோம். வீட்டில் இருந்து பணி, சுய வேலைவாய்ப்பு, உயர்கல்வி, செயற்கை நுண்ணறிவு மற்றும் டிஜிட்டல் திறமை வளர்த்துக் கொள்வது ஆகிய நான்கு முக்கிய அம்சங்களை முன்வைத்து படித்த பெண்களிடம் நாங்கள் ஒரு புதிய விழிப்புணர்வை ஏற்படுத்தி வருகிறோம். அதற்கு நல்ல பலன் கிடைத்து வருகிறது.  மேலும், கண்ணியமிக்க ஆலிம் உலமாக்களுக்கு ஆன்லைனில பயிற்சி துவங்கி நடைபெறுகிறது. எல்லா புகழும் ஏக இறைவனுக்கே. 

இவ்வாறு, தங்களது எஸ்.எம்.பி.டிரஸ்ட் ஜம் ஜம் குழுமம் செய்துவரும் நல்ல பணி குறித்து, மில்லத் முஹம்மது இஸ்மாயில் விரிவாக விளக்கம் அளித்தார். சமுதாய பெண்கள் மத்தியில் கல்வி குறித்த விழிப்புணர்வை ஏற்படுத்தவும், அவர்களது வருவாய் உயர்ந்து பொருளாதார நிலை மேம்படவும், எஸ்.எம்.பி.டிரஸ்ட் ஜம் ஜம் குழுமம் செய்துவரும் பணிகளை பாராட்டிய நாம், அதில் மேலும் பல வெற்றிகள் பெற வாழ்த்தி விடைப்பெற்றோம். 

- சந்திப்பு : சிறப்புச் செய்தியாளர் : எஸ்.ஏ.அப்துல் அஜீஸ்