இரண்டு முஸ்லிம் அமைப்புகளின் முக்கிய முடிவுகள்...!

 முஸ்லிம்களுக்கு எதிராக அதிகரித்துவரும் புல்டோசர் நடவடிக்கைகள்

இரண்டு முஸ்லிம் அமைப்புகளின் முக்கிய முடிவுகள் 

- எஸ்.ஏ.அப்துல் அஜீஸ் -

நாடு முழுவதும் குறிப்பாக உத்தரப் பிரதேசம், டெல்லி, மத்தியப் பிரதேசம் உள்ளிட்ட வட மாநிலங்களில் முஸ்லிம்களை குறிவைத்து புல்டோசர் நடவடிக்கைகள் தொடர்ந்து அதிகரித்து வருகின்றன. வரலாற்றுச் சிறப்புமிக்க பாபரி மஸ்ஜித் இடிக்கப்பட்ட பிறகு, வழிப்பாட்டு தலங்கள் இனி இடிக்கப்பட மாட்டாது என்று உறுதி அளிக்கப்பட்டது. ஆனால், அந்த உறுதிமொழி தற்போது காற்றில் பறக்கப்பட்டு விட்டு, இரவோடு இரவாக மஸ்ஜித்துகளை இடிக்கும் நடவடிக்கைகளை பாஜக மாநில அரசுகள் எடுத்து வருகின்றன. அதன்படி, உத்தரப் பிரதேச மாநில சஹரான்பூரில் இருந்த 100 ஆண்டுகள் பழமையான மஸ்ஜித், ஆக்கிரமிப்பு என்ற பெயரில் இரவோடு இரவாக இடிக்கப்பட்டு தரைமட்டமாக்கப்பட்டது. இதேபோன்று டெல்லியிலும் ஒரு மஸ்ஜித் இடிக்கப்பட்டது. மஸ்ஜித்துகள் மட்டுமல்லாமல், முஸ்லிம்களின் வீடுகளும் குறிவைத்து இடிக்கப்பட்டு வருகின்றன. அத்துடன் பாஜக ஆளும் மாநிலங்களில் பொதுசிவில் சட்டம் அமல்படுத்தப்படும் என்று ஒன்றிய உள்துறை அமைச்சர் அமித்ஷா அறிவிப்பை வெளியிட்டுள்ளார். 

இரண்டு முக்கிய ஆலோசனைக் கூட்டங்கள் :

இந்திய முஸ்லிம்கள் சந்திக்கும் இத்தகைய சவால்கள் நிறைந்த ஒரு சூழ்நிலையில், தலைநகர் டெல்லியில் கடந்த செப்டம்பர் மாதம் இறுதியில் நாட்டின் இரண்டு முக்கிய முஸ்லிம் அமைப்புகளின் ஆலோசனை கூட்டங்கள் நடைபெற்றன. இந்திய முஸ்லிம்களின் ஒரே அரசியல் இயக்கமாக தொடர்ந்து சிறப்பாகச் செயல்பட்டுகொண்டு இருக்கும், இந்திய யூனியன் முஸ்லிம் லீகின் தேசிய செயற்குழுக் கூட்டம் கடந்த செப்டம்பர் 24ஆம் தேதி டெல்லியில் உள்ள காயிதே மில்லத் சென்டரில் தேசிய தலைவர் பேராசிரியர் கே.எம்.காதர் மொகிதீன் தலைமையில் நடைபெற்றது. தேசிய தலைவர்கள், நிர்வாகிகள் பங்கேற்ற இந்த கூட்டத்தில் பல முக்கிய முடிவுகள் எடுக்கப்பட்டன.

அதன்படி, இந்திய அரசியலமைப்பின்படி, தேர்தல் ஆணையம் என்பது தலைமைத் தேர்தல் ஆணையர் மற்றும் இரண்டு தேர்தல் ஆணையர்களைக் கொண்ட அமைப்பாகும். இவர்கள் மூவருக்கும் சமமான அந்தஸ்து உள்ளது. எனவே, தேர்தல் ஆணையத்தின் எந்தவொரு முடிவும் மூவரில் பெரும்பான்மையினரின் முடிவாக இருக்க வேண்டும். ஆனால், தேர்தல் ஆணையம் தனது பெரும்பான்மை முடிவின்படி செயல்படவில்லை. உண்மையில், தலைமைத் தேர்தல் ஆணையர், தேர்தல் ஆணையத்தின் ஜனநாயக ரீதியான செயல்பாட்டு முறையிலிருந்து விலகிச் செயல்பட்டுள்ளார்.

தேர்தல் ஆணையத்தின் 14 முடிவுகள், உண்மையில் மற்ற இரண்டு தேர்தல் ஆணையர்களின் ஒப்புதல் இல்லாமலேயே எடுக்கப்பட்டிருப்பது தெரியவந்துள்ளது. 'சிறப்பு தீவிர வாக்காளர் பட்டியல் திருத்தப் பணி' (SIR) உள்ளிட்ட சில முடிவுகள், மற்ற இரண்டு ஆணையர்களின் ஒப்புதல் இல்லாமலே எடுக்கப்பட்டன.  எனவே, பெரும்பான்மை ஆணையர்களின் ஒப்புதல் இல்லாமல் தேர்தல் ஆணையத்தால் எடுக்கப்பட்ட அனைத்து முடிவுகளும் செல்லாதவை என அறிவிக்கப்பட வேண்டும். கோடிக்கணக்கான வாக்காளர்களின், குறிப்பாகச் சிறுபான்மையின வாக்காளர்களின் பெயர்கள் நீக்கப்படுவதற்கு வழிவகுத்த SIR-ஐச் செயல்படுத்தும் முடிவும் செல்லாததாக்கப்பட வேண்டும். அத்துடன், எஸ்.ஐ.ஆர். என்ற பெயரில் மேற்கொள்ளப்பட்ட நடவடிக்கைகள் அனைத்தும் ரத்து செய்யப்பட வேண்டும். தலைமைத் தேர்தல் ஆணையர் ஞானேஷ் குமார் அரசியலமைப்பு நெறிமுறைகளைத் தலைகீழாக மாற்றியுள்ளார். எனவே, அரசு உடனடியாக அவரைப் பதவி விலகுமாறு கேட்டுக்கொள்ள வேண்டும். பாஜக அரசின் தூண்டுதலின் பேரில் கோடிக்கணக்கான வாக்குகள் நீக்கப்பட்டதற்காகத் தேர்தல் ஆணையம் பொறுப்பு ஏற்க வேண்டும் என்று இ.யூ.முஸ்லிம் லீக் வலியுறுத்தியுள்ளது. 

புல்டோசர் நடவடிக்கைகளை நிறுத்த வேண்டும் :

சிறுபான்மையினரின், குறிப்பாக முஸ்லிம்களின் வழிபாட்டுத் தலங்களை அற்பமான காரணங்களைக் கூறி புல்டோசர் மூலம் இடித்துத் தள்ளுதல். சஹாரன்பூரில் உள்ள மஸ்ஜித் விவகாரம் இதில் சமீபத்திய நிகழ்வாகும். மேலும், மஸ்ஜித்துகளை இடிக்கும் நடவடிக்கைகள் தடையின்றித் தொடர்கின்றன. உத்தரப் பிரதேசம், மத்தியப் பிரதேசம், ராஜஸ்தான், டெல்லி மற்றும் பிற மாநிலங்களில் இது போன்ற பல சம்பவங்கள் பதிவாகியுள்ளன. இது நாட்டின் மதச்சார்பற்ற தன்மை குறித்த மிகக் கடுமையான பிரச்சினையை எழுப்புகிறது. இவை பல தசாப்தங்கள் மற்றும் நூற்றாண்டுகள் பழமையான மஸ்ஜிதுக்கள்; மக்கள் இவற்றை வழிபாட்டுத் தலங்களாகப் பயன்படுத்தி வந்தனர். ஆக்கிரமிப்பு மற்றும் உண்மையில் இல்லாத பிற காரணங்களைக் கூறி, நிர்வாகம் மஸ்ஜித்துக்களை இடிக்கும் நடவடிக்கைகளைத் தொடர்ந்து மேற்கொண்டு வருகிறது. வழிபாட்டுத் தலங்கள் இடிக்கப்படுவதற்கு எதிராக வலுவான மற்றும் உறுதியான நடவடிக்கையை மேற்கொள்ளவும், இந்திய அரசியலமைப்பின் அடிப்படை அம்சமான நாட்டின் மதச்சார்பற்ற தன்மையைக் காக்கவும் நீதித்துறை தலையிட வேண்டும். நாட்டின் சில மாநிலங்களில் வினாத்தாள் கசிவால் அப்பாவி மாணவர்கள் பாதிக்கப்பட்டதால், கல்வித்துறையை முழுமையாகச் சீரமைக்க வேண்டும்., பாஜக ஆளும் மாநிலங்களில் பொது சிவில் சட்டத்தை அமல்படுத்த அரசு மேற்கொள்ளும் முயற்சிகள் குறித்து மத்திய உள்துறை அமைச்சர் அமித் ஷா வெளியிட்ட அறிவிப்புக்கு கண்டனம் தெரிவித்துள்ள இந்திய யூனியன் முஸ்லிம் லீக்,  பொது சிவில் சட்டத்தை மறைமுக வழிகளில் கொண்டுவருவதற்கான எந்தவொரு முயற்சியையும் அரசியல் ரீதியாகவும் சட்ட ரீதியாகவும் எதிர்க்கும் என்றும் உறுதிப்பட கூறியுள்ளது. 

ஜமியத்துல் உலமாயே ஹிந்த்  முக்கிய முடிவு :

இதேபோன்று, நாட்டின் பல்வேறு மாநிலங்களில் முஸ்லிம்களுக்கு எதிராக மேற்கொள்ளப்படும் குடிமை மற்றும் மத உரிமைகள் தொடர்பான பிரச்சினைகள், கும்பல் தாக்குதல்கள், புல்டோசர் நடவடிக்கைகள் மற்றும் மஸ்ஜித்துகள், மதரஸாக்கள் இடிக்கப்படுதல் ஆகியவற்றிக்கு ஜமியத்துல் உலமாயே ஹிந்த் கடும் கண்டனம் தெரிவித்துள்ளது.  கடந்த செப்டம்பர் 23ஆம் தேதி புது டெல்லியில் ஜமியத்துல் உலமாயே ஹிந்த் அமைப்பின் செயற்குழுக் கூட்டம் அதன் தலைவர் மௌலானா மஹ்மூத் மதானி தலைமையில் நடைபெற்றது.  கூட்டத்தில், தற்போது நாட்டில் நிலவும் சூழல், அரசியலமைப்பு உத்தரவாதம் அளித்துள்ள அடிப்படை உரிமைகள், மத சுதந்திரம், ஷரியத் விவகாரங்களில் தலையிடுவதற்கான முயற்சிகள் மற்றும் வழிபாட்டுத் தலங்கள், மஸ்ஜித்துகள் மற்றும் இஸ்லாமியக் கல்வி நிலையங்கள் தொடர்பான பிரச்சினைகள் குறித்து விவாதிக்கப்பட்டன.

பல்வேறு மாநிலங்களில் மேற்கொள்ளப்படும் நிர்வாக நடவடிக்கைகள், குறிப்பாக குடிமை மற்றும் மத உரிமைகள் தொடர்பான பிரச்சினைகள், கும்பல் தாக்குதல்கள், புல்டோசர் நடவடிக்கைகள் மற்றும் மஸ்ஜித்துதகள், மதரஸாக்கள் இடிக்கப்படுதல் ஆகியவை குறித்து செயற்குழு ஆழ்ந்த கவலையை வெளிப்படுத்தியது. இப்பிரச்சினைகளை மிக உயர்ந்த அரசியலமைப்பு மட்டத்தில் எழுப்பவும், பாதிக்கப்பட்ட மக்களின் கவலைகள் மற்றும் புகார்களை முன்வைக்க இந்தியக் குடியரசுத் தலைவரைச் சந்திக்க நேரம் கோரவும் முடிவு செய்யப்பட்டது. மேலும், தீர்வு காணவும், நீதி மற்றும் அரசியலமைப்பு நெறிமுறைகளைப் பாதுகாப்பது தொடர்பான பிரச்சினைகளை எழுப்பவும் பொருத்தமான அரசியலமைப்பு மற்றும் சட்ட அமைப்புகளை அணுகவும் குழு முடிவு செய்தது.

பாரபட்சமான அணுகுமுறை : 

அரசின் ஒருதலைப்பட்சமான நடவடிக்கைகள் மற்றும் பல நிகழ்வுகளில் காணப்பட்ட நிர்வாக ரீதியான பாரபட்சமான அணுகுமுறை ஆகியவை, பாதிக்கப்பட்ட மக்கள் நீதிமன்றங்கள் மூலம் பயனுள்ள சட்ட தீர்வுகளைப் பெறுவதற்கான வாய்ப்புகளைக் குறைப்பதாக மௌலானா மஹ்மூத் மதானி கூறினார். ஒரு குறிப்பிட்ட சமூகத்திற்கு எதிராக ஒருதலைப்பட்சமான நடவடிக்கை எடுக்கப்பட்டு, அதற்கு நிர்வாக ரீதியான ஆதரவும் கிடைத்தால், அது தீவிர கவலைக்குரிய விஷயமாகும் என்றும் இப்பிரச்சினை ஒரு குறிப்பிட்ட இடத்திற்கோ அல்லது மாநிலத்திற்கோ மட்டும் மட்டுப்படுத்தப்படவில்லை என்றும், நாட்டின் பல்வேறு பகுதிகளிலிருந்தும் இதே போன்ற சம்பவங்கள் பதிவாகி வருவதாகவும் மதானி குறிப்பிட்டார்.  மேலும், நீதித்துறையானது பயனுள்ள சட்டப் பாதுகாப்பையோ அல்லது உரிய நேரத்தில் தீர்வையோ வழங்கவில்லை என்று மக்கள் உணரத் தொடங்கினால், மற்றும் அந்த அமைப்பிற்குள் தங்களுக்கு எந்தவொரு பயனுள்ள வழியும் இல்லை என்று ஒரு சமூகம் நம்பத் தொடங்கினால், அது எந்தவொரு நாட்டிற்கும் அல்லது சமூகத்திற்கும் ஆரோக்கியமான சூழலாகக் கருதப்படாது. இந்தச் சூழல் குறித்து ஜமியத்துல் உலமாயே ஹிந்த்' ஆழ்ந்த கவலையை வெளிப்படுத்தியதுடன், கிடைக்கக்கூடிய அனைத்து அரசியலமைப்பு மற்றும் சட்டரீதியான வழிகளையும் பயன்படுத்த முடிவு செய்துள்ளது என்றும் அவர் கூறினார்.

முஸ்லிம்கள் நம்பிக்கை இழக்க வேண்டாம் :

மேலும், முஸ்லிம்களும் பொதுமக்களும் நம்பிக்கையை இழக்கவோ அல்லது அச்சமடையவோ வேண்டாம். நாம் நமது உரிமைகளுக்கான போராட்டத்தை உறுதிப்பாடு, துணிச்சல் மற்றும் அரசியலமைப்புக்கு உட்பட்ட வழிகள் மூலம் தொடர்ந்து முன்னெடுக்க வேண்டும். இது நமது நாடு, நாமும் இந்நாட்டின் சமமான குடிமக்கள். நமது அரசியலமைப்பு மற்றும் சட்டரீதியான உரிமைகளைப் பாதுகாப்பது நமது அடிப்படை உரிமையாகும். இந்த உரிமைகளைப் பாதுகாப்பதற்கும் நிலைநாட்டுவதற்கும் அரசியலமைப்புச் சட்டம் பல்வேறு வழிகளையும் வழிமுறைகளையும் வழங்கியுள்ளது. ஜமியத்துல்  உலமாயே ஹிந்த் கிடைக்கக்கூடிய அனைத்து அரசியலமைப்பு, சட்ட மற்றும் ஜனநாயக வழிமுறைகளையும் பயன்படுத்தி தனது முயற்சிகளைத் தொடரும் என்றும் மௌலானா மஹ்மூத் மதானி உறுதிப்பட தெரிவித்தார். 

தற்போதைய சவால்கள் நிறைந்த சூழ்நிலையில், நாட்டின் இரண்டு முஸ்லிம் அமைப்புகள் டெல்லியில் கூடி, முக்கிய முடிவுகள் எடுத்து இருப்பது, முஸ்லிம்களுக்கு சற்று ஆறுதல் அளிக்கும் வகையில் இருக்கிறது என்பதை உண்மையாகும். 

======================