டெல்லி ஜந்தர் மந்தரில் முஸ்லிம் அமைப்புகள் ஆர்ப்பாட்டம்....!

 மஸ்ஜித்துகள், மதரஸாக்கள் இடிப்பு நடவடிக்கைகளுக்கு கடும் எதிர்ப்பு 

டெல்லி ஜந்தர் மந்தரில் முஸ்லிம் அமைப்புகள் சார்பில் மாபெரும் ஆர்ப்பாட்டம்

முஸ்லிம் தலைவர்கள், எம்.பி.க்கள் உள்ளிட்டோர் பங்கேற்பு 

புதுடெல்லி. செப்.30— இந்தியாவில் முஸ்லிம்களின் மத வழிபாட்டுத் தலங்கள் மீதான தாக்குதல்கள் மற்றும் இடிப்பு நடவடிக்கைகளுக்கு எதிராக டெல்லி ஜந்தர் மந்தரில் 29.09.2026 செவ்வாய்க்கிழமையன்று கண்டன ஆர்ப்பாட்டம் நடைபெற்றது. 

ஒன்றியத்தில் பாஜக ஆட்சிக்கு வந்தபிறகு, நாட்டின் பல மாநிலங்களில் குறிப்பாக பாஜக ஆளும் மாநிலங்களில் மஸ்ஜித்துகள், மதரஸாக்கள் மற்றும் வக்பு சொத்துக்கள் மீதான தொடர் தாக்குதல்கள் தொடர்ந்து அதிகரித்து வருகின்றன. உத்தரப் பிரதேசம் சஹாரன்பூரில் இருந்து 100 ஆண்டுகள் பழமையான மஸ்ஜித் இரவோடு இரவாக இடித்து தரைமட்டமாக்கப்பட்டது. இதேபோன்று மத்திய பிரதேசம் உஜ்ஜைனின் வரலாற்றுச் சிறப்புமிக்க ஷாஹி மஸ்ஜித்தை, சாலை விரிவாகப் பணிக்காக இடிக்க அம்மாநில பாஜக அரசு நடவடிக்கை எடுத்துள்ளது. மேலும் மதரஸாக்கள் மீதான தாக்குதல்களும் அதிகரித்தவண்ணம் உள்ளன. 

முஸ்லிம் அமைப்புகள் சார்பில் ஆர்ப்பாட்டம் :

இத்தகை போக்கைக் கண்டித்து, 'இந்திய முஸ்லிம்களுக்கான கண்காணிப்புக் குழு' விடுத்த அழைப்பின் பேரில் டெல்லியில் உள்ள ஜந்தர் மந்தரில் 29.09.2026 செவ்வாய்க்கிழமை மாலை 3 மணிக்கு ஆர்ப்பாட்டம் நடைபெற்றது. அதில், அகில இந்திய முஸ்லிம் தனியார் சட்ட வாரியம், ஜாமியத்துல் உலமாயே ஹிந்த் உள்ளிட்ட முஸ்லிம் அமைப்புகள் மட்டுமல்லாமல், சீக்கிய, ஜெயின அமைப்புகளும் கலந்துகொண்டு முழு ஆதரவு அளித்தன.

 டெல்லி சிறுபான்மையினர் ஆணையத்தின் முன்னாள் தலைவர் ஜஃபருல் இஸ்லாம் கான், செல்வாக்கு மிக்க மார்க்கத் தலைவர் மௌலானா சஜ்ஜாத் நௌமானி, முக்கிய கிறிஸ்தவத் தலைவரும் மனித உரிமை ஆர்வலருமான ஜான் தயா, முன்னாள் மாநிலங்களவை உறுப்பினர் முகமது அதீப் உள்ளிட்ட பல தலைவர்கள் இந்தப் போராட்டத்திற்கு ஆதரவு தெரிவித்தனர். மேலும், சமாஜ்வாதி கட்சி நாடாளுமன்ற உறுப்பினர்கள் இக்ரா ஹசன் சௌத்ரி, ஜியாவுர் ரஹ்மான், முஹிப்புல்லாஹ் நத்வி உள்ளிட்டோருடன், ஏராளமான சமூக ஆர்வலர்கள் கலந்துகொண்டு, தங்களது எதிர்ப்பை பதிவு செய்தனர்.

புல்டோசர் நடவடிக்கைகளுக்கு எதிராக முழக்கம் :

ஆர்ப்பாட்டத்தில் கலந்துகொண்ட அனைவரும்,  மத்தியப் பிரதேசத்தின் உஜ்ஜைன் நகரில், 600 ஆண்டுகள் பழமையான வரலாற்றுச் சிறப்புமிக்க 'ஷாஹி மஸ்ஜித்' பகுதியளவு இடிக்கப்படுவதற்கு எதிராக முழங்களை எழுப்பினர். சஹரான்பூர் மஸ்ஜித் இடிப்பு, டெல்லியில் ஒரு மஸ்ஜித் இடிப்பு மற்றும் மதரஸாக்கள் மீதான புல்டோசர் தாக்குதல்களுக்கும் இந்த ஆர்ப்பாட்டத்தில் கடும் கண்டனம் தெரிவிக்கப்பட்டது. நாடு முழுவதும் உள்ள வக்பு சொத்துக்கள் மற்றும் வரலாற்றுச் சிறப்புமிக்க இஸ்லாமியக் கட்டமைப்புகளைப் பாதிக்கும் வகையிலான சட்ட மாற்றங்கள் மற்றும் நடவடிக்கைகள் குறித்தும் முஸ்லிம் சமூக அமைப்புகள் தங்களது கவலை வெளிப்படுத்தினர். 

===================

 "இந்திய முஸ்லிம்களுக்கான கண்காணிப்புக் குழு' விடுத்த அழைப்பின் பேரில் டெல்லியில் உள்ள ஜந்தர் மந்தரில் 29.09.2026 செவ்வாய்க்கிழமை மாலை 3 மணிக்கு ஆர்ப்பாட்டம் நடைபெற்றது. அதில், அகில இந்திய முஸ்லிம் தனியார் சட்ட வாரியம், ஜாமியத்துல் உலமாயே ஹிந்த் உள்ளிட்ட முஸ்லிம் அமைப்புகள் மட்டுமல்லாமல், சீக்கிய, ஜெயின அமைப்புகளும் கலந்துகொண்டு முழு ஆதரவு அளித்தன"

===================

உத்தரப் பிரதேசம், குஜராத் மற்றும் உத்தரகண்ட் ஆகிய மாநிலங்களில் மஸ்ஜித்துகள், சீல் வைக்கப்பட்டு பின்னர்  புல்டோசர் மூலம் இடிக்கப்பட்ட கடந்தகால சம்பவங்களையும் ஆர்ப்பாட்டக்காரர்கள் தங்களது எதிர்ப்பின்போது எடுத்துரைத்தனர். 

பிற மத வழிபாட்டு தலங்கள் மீதும் குறி :

 முஸ்லிம்களின் வழிபாட்டுத் தலங்கள் மட்டுமல்லாமல், கிறிஸ்தவர்களின் வழிபாட்டுத் தலங்களும் குறிவைக்கப்படுகின்றன. இதற்கு எதிராக  அனைவரும் ஜந்தர் மந்தரில் ஒன்றுகூடி போராட்டம் நடத்துவதாக முஸ்லிம் அமைப்புகள் தெரிவித்தன.  

மேலும். மத வழிபாட்டுத் தலங்கள் தொடர்பான இந்தப் பிரச்சினைகள் அனைத்திற்கும் முற்றுப்புள்ளி வைக்க வேண்டும் என்றும், நீதிமன்றம் இவிவகாரத்தை தாமாகவே முன்வந்து விசாரித்து சம்பந்தப்பட்ட அதிகாரிகள் மீது நடவடிக்கை எடுக்க வேண்டும் என்றும் ஆர்ப்பாட்டத்தில் வலியுறுத்தப்பட்டது. ஆர்ப்பாட்த்தில் ஈடுபட்ட தலைவர்கள் டெல்லி காவல்துறை கைது செய்தது. 

இந்திய முஸ்லிம்களின் நிலைமை குறித்து சில மாதங்களுக்கு முன்பு நடைபெற்ற உயர்மட்டக் கூட்டத்திற்குப் பிறகு, முஸ்லிம் சமூகத்தைச் சேர்ந்த 51 தலைவர்களைக் கொண்டு 'இந்திய முஸ்லிம்களுக்கான கண்காணிப்புக் குழு' அமைக்கப்பட்டது என்பது குறிப்பிடத்தக்கது. 

- சிறப்புச் செய்தியாளர் : எஸ்.ஏ.அப்துல் அஜீஸ்