கர்நாடகா பா.ஜ.க. எம்எல்ஏ வெறுப்பு பேச்சு.....!

கர்நாடகா பா.ஜ.க. எம்எல்ஏ ஹரிஷ் பூஞ்சாவின் எரிச்சலூட்டும் வெறுப்பு பேச்சு.....!

முஸ்லிம்களிடம் மன்னிப்பு கோரி கோயில் குழு கடிதம்.....!

மங்களூரு, மே,14- கோபாலகிருஷ்ணா கோயிலின்   பிரம்கலஷோத்சவ ஏற்பாட்டுக் குழுவால் அமைக்கப்பட்ட சில குழாய் மின் விளக்குகளை சேதப்படுத்தியதற்காக முஸ்லிம்கள் மீது குற்றம்சாட்டி, பா.ஜ.க. எம்.எல்.ஏ. ஹரிஷ் பூஞ்சாவின் வெறுப்பு பேச்சுக்கு கோபாலகிருஷ்ணா கோயில் அறக்கட்டளை முஸ்லிம்களிடம் மன்னிப்பு கோரி கடிதம் எழுதியுள்ளது. 

கோயில் திருவிழா:

கர்நாடகா மாநிலம், தட்சிண கன்னட மாவட்டம், பெல்தங்காடி தாலுகாவில் உள்ள டெக்கர் கிராமத்தில் இருக்கும் பட்டரபைலுவில் உள்ள கோபாலகிருஷ்ணா கோயிலின்   பிரம்மகலஷோத்சவ விழாவின் 'தார்மிக சபா' நிகழ்ச்சி நடைபெற்றது. அப்போது, பிரம்கலஷோத்சவ ஏற்பாட்டுக் குழுவால் அமைக்கப்பட்ட சில குழாய் மின் விளக்குகளை சேதப்படுத்தியதாக முஸ்லிம்கள் மீது பா.ஜ.க. எம்.எல்.ஏ., ஹரிஷ் பூஞ்சா குற்றம்சாட்டி, எரிச்சலூட்டும் வகையில் வெறுப்பு பேச்சு பேசியதாக  கூறப்படுகிறது. மேலும், கோயில் நிகழ்வுக்கு முஸ்லிம்களை அழைத்ததற்காக ஏற்பாட்டுக் குழு உறுப்பினர்களையும் எம்.எல்.ஏ., கேள்வி எழுப்பினார்.

முஸ்லிம்கள் வேதனை: 

இந்நிலையில், பா.ஜ.க. எம்.எல்.ஏ. ஹரிஷ் பூஞ்சா செய்ததாகக் கூறப்படும் வெறுப்புப் பேச்சால் பாதிக்கப்பட்ட முஸ்லிம்களிடம் கோபாலகிருஷ்ணா கோயில் அறக்கட்டளை மன்னிப்பு கோரி கடிதம் எழுதியுள்ளது.  மேலும், புகாரைத் தொடர்ந்து, மே 4 அன்று பாஜக எம்.எல்.ஏ. மீது உப்பினங்காடி போலீசார் வழக்குப் பதிவு செய்துள்ளனர். மேலும், எரிச்சலூட்டும் உரை நிகழ்த்தியதாக குற்றம் சாட்டி பாரதிய நியாய சன்ஹிதாவின் பிரிவு 353(2) இன் கீழ் பூஞ்சா மீது வழக்குப் பதிவு செய்யப்பட்டுள்ளது. 

மே 5 ஆம் தேதி கோயில் அறக்கட்டளைக்கு எழுதிய கடிதத்தில், உள்ளூர் முஸ்லிம் உறுப்பினர்கள், பா.ஜ.க. எம்.எல்.ஏ.,  கூறிய குற்றச்சாட்டு குறித்து அதிருப்தி தெரிவித்தனர். "நாங்கள் அனைத்து சமூகங்களுடனும் இணக்கமாக வாழ்ந்து வருகிறோம், ஒருவருக்கொருவர் கொண்டாட்டங்களில் பங்கேற்று வருகிறோம். அனைத்து சமூகங்களையும் பிரதிநிதித்துவப்படுத்தும் எம்.எல்.ஏ.வின் ஆதாரமற்ற கருத்து எங்களை மிகவும் காயப்படுத்தியது. எனவே, அறக்கட்டளை மீதான எங்கள் வேதனையை கடிதத்தின் மூலம் வெளிப்படுத்தினோம்," என்று டெக்கார் கிராம பஞ்சாயத்தின் தலைவரும், சாராலிகட்டே, முஸ்லிம் ஒக்கூட்டாவின் அமைப்புச் செயலாளருமான அப்துல் ரசாக்  கடிதத்தில் குறிப்பிட்டு இருந்தார். 

முஸ்லிம்களிடம் மன்னிப்பு:

இதைத் தொடர்ந்து, மே 7 அன்று ஒக்கூட்டா உறுப்பினர்களுடனான சந்திப்பைத் தொடர்ந்து, தர்மிக சபா நிகழ்ச்சியின் போது தெரிவிக்கப்பட்ட பாதகமான கருத்துக்களுக்கு முஸ்லிம் சமூகத்திடம் மன்னிப்பு கேட்டு அறக்கட்டளை அதே நாளில் ஒரு கடிதத்தை எழுதியது. பிரம்மகலஷோத்சவத்தில் தீவிரமாக பங்கேற்றதற்காக முஸ்லிம் சமூக உறுப்பினர்களுக்கு நன்றி தெரிவித்த அறக்கட்டளை, எதிர்காலத்தில் அனைத்து சமூகங்களும் நல்லிணக்கத்துடன் வாழ விரும்புவதாகக் கூறியுள்ளது.

இதற்கிடையில், மங்களூரில் செய்தியாளர்களிடம் பேசிய எம்.எல்.ஏ. தனது உரையை நியாயப்படுத்தினார். தனது வார்த்தைகள் மூலம் "இந்து சமூகத்தை எழுப்பினேன்" என்றும் பூஞ்சா கூறியுள்ளார். அரசாங்கம் அதை வகுப்புவாத மற்றும் எரிச்சலூட்டும் வகையில் விளக்கியது.

- சிறப்புச் செய்தியாளர்: எஸ்.ஏ.அப்துல் அஜீஸ்