கலைஞர் துசிஃப் அஹ்மத் - புதிய முயற்சி....!

"திருக்குர்ஆனைப் பற்றி சிந்திக்க ஒரு அழைப்பு"  

- ஒரு கலைஞரின் புதிய முயற்சி -

உலக மக்களுக்கு ஏக இறைவன் வழங்கிய அழகிய வாழ்க்கை நெறியான திருக்குர்ஆனின் செய்தியை அனைத்து மக்களுக்கும் கொண்டு சேர்க்கும் பணிகளில் ஏராளமான இஸ்லாமியர்கள் ஈடுபட்டு வருகிறார்கள். தங்களுடைய எழுத்து, பேச்சு, அழகிய செயல் உள்ளிட்ட திறமைகள் மூலம் திருக்குர்ஆனின் ஒளியை மக்களிடம் கொண்டு சேர்க்கும் அவர்கள், தங்களுடைய பணிகள் மூலம் மன அமைதியை பெறுகிறார்கள். அத்துடன் மற்றவர்களுக்கும் இஸ்லாமிய ஒளியை ஏற்றி வைக்கிறார்கள். 

ஏக இறைவன் தங்களுக்கு வழங்கிய அழகிய திறமைகளை எத்தகைய முறையில் பயன்படுத்திக் கொண்டு, அதன்மூலம் திருக்குர்ஆனின் செய்தியை மற்றவர்களுக்கு கொண்டு சேர்க்க வேண்டும் என்பதில், பலர் மிகுந்த ஆர்வத்துடன் இருந்து வருகிறார்கள். அந்த வகையில் ஆஸ்திரேலியாவைச் சேர்ந்த கலைஞர் ஒருவர், திருக்குர்ஆன் வசனங்களை சிக்கலான காகித வெட்டு படைப்புகளுடன் அழகிய முறையில் காட்சிப்படுத்தி அனைவரின் கவனத்தையும் ஈர்த்து வருகிறார். அந்த கலைஞரின் புதிய முயற்சி குறித்து சுவையான தகவல்களை இந்த கட்டுரையில் நாமும் அறிந்துகொள்வோம். 

கலைஞர் துசிஃப் அஹ்மத் :

ஆஸ்திரேலியாவைச் சேர்ந்த பாகிஸ்தானிய கலைஞர் துசிஃப் அஹ்மத் அண்மையில் சவூதி அரேபியாவின் ஜெட்டாவிற்கு வருகை தந்து, திருக்குர்ஆன் வசனங்களின் சிக்கலான மற்றும் வண்ணமயமான காகித வெட்டு பிரதிநிதித்துவங்களை காட்சிப்படுத்தினார். 2006 முதல் ஆஸ்திரேலியாவில் வசித்து வரும் அஹ்மத், லைலா டிசைன் கேலரியில் நடந்த ஒரு உரையின் போது,  இஸ்லாமிய கலை ஆர்வலர்கள் பார்வையாளர்களுக்கு தனது படைப்புகளை வழங்கினார்.

கடந்த 12 ஆண்டுகளில், அவர் 500 க்கும் மேற்பட்ட படைப்புகளை தயாரித்து அவற்றை உலகளவில் காட்சிப்படுத்தியுள்ளார். மேலும் "திருக்குர்ஆனைப் பற்றி சிந்திக்க ஒரு அழைப்பு" என்று அவர் விவரிக்கும் ஒரு கலை வடிவத்திற்கான அங்கீகாரத்தையும் பெற்றுள்ளார்.  அஹ்மத்தின் 5 வயது மகள் அவரிடம் ஒருநாள், "பாபா, எனக்கு வாழ்க்கை சலிப்பாக இருக்கிறது" என்று சொன்னபோது அவரது பயணம் தற்செயலாகத் தொடங்கியது. தனது மகளை மகிழ்விக்க, அவர் ஒரு தாளை மடித்து சூரியகாந்தி வடிவத்தில் வெட்டினார். இது அவரது நம்பிக்கையை கையெழுத்து, வடிவியல் மற்றும் கதைச் சொல்லல் மீதான அன்போடு இணைக்கும் ஒரு கலைப் பாதையைத் தூண்டியது.

மக்களை இணைப்பதே நோக்கம் :

"சவூதி அரேபியாவில் கண்காட்சிகள், கலைஞர்களின் பேச்சுக்கள் மற்றும் தனிப்பட்ட காட்சிகள் மூலம் மக்களை திருக்குர்ஆனின் ஆன்மீக மற்றும் கலை அழகோடு இணைப்பதே எனது நோக்கம்" என்று அவர் தனது சவூதி வருகை குறித்து கருத்து தெரிவித்துள்ளார். திருக்குர்ஆனின் செய்தியின் ஆழத்தை பிரதிநிதித்துவப்படுத்த தனது படைப்புகள் அடுக்கு வடிவங்கள் மற்றும் ஒளியைப் பயன்படுத்துகின்றன என்று அஹ்மத் விளக்கம் அளித்துள்ளார். 

"ஒவ்வொரு கலைப்படைப்பும் பாரம்பரியத்திற்கும் நவீன வெளிப்பாட்டிற்கும் இடையே ஒரு பாலத்தை உருவாக்குவதை நோக்கமாகக் கொண்டுள்ளது. இது முஸ்லிம்களையும் முஸ்லிம் அல்லாதவர்களையும் இஸ்லாமிய கலையின் ஆன்மீக சாரத்துடன் இணைக்க ஊக்குவிக்கிறது" என்றும்  அவர் கூறியுள்ளார்.  அஹ்மத் தனது கலை மூலம் கலாச்சார புரிதலை வளர்த்து, இஸ்லாம் பற்றிய தவறான கருத்துக்களை அகற்றும் அதேவேளையில், ஒரு அதிசய உணர்வை உருவாக்க விரும்புகிறார்.

“இது அழகான ஒன்றைப் பகிர்ந்து கொள்வது, ஒரு தொடர்பை உருவாக்குவது மற்றும் உலகில் ஒரு நேர்மறையான முத்திரையை பதிப்பது பற்றியது” என்று கலைஞர் அஹ்மத் பெருமையுடன் தெரிவிக்கிறார். “கடந்த 2019ஆம் ஆண்டு நடந்த நியூசிலாந்து கிறைஸ்ட்சர்ச் மஸ்ஜித் சோகத்தின் போது பல முஸ்லிம்கள் தங்கள் உயிர்களை இழந்தனர். இதையடுத்து இஸ்லாம் போதிக்கும் அமைதி மற்றும் புரிதலை மேம்படுத்துவதற்கான ஆழமான பொறுப்பை நான் உணர்ந்தேன்” என்று கூறும் அஹமத், “மதங்களுக்கு இடையிலான நல்லிணக்கத்தின் அடையாளமாக ஒரு கத்தோலிக்க தேவாலயத்தில் எனது இஸ்லாமிய காகித வெட்டும் கலைப்படைப்புகளை காட்சிப்படுத்தினேன். அல்ஹம்துலில்லாஹ். இந்த நடவடிக்கை உலகம் முழுவதும் பரவலாகப் பாராட்டப்பட்டது. மேலும் பலர் இதை ஒற்றுமை மற்றும் மரியாதையின் அடையாளமாகக் கண்டனர்” என்று பெருமையுடன் கூறி மகிழ்ச்சி அடைகிறார். 

ஆன்மீக கவனம் தேவை :

ஜெட்டாவில் நடந்த நிகழ்ச்சியில் பேசிய அஹ்மத், தனது உரையின் போது, அர்-ரஹ்மான், யாசீன் மற்றும் யூசுப் ஆகிய சூராக்களால் ஈர்க்கப்பட்ட தொடரிலிருந்து படைப்புகளைக் காட்சிப்படுத்தினார். சிறிய படைப்புகளுக்கு வாரங்கள் ஆகலாம். பெரியவற்றுக்கு பல மாதங்கள் ஆகும். அனைத்திற்கும் பொறுமை மற்றும் ஆன்மீக கவனம் தேவை என்றும்  அவர் விளக்கம் அளித்தார். அரபு மொழியை தாய்மொழியாகக் கொள்ளாவிட்டாலும், அவர் திருக்குர்ஆனைக் கற்கவும் ஆழமாகப் படிக்கவும் தொடங்கியுள்ளார்.

"நான் பணிபுரியும் ஒவ்வொரு திருக்குர்ஆன் வசனத்திலும் உள்ள செய்தியைப் புரிந்துகொள்ள நான் மிகவும் ஆர்வமாக உள்ளேன். பின்னணியைப் புரிந்து கொள்ள, அறிஞர்களின் சொற்பொழிவுகளிலிருந்து வழிகாட்டுதல்களைப் பெற்று அரபு மொழி வகுப்புகளில் கலந்துகொள்கிறேன்" என்று  தனது கலை ஆர்வம் குறித்து கலைஞர் அஹ்மத் அழகுடன் விளக்கம் அளிக்கிறார். தற்போது​​அஹ்மத், ஜெட்டா மற்றும் ரியாத்தில் உள்ள கலை மற்றும் கலாச்சார அமைப்புகளுடன் சவூதி அரேபியாவில் தனது முதல் தனி கண்காட்சியை நடத்துவதற்காக முயற்சிகளை மேற்கொண்டு அதில் வெற்றியும் பெற்றுள்ளார். 

இதுகுறித்து கருத்து தெரிவித்துள்ள அவர், "எனது முழுமையான படைப்புகளை வழங்கவும், சவூதி அரேபியாவில் பரந்த பார்வையாளர்களுடன் ஈடுபடவும் ஒரு தனி கண்காட்சி ஒரு சிறந்த வாய்ப்பாக இருக்கும்" என்று கூறி மகிழ்ச்சி அடைகிறார்.  ஒவ்வொரு கலைப்படைப்பும் பாரம்பரியத்திற்கும் நவீன வெளிப்பாட்டிற்கும் இடையில் ஒரு பாலத்தை உருவாக்குவதை நோக்கமாகக் கொண்டுள்ளது. முஸ்லிம்கள் மற்றும் முஸ்லிம் அல்லாதவர்கள் இஸ்லாமிய கலையின் ஆன்மீக சாரத்துடன் இணைவதற்கு ஊக்கமளிக்கிறது என்ற கலைஞர் துசிஃப் அஹ்மத்தின் வார்த்தைகளில் எவ்வளவு உண்மை உள்ளது. 

-  எஸ்.ஏ.அப்துல் அஜீஸ்