தாயிஃப் ஒட்டகப் பந்தய விழா....!

 " தாயிஃப் ஒட்டகப் பந்தய விழா "

 சவூதி அரேபியாவில் நடைபெறும் உலகப் புகழ்பெற்ற ஒட்டகப் பந்தயம் விழா மற்றும் அழகுப் போட்டிகளைக் கொண்ட ஒரு பெரிய கலாச்சார நிகழ்வாகும். இந்த விழா, மன்னர் அப்துல்அஜிஸ் ஒட்டக விழா என்றும் அழைக்கப்படுகிறது. இதில் உலகெங்கிலும் இருந்து ஒட்டகப் பிரியர்கள், சுற்றுலாப் பயணிகள் மற்றும் போட்டியாளர்கள் கலந்துகொள்கின்றனர். இந்த விழாவில் பந்தயங்கள், ஒட்டகங்களின் அழகு மதிப்பிடல், கலாச்சார நிகழ்ச்சிகள் மற்றும் சந்தைகள் என பல அம்சங்கள் இடம்பெறுகின்றன. 

மேலும், ஒட்டகங்கள் ஒரு குறிப்பிட்ட தூரத்திற்கு பந்தயத்தில் ஈடுபடும். பாரம்பரியமாக, ஜாக்கிகள் ஒட்டகங்களின் மீது சவாரி செய்வர்.  இதேபோன்று, ஒட்டகங்களின் அழகை நடுவர் குழுக்கள் மதிப்பீடு செய்து வெற்றியாளர்களைத் தேர்வு செய்கிறார்கள்.  இந்த விழாவில் ஒட்டக அக்ரோபாட்டிக்ஸ், நடன நிகழ்ச்சிகள் மற்றும் பிற கலாச்சார நிகழ்ச்சிகளும் இடம்பெறுகின்றன.  இங்கு ஒட்டகப் பந்தயம் தொடர்பான பல பிரத்தியேகப் பொருட்கள் விற்பனை செய்யப்படுகின்றன. 

இந்த விழா முக்கியமாக ரியாத்தில் உள்ள கிங் அப்துல்அஜிஸ் ரேஸ்ட்ராக்கில் நடைபெறுகிறது. தாயிஃப் மற்றும் அல்உலா போன்ற பிற இடங்களிலும் இதுபோன்ற விழாக்கள் நடைபெறுகின்றன. ஒட்டகப் பந்தயம் என்பது சவூதி கலாச்சாரத்தின் ஓர் அங்கமாகும். இந்த விழாவானது நாட்டுப்புற பாரம்பரியத்தை மேம்படுத்துவதோடு, நாட்டின் பொருளாதாரத்தை பெட்ரோலியத்தை சார்ந்திருப்பதில் இருந்து மாற்றி, உலகளவில் ஒட்டகப் பந்தயத்தை பிரபலப்படுத்தும் ஒரு முயற்சியாகவும் உள்ளது.

தாயிஃப் ஒட்டகப் பந்தய விழா :

சவூதி அரேபியாவில் உள்ள புகழ்பெற்ற தாயிஃப் நகரில் நடைபெறும் ஒட்டகப் பந்தய விழா ஒரு பாரம்பரிய விழாவாகும். இது பட்டத்து இளவரசர் ஒட்டகத் திருவிழா என்றும் அழைக்கப்படுகிறது. இந்த விழா ஒட்டகப் பந்தயங்கள், ஒட்டக அழகுப் போட்டிகள் மற்றும் கலாச்சார நிகழ்வுகளை உள்ளடக்கியது. இதன் மூலம் ஒட்டகங்களின் கலாச்சார முக்கியத்துவத்தை கொண்டாடுகிறது. இதில், ஒட்டகங்களுக்கு லட்சக்கணக்கான சவுதி ரியால்கள் பரிசுத் தொகையாக வழங்கப்படுகிறது.   இந்த விழாவின் முக்கிய அம்சம் ஒட்டகப் பந்தயங்கள் ஆகும். இதில் பல்வேறு பிரிவுகளில் ஒட்டகங்கள் போட்டியிடுகின்றன. 

கலாச்சார நிகழ்வுகள்:

தாயி ஃப் சவூதி அரேபியாவின் கோடைகால தலைநகரம் என்றும் அழைக்கப்படுகிறது. ஏனெனில் இதன் உயர்ந்த மலைப்பகுதி காரணமாக குளிர்ச்சியான காலநிலை நிலவுகிறது.  இங்கே உள்ள ஒட்டகப் பந்தய மைதானம் நவீன தொழில்நுட்பங்களுடன் மேம்படுத்தப்பட்டுள்ளது. இந்தாண்டுக்கான ஒட்டகப் பந்தய விழா செப்டம்பர் 2ஆம் தேதி தொடங்கி, செப்டம்பர் 12ஆம் தேதி வரை நடைபெறுகிறது.  வரலாற்று சிறப்புமிக்க தாயிஃப் ஒட்டக சதுக்கத்தில் நடைபெறும் இந்த ஒட்டகப் பந்தய விழாவின் ஆறாவது நாளின் ஒரு பகுதியாக ஆண்கள் மற்றும் பெண்களுக்கான ஒட்டகப் பந்தயம் நடைபெற்றது. 

சவூதி கேமல் ஸ்போர்ட்ஸ் ஏற்பாடு செய்துள்ள இந்த விழாவின் ஏழாவது பதிப்பில், எட்டு நாடுகளைச் சேர்ந்த 78 ஆண்கள் மற்றும் பெண்களுக்கான ஐந்து ஒட்டகப் பந்தயங்கள் உட்பட 249 பந்தயங்கள் இடம்பெறுகின்றன. மொத்த பரிசுத் தொகை 50 மில்லியனுக்கும் அதிகமான சவூதி ரியாலாகும். 

தலா ஐந்து கிலோமீட்டர் தூரத்திற்கு மேல் ஆண்களுக்கு மூன்று பந்தயங்களும், இரண்டு கிலோமீட்டர் தூரத்திற்கு மேல் பெண்களுக்கு இரண்டு பந்தயங்களும் இருக்கும். ஒவ்வொரு பந்தயத்திலும் வெற்றி பெறுபவர் ஆயிரம் சவூதி ரியால் ரொக்கப் பரிசைப் பெறுவார், பத்தாவது இடத்தைப் பிடிக்கும் போட்டியாளருக்கு 5 ஆயிரம் சவூதி ரியால் வரை விருதுகள் வழங்கப்படும். இந்தாண்டு நடைபெறும் ஒட்டகப் பந்தய விழாவில்  சவூதி அரேபியா, ஐக்கிய அரபு எமிரேட்ஸ், ஓமன், குவைத், ஏமன், பஹ்ரைன், அல்ஜீரியா மற்றும் ஐக்கிய இராச்சியம் ஆகிய நாடுகளைச் சேர்ந்த ஒட்டகப் பந்தய வீரர்கள், வீராங்கனைகள் கலந்துகொண்டுள்ளனர். 

ஒரு லட்சம் ஒட்டங்கள் பங்கேற்பு :

தாயிஃப் ஒட்டகப் பந்தய விழாவில், சாதனை எண்ணிக்கையுடன் ஒரு லட்சம் ஒட்டகங்கள் பங்கேற்றதுடன், அதிக பந்தயங்களும் நடைபெற்றதால், இந்த விழா ஒட்டக உரிமையாளர்களை வெகுவாக ஈர்த்தது. அவர்களில் ஹெயிலைச் சேர்ந்த அனுபவமிக்க போட்டியாளரும் உள்ளூர் பந்தயப் பாதையின் இயக்குநருமான ஃபஹத் பென் ஜூரோவும் ஒருவர் ஆவார். இரண்டு முதல் ஆறு வயது வரையிலான 50க்கும் மேற்பட்ட ஒட்டகங்களைக் கொண்ட தனது மந்தையின் மீது அவர் அதிக முதலீடு செய்துள்ளார். மேலும் அவை பந்தயத்தில் சிறப்பாகச் செயல்படும் என்று அவர் நம்பிக்கை கொண்டுள்ளார். "ஒட்டகப் பந்தயத்திற்கு அதன் சொந்த சூழல் உள்ளது. மேலும் இந்த நிகழ்வுகளில் போட்டியின் உணர்வு உண்மையிலேயே தனித்துவமானது" என்று ஃபஹத் பென் ஜூரோ தெரிவித்துள்ளார். 

மேலும், தாயிஃப் பாதையில் உள்ள வசதிகளைப் பாராட்டிய அவர், இது "ஒட்டகப் பந்தயத்திற்கு ஏற்றது" என்றும், விளையாட்டின் வளர்ந்து வரும் போட்டித்தன்மை மற்றும் அதிகரித்து வரும் பரிசு மதிப்புகளை எடுத்துரைத்தார். இந்த ஆண்டு மொத்தம் ஒரு லட்சத்துக்கும் மேற்பட்ட ஒட்டகங்கள் விழாவில் பங்கேற்க உள்ளன. இது முந்தைய ஆறு பதிப்புகளை விட அதிகமாகும். கடந்த ஆண்டு இந்த விழா கின்னஸ் உலக சாதனைகளால் ஒரு பந்தய விழாவில் இதுவரை இல்லாத அளவுக்கு அதிக எண்ணிக்கையிலான ஒட்டகங்களைக் கொண்டிருந்ததற்காக அங்கீகரிக்கப்பட்டது.  இந்த நிகழ்வு 2023 இல் மக்கா பொருளாதார சிறப்பு விருதையும் வென்றது. இது பாரம்பரியத்தைக் கொண்டாடுவதிலும் கலாச்சார மற்றும் பொருளாதார ஈடுபாட்டை அதிகரிப்பதிலும் அதன் பங்கை அடிக்கோடிட்டுக் காட்டுகிறது.

- எஸ்.ஏ.அப்துல் அஜீஸ்