22 வகையான தேனை உற்பத்தி செய்யும் முஸ்லிம் சிறுவன்....!

 " 22 வகையான தேனை உற்பத்தி செய்யும் 14 வயது முஸ்லிம் சிறுவன் "

ஐக்கிய அரபு அமீரகத்தைச் சேர்ந்த அப்துல்லா ஹமாத் அல் காபி எஙனற 14 வயது சிறுவன் 22 வகையான தேனை உற்பத்தி செய்து விற்பனை செய்வதுடன், குடும்பத்தின் 70 ஆண்டுகால தேனீ வளர்ப்பு பாரம்பரியத்தைத் தொடர்கிறார் என்பது நம்மில் பலருக்கு வியப்பாக இருக்கும். ஆனால் அப்துல்லா ஹமாத் அல் காபி உடைய கதையை அறியும்போதும் தேனை போலவே மிகவும் சுவையானதாகவே இருக்கிறது. 

ஐக்கிய அரபு அமீரகத்தின் அல் ஐனைச் சேர்ந்த 14 வயதான அப்துல்லா ஹமாத் அல் காபி, ஐக்கிய அரபு அமீரகத்தின் நீண்டகால தேனீ வளர்ப்பு பாரம்பரியத்தில் தனக்கென ஒரு குறிப்பிடத்தக்க இடத்தைப் பிடித்துள்ளார். நான்காம் தலைமுறை தேனீ வளர்ப்பாளரான அப்துல்லா, தனது தந்தை ஹமாத் அல் காபியிடமிருந்து இந்தத் தொழிலைக் கற்றுக்கொண்டார். மேலும் ஒன்பது வயதிலேயே தனது திறமைகளை வளர்க்கத் தொடங்கினார்.

அப்துல்லா இன்று, தனது சொந்த தேன் பிராண்டான 'ஆஷிக் அல் பார் ஹனி'யை நடத்தி வருகிறார். இது ஐக்கிய அரபு அமீரகம் மற்றும் ஓமன் ஆகிய இரு நாடுகளிலும் அதிக தேவை உள்ள 22 தனித்துவமான வகை தேன்களை உற்பத்தி செய்கிறது. சமீபத்தில், நடைபெற்ற ஹட்டா தேன் திருவிழாவில்  தனது  தேன் சேகரிப்பை அவர் பெருமையுடன் காட்சிப்படுத்தினார்.

தேனீ வளர்ப்பு ஒரு கலை :

அப்துல்லாவைப் பொறுத்தவரை, தேனீ வளர்ப்பு என்பது ஒரு குடும்ப பாரம்பரியத்தை விட மேலானது. அது ஒரு பேரார்வம் மற்றும் அன்பான உழைப்பு. "தேன் தயாரிப்பது ஒரு கலை," என்று அவர் புன்னகையுடன் கூறுகிறார். "தேனீக்கள் ஒன்றுசேர்ந்து இவ்வளவு தூய்மையான மற்றும் நன்மை பயக்கும் ஒன்றை உருவாக்குவது ஆச்சரியமாக இருக்கிறது. தேனீக்களுடனும் அந்த செயல்முறையுடனும் எனக்கு ஒரு சிறப்புத் தொடர்பு இருப்பதாக உணர்கிறேன். நாங்கள் அனைவரும் ஒரு பெரிய குழு என்று நான் எப்போதும் நம்புகிறேன்," என்று அந்த இளம் தேனீ வளர்ப்பாளர் அப்துல்லா மேலும் கூறுகிறார்.

தனது பேரார்வத்தையும் கல்வியையும் சமநிலைப்படுத்தி, அப்துல்லா ஒரு ஒழுக்கமான தினசரி வழக்கத்தை உருவாக்கியுள்ளார். "நான் காலை 5 மணிக்கு எழுந்து, என் தொழுகைகளை முடித்துவிட்டு, மற்ற மாணவர்களைப் போலவே பள்ளிக்குச் செல்கிறேன். பள்ளி முடிந்ததும், மதிய உணவிற்காக வீட்டிற்கு வந்து உடனடியாக பண்ணைக்குச் செல்கிறேன்," என்று அவர் விளக்குகிறார்.

"என்னை பொறுத்தவரை, தேனீ வளர்ப்பு ஒரு வேலையாகத் தெரிவதில்லை. இது நான் உண்மையாகவே ஆவலுடன் எதிர்பார்க்கும் ஒன்று. தேன்கூடுகளைச் சரிபார்ப்பது, என் தந்தையிடமிருந்து புதிய நுட்பங்களைக் கற்றுக்கொள்வது, மற்றும் தேனீக்களால் சூழப்பட்டிருப்பது எனக்கு மகிழ்ச்சியைத் தருகிறது," என்று அப்துல்லா மேலும் கூறி பெருமை அடைகிறார்.

70 ஆண்டுகால தேனீ வளர்ப்பு :

அப்துல்லா தனது குடும்பத்தின் 70 ஆண்டுகால தேனீ வளர்ப்பு பாரம்பரியத்தை புதிய உயரங்களுக்கு கொண்டு செல்கிறார். இந்த குடும்பம் அல் ஐன் மற்றும் ஓமானில் பண்ணைகளை நடத்தி வருகிறது. மேலும் இந்த இரண்டு பிராந்தியங்களுக்கும் இடையிலான தட்பவெப்ப வேறுபாடு தங்கள் தேனின் சுவையை எவ்வாறு பாதிக்கிறது என்பதைப் பாராட்ட அப்துல்லா கற்றுக்கொண்டார். "ஓமானில் உள்ள தேனுக்கு ஒரு தனித்துவமான சுவை உண்டு. ஏனெனில் அங்குள்ள வானிலையும் பூக்களும் அல் ஐனில் உள்ளவற்றிலிருந்து வேறுபட்டவை," என்று அவர் விளக்குகிறார். இதன்மூலம் இயற்கை எப்படி சுவையை வடிவமைக்கிறது என்பது ஆச்சரியமாக இருக்கிறது என்பதை அறிந்துகொள்ள முடிகிறது. 

குடும்பத் தொழிலில் தனது சொந்தத் தனித்துவத்தைச் சேர்க்கும் விதமாக, அப்துல்லா தங்கள் பண்ணையிலும் அதைச் சுற்றியும் வளர்க்கப்படும் சித்ர் மற்றும் ஆலிவ் மரங்களின் தேனைப் பயன்படுத்தி தனக்கென ஒரு பிரத்யேக தேன் கலவையை உருவாக்கியுள்ளார். "இது எனது சிறப்புத் திட்டம்," என்று அவர் பெருமையுடன் கூறுகிறார். "மக்கள் எங்கள் பண்ணையுடன் தொடர்புபடுத்திக்கொள்ளும் வகையில் மறக்க முடியாத ஒன்றை உருவாக்க நான் விரும்பினேன். சித்ர் மற்றும் ஆலிவ் பூக்களின் கலவையானது ஒரு தனித்துவமான சுவையை உருவாக்குகிறது. இது எங்கள் வாடிக்கையாளர்கள் பலரால் விரும்பப்படுகிறது." என்று அப்துல்லா கூறி பெருமை அடைகிறார். 

நேர நிர்வாகம் செய்ய ஒழுக்கம் தேவை :

பள்ளிக்கும் தனது ஆர்வத்திற்கும் இடையில் தனது நேரத்தை எப்படி நிர்வகிக்கிறார் என்று கேட்டபோது, ​​அதற்கு ஒழுக்கம் தேவை என்று அப்துல்லா தெரிவிக்கிறார். "என் படிப்பு ஒருபோதும் புறக்கணிக்கப்படுவதில்லை என்பதை நான் உறுதிசெய்கிறேன். மாலையில் சில மணிநேரம் பண்ணையில் செலவழித்த பிறகு, என் வீட்டுப் பாடங்களை முடித்துவிடுகிறேன்," என்று அவர் கூறுகிறார்.

அப்துல்லாவைப் பொறுத்தவரை, தேனீ வளர்ப்பு என்பது ஒரு குடும்ப பாரம்பரியத்தை விட மேலானது. "இது சிறப்பு வாய்ந்தது. ஏனென்றால் இது என்னை எனது பாரம்பரியத்துடன் இணைக்கிறது. என் கொள்ளுத் தாத்தா இதைத் தொடங்கினார். ஒவ்வொரு தலைமுறையும் இதை உயிர்ப்புடன் வைத்திருக்க கடுமையாக உழைத்துள்ளது," என்று அப்துல்லா தெரிவிக்கிறார்.

"இந்த பயணத்தைத் தொடர்வதிலும், அதில் எனது சொந்தத் தனித்துவத்தைச் சேர்ப்பதிலும் நான் பெருமைப்படுகிறேன். தேனீ வளர்ப்பு உங்களுக்குப் பொறுமை, குழுப்பணி மற்றும் இயற்கையின் மீதான மரியாதையைக் கற்றுக்கொடுக்கிறது," என்று அப்துல்லா மேலும் கூறி மகிழ்ச்சியுடன் பெருமை அடைகிறார். 

எதிர்காலத்தைப் பார்க்கும்போது, ​​அப்துல்லா தனது தொழிலை விரிவுபடுத்தவும், இயற்கை தேனின் மகிழ்ச்சியை அதிக மக்களுடன் பகிர்ந்து கொள்ளவும் கனவு காண்கிறார். "தூய தேன் தயாரிப்பதில் உள்ள முயற்சியை அனைவரும் புரிந்துகொள்ள வேண்டும் என்று நான் விரும்புகிறேன். இது வெறும் உணவு மட்டுமல்ல. இது மருந்து, பாரம்பரியம் மற்றும் கலாச்சாரம் அனைத்தும் ஒரே ஜாடியில் அடங்கியுள்ளது," என்று அப்துல்லா உறுதியுடன் கூறுவதை கேட்கும்போது உண்மையில் மகிழ்ச்சி ஏற்படுகிறது. 

- எஸ்.ஏ.அப்துல் அஜீஸ்