வீணாகும் இளைஞர்களின் திறமைகள்....!

புதிய வேலைவாய்ப்புகளை உருவாக்காத அரசு!

வீணாகும் பட்டதாரி இளைஞர்களின் திறமைகள்...!!

-  ஜாவீத்  -

கடந்த 2014-ஆம் ஆண்டு நடந்த நாடாளுமன்றத் தேர்தலின்போது, பா.ஜ.க., நாட்டின் இளைஞர்களுக்கு ஓர் உத்தரவாதம் அளித்தது. ஆண்டுக்கு 2 கோடி புதிய வேலைவாய்ப்புகள் உருவாக்கப்படும் என்பதுதான் அந்த வாக்குறுதியாகும். பா.ஜ.க.வும் பிரதமர் பொறுப்புக்கு வந்த நரேந்திர மோடியும் அளித்த வாக்குறுதியின்படி, கடந்த பத்து ஆண்டுகளில், சுமார் 20 கோடி வேலைவாய்ப்புகள் உருவாக்கி, நாட்டின் இளைஞர்களின் வாழ்வில் ஒளி ஏற்றி இருக்க வேண்டும். ஆனால், அப்படி எதுவும் நடைபெறவில்லை. புதிய வேலைவாய்ப்புகளை உருவாக்குவதற்கு பதிலாக, ஏற்கனவே இருந்த பொதுத்துறை நிறுவனங்கள் தனியார் மயமாக்கப்பட்டன. இதனால், அங்கு காலியாக இருந்த பணியிடங்களில், இளைஞர்கள் யாரும் நியமிக்கப்படவில்லை. இதன் காரணமாக நாட்டில் வேலையில்லாத் திண்டாட்டம் தொடர்ந்து அதிகரித்து வருகிறது. 

பரிதாப நிலையில் இளைஞர்கள்:

காங்கிரஸ் உள்ளிட்ட கட்சிகள் தரும் புள்ளிவிவரங்களின்படி, மத்திய அரசின் பல்வேறு துறைகளில் மட்டும், சுமார் 30 லட்சம் பணியிடங்கள் காலியாக இருப்பதாக தகவல்கள் தெரிவிக்கின்றன. இந்த பணியிடங்களை நிரப்பி இருந்தால், ஓரளவுக்கு வேலையில்லா திண்டாடட்டத்தின் பளு சற்று குறைந்து இருக்கும். ஆனால், பா.ஜ.க. அரசு அதை செய்யவில்லை. இதன் காரணமாக அரசு மற்றும் தனியார் துறைகளில் வேலைகளைத் தேடும் பணியில், இளைஞர்கள் தொடர்ந்து ஈடுபட்டு வருகிறார்கள்.  ஆனால் மிகப்பெரிய அளவுக்கு பலன் எதுவும் கிடைக்காத காரணத்தால், விரக்தியின் உச்ச நிலைக்கு இளைஞர்கள் சென்றுக் கொண்டிருக்கிறார்கள். 

படிப்புக்கும் பணிக்கும் சம்பந்தம் இல்லை என்று சொல்வதைப் போல, பல இளைஞர்கள், குடும்பத்தின் பொருளாதார நிலையை கருத்தில் கொண்டு, கிடைக்கும் வேலையில் சேர்ந்துவிடுகிறார்கள். இதன்மூலம் அவர்களுக்கு கொஞ்சம் வருமானம் கிடைத்தாலும், அவர்களின் திறமைகள் வீணடிக்கப்படுகின்றன என்பதை மறுக்க முடியாது. 

ஒரு சிறிய சம்பவம்:

பா.ஜ.க.வின் மூத்த தலைவர் நரேந்திர மோடியின் வாக்குறுதிகளால் தூண்டப்பட்டு, ரவி என்ற இளைஞர் கடந்த 2014ஆம் ஆண்டு பா.ஜ.க.விற்கு வாக்களித்தார். மகாராஷ்டிரா மாநிலம் புசாத் பகுதியைச் சேர்ந்த திறமையான இளைஞரான ரவி, ஆரம்ப மற்றும் உயர்நிலைப் பள்ளிகளில் முதலிடம் பிடித்தார். அங்குள்ள மற்ற இளைஞர்களுக்கு அவர் ஒரு உத்வேகமாக இருந்தார். சரியாகச் செயல்படாத இளைஞர்களை அவமானப்படுத்த ரவியின் பெயரை பயன்படுத்தி, அவன் எப்படி அருமையாக படிக்கிறான் பார் என மற்றவர்கள் கூறுவார்கள்.  உயர்நிலைப் பள்ளிக்குப் பிறகு, பொறியியல் பட்டப்படிப்பைத் தொடர்ந்த ரவி, பெரிய திட்டங்களை வைத்திருந்ததால், சிவில் சர்வீஸ் தேர்வுக்கு தயாராவதற்காக புதுடெல்லி சென்றார். ஆனால் பல்வேறு நெருக்கடிகளை சந்திக்க வேண்டிய சூழ்நிலை ஏற்பட்டதால், பல ஆண்டுகளுக்குப் பிறகு, மீண்டும் வறட்சியால் பாதிக்கப்பட்ட பின்தங்கிய மாவட்டமான ஹிங்கோலிக்குத் திரும்பினார்.

ஹிங்கோலியில் மார்க்கெட்டிங் துறை தொடர்பான பணியில் ஈடுபட்ட ரவிக்கு, கமிஷன் அடிப்படையிலான சம்பளம் கிடைத்தது. இருப்பினும், நீண்ட காலத்திற்கு பணியில் நீடிக்க முடியவில்லை. 30 வயதை நெருங்கிவிட்டதால், அவரது பெற்றோர் ரவிக்கு திருமணம் செய்து வைத்தனர். பொறுப்புள்ள குடும்பத் தலைவரான ரவி, புனேவுக்கு நெட்வொர்க் இன்ஜினியராகப் பணிபுரியச் சென்றார். ஆண்டுக்கு 3 லட்சத்துக்கு மேல் சம்பளம் இருந்தாலும், மாதம் 15 ஆயிரம் ரூபாய் மட்டுமே வீட்டுக்கு எடுத்துச் செல்கிறார். மீதமுள்ளவை அவரது வருங்கால வைப்பு நிதி மற்றும் பிற கட்டணங்களுக்கு செல்கிறது. 

ரவி பணிபுரியும் நிறுவனத்தில் ஒரு ஆட்சேர்ப்பு நிறுவனம் இணைக்கப்பட்டு, ஒப்பந்த தொழிலாளர் என்ற முறையை அமல்படுத்தி, ரவியின் சம்பளத்தில் இருந்து ஒரு பகுதியை கமிஷனாக எடுத்துக்கொள்கிறது. ஒப்பந்த தொழிலாளர் முறையை ஒழிப்பதாக மோடி வாக்குறுதி அளித்ததை தற்போது நினைவு கூறும் ரவி, ஒப்பந்தம் முடிவடைந்த பிறகு, தொழிலாளர்களுக்கு ஊதியம் கோர உரிமை இல்லை என நினைத்து வேதனை அடைகிறார். இதன்மூலம் வேலையின்மை விகிதம் நாட்டில் தொடர்ந்து அதிகரித்துக் கொண்டே செல்கிறது. இது ஒரு சிறிய சம்பவம் தான். நாட்டின் இளைஞர்கள் எப்படி வேலையில்லாமல் அலைந்து கொண்டு இருக்கிறார்கள் என்பதற்கு இப்படிப்பட்ட சம்பவங்கள் நல்ல எடுத்துக்காட்டுகளாக இருந்து வருகின்றன. 

புரிந்துகொள்ளாத அரசு:

அடிப்படை வறுமைக்கும் வேலையின்மைக்கும் உள்ள தொடர்பை மத்திய அரசு புரிந்து கொள்ளவில்லை. வேலையில்லாத் திண்டாட்டம் இளைஞர்களை ஏழ்மை நிலைக்குத் தள்ளினால், ஒப்பந்தத் தொழிலாளர் முறையானது, தொழிலாளர்களை வறுமையிலிருந்து விடுபடாமல் இனப்பெருக்கம் செய்யும் தொழில்களில் ஈடுபட வைக்கிறது. ரவியின் சம்பளம் பட்டதாரிகளின் சம்பளம்தான். பொறியியலாளராக இருந்தாலும், தன் மனைவியை பொழுதுபோக்கிற்காகவோ அல்லது விடுமுறைக்கு அழைத்துச் செல்வதற்கோ கூடுதல் பணம் செலவழிக்க முடியாது. வயதான காலத்தில் பெற்றோருக்கு பண உதவி செய்ய முடியாமல் தவிக்கிறார். காசோலைக்கு சம்பளம் என்று வாழ்கிறார். அவரது வேலை தன்னிறைவுக்கான உத்தரவாதம் அல்ல. இப்படி லட்சக்கணக்கான இளைஞர்கள் நாட்டில் வாழ்ந்து வருகிறார்கள். 

பல இளைஞர்கள் குறிப்பிட்ட ஒரு பணியில் சேர்ந்தாலும், அந்த பணி நிச்சயமற்ற பணியாக இருந்து வருகிறது. எப்போது வேண்டுமானாலும், பணியில் இருந்து நீக்கப்படலாம் என்ற அச்சம் இளைஞர்கள் மத்தியில் இருந்து வருகிறது. ஒரு துறையில் பணிபுரியும் நிச்சயமற்ற தன்மை இளைஞர்களை மனரீதியாக பாதிப்படையச் செய்துள்ளது. ஒரு வீட்டை வாங்கவோ அல்லது வழக்கமான பிடித்த வேலையில் சேரவோ முடியாது என்ற நிலைக்கு படித்த இளைஞர்கள் தள்ளப்பட்டுள்ளனர். 

உயர்கல்விப் படிக்க, வங்கிகளில் கல்விக் கடன் வாங்கிய பல இளைஞர்கள், வாழ்க்கைச் செலவுகளுக்கு பணம் போதுமானதாக இல்லை என்பதால், கடனை அடைக்க முடியாமல் தவித்து வருகிறார்கள். எனவே, நல்ல திறமையுள்ள இளைஞர்கள் பலர், நல்ல பணிகளில் சேர வெளிநாடுகளுக்கு பறந்துவிடுகிறார்கள். 

பயன்படுத்த தவறி அரசு:

இந்திய இளைஞர்களின் பட்டப்படிப்பு மற்றும் திறன்கள் அவர்களுக்கு ஒரு நல்ல ஸ்திரத்தன்மையை வழங்கத் தவறிவிட்டன. இளைஞர்கள் நாட்டில் தங்கியிருப்பதை உறுதிப்படுத்த, அவர்களின் திறமைகள் முழுமையாகப் பயன்படுத்த அரசு தவறிவிட்டது. இலட்சக்கணக்கான இளைஞர்கள் தேசத்திற்கு தங்களது பங்களிப்பை வழங்க விரும்புகிறார்கள்.  ஆனால் முடியவில்லை. இதனால் விரக்தியடையும் இளைஞர்கள், ஒப்பந்தப் பணிகளில் சேரும் நிலைக்கு தள்ளப்படுகிறார்கள். இது அவர்களின் எதிர்காலத்தைப் பற்றி கவலைப்பட வைக்கிறது.

இப்படிப்பட்ட சூழ்நிலையில், நாட்டில் வேலையில்லா திண்டாடத்தின் வளர்ச்சி விகிதம் சுமார் 8 சதவீதம் அளவுக்கு உயர்ந்து இருப்பதாக புள்ளிவிவரங்கள் தெரிவிக்கின்றன. அரசு, சரியான திட்டங்கள் உருவாக்கி சிறப்பு கவனம் செலுத்தினால் மட்டுமே இந்த விகிதம் குறையும் என வல்லுநர்கள் கூறுகிறார்கள். 

இந்திய இளைஞர்கள் மிகவும் திறமையானவர்கள். அவர்களின் திறமைகளை முழுமையாக பயன்படுத்திக் கொள்ள அரசு மற்றும் தனியார் துறைகள் முன்வர வேண்டும். ஒப்பந்த தொழிலாளர் முறையை கைவிட்டு, நிரந்தரப் பணிகளில் இளைஞர்களை சேர்க்க வேண்டும். இப்படி, நிரந்தரப் பணிகளில் சேரும் இளைஞர்கள், தங்களுடைய பணிகளில் சிறப்பு கவனம் செலுத்தி உழைப்பார்கள். இது நாட்டிற்கு மட்டுமல்ல, அந்த இளைஞர்களின் குடும்பங்களுக்கும் மிகுந்த முன்னேற்றத்தை ஏற்படுத்தும். 

இந்தியாவில் மிகப்பெரிய பிரச்சினையாக உருவெடுத்துக் கொண்டிருக்கும் வேலையில்லா திண்டாடட்டத்தை போக்க, புதிய அரசு, தனி அக்கறையுடன் செயல்பட்டால், இளைஞர்களின் திறமைகள் சொந்த நாட்டிற்கு பயன்படுத்த முடியும். அதன்மூலம், உலக நாடுகளுக்கு சவால் விடுக்கும் வகையில் இந்தியா பல்வேறு துறைகளில் உண்மையான, வேகமான வளர்ச்சியை எட்டும். 

==========================