ஒரு கல்வி நிறுவனம்....!

"மதரஸா-இ-ஆஸம்"

- வரலாற்றுப் புகழ்பெற்ற ஒரு  கல்வி நிறுவனம் -

சென்னையின் மட்டுமல்ல, தமிழகத்தின் முக்கிய அடையாளங்களில் ஒன்றாக இருக்கும் வரலாற்றுப் புகழ்பெற்ற ஒரு கல்வி நிறுவனம்தான் "மதரஸா-இ-ஆஸம்". சென்னையின் வசீகரமான காலனித்துவ கால கட்டிடக்கலையின் கடைசி நினைவூட்டல்களில் ஒன்றாக மதரஸா-இ-ஆஸம் இருந்து வருகிறது. சென்னையின் மையப்பகுதியான அண்ணாலை சாலையை ஒட்டி, சுமார் 11 ஏக்கர் பரப்பளவில் அமைந்துள்ள மதரஸா-இ-ஆஸம், பல சுவையான வரலாற்று சுவடுகளை, தன்னுடன் இணைத்து சுமந்துக் கொண்டு இருப்பதை அறியும்போது உண்மையில் மனம் மகிழ்ச்சி அடைகிறது. 

ஒரு சிறிய வரலாறு:

கடந்த 1761-இல் வாலாஜா, நவாப் எம்.டி. அலி கான் பகதூர் என்பவரால், கர்நாடக அரச குடும்பத்தின் குழந்தைகளுக்கான பள்ளியாக மதரஸா-இ-ஆஸம் தொடங்கப்பட்டது. பின்னர், 19 ஆம் நூற்றாண்டின் முற்பகுதியில், எச்.எச்.நவாப் குலாம் கவுஸ் கான் பகதூர், அனைத்து குழந்தைகளுக்கும் கட்டுப்பாடுகள் இல்லாமல் பள்ளிகளின் கதவுகளைத் திறந்தார். இதையடுத்து பள்ளிக்கு அவரது புனைப்பெயரான "ஆஸம்" என்று பெயரிடப்பட்டது. பின்னர்,  இது மதரஸா-இ-ஆஸம்  என்று அழைக்கப்பட்டு, சென்னை மக்களிடம் பிரபலம் அடைந்தது. 

பாரசீக, அரபு மற்றும் பிற ஓரியண்டல் மொழிகளில் நிபுணத்துவம் பெற்ற ஒரு ஆங்கில அறிஞர் எட்வர்ட் பால்ஃபோர் என்பவர், நவாப்பைச் சந்தித்து, நவாப்பின் குடும்ப மதரஸாவை, நவீன பாடத்திட்டத்தைப் பின்பற்றும் பள்ளியாக மாற்றும் அவரது பார்வையை முன்வைத்தார். இதன்மூலம், முதன்முறையாக, வடக்கில் உள்ள முஸ்லிம்களின் பள்ளிகளுக்கு நீண்ட காலத்திற்கு முன்பே, தெற்கில் வடமொழி மொழிகளுடன் நவீன விஞ்ஞானமும் கற்பிக்கப்பட்டது. சில தலைமையாசிரியர்கள் மௌலவிகளாக இருந்தனர்.  

ஹைதராபாத்தில் உள்ள மதரஸா-இ-ஆலியாவில் கல்வி பயின்ற பல முஸ்லிமல்லாதவர்கள் மௌலவிகளின் கீழ் வழிகாட்டியாக இருந்தனர். ஷெர்வானி மற்றும் டோபி உடையணிந்து, அலியாவின் மாணவர்கள் மதத்தைப் பொருட்படுத்தாமல் அரபு, பாரசீகம் மற்றும் உர்தூ  மொழிகளைக் கற்றுக்கொண்டனர். இதன்மூலம் அன்றாட இலக்கியங்களும் உர்தூவில் செழித்து வளர்ந்தன. இதேபோன்று, மதரஸா-இ-ஆஸமிலும், கல்வி பயின்று பலர் அறிஞர் பெருமக்களாக வலம் வந்தனர். 

ஒரு காலத்தில், மௌலவிகளிடம் இருந்து ஆங்கிலம் கற்ற ஒரு தலைமுறை மாணவர்கள் இந்தப் பள்ளியில் இருந்தனர். பின்னர் ஆங்கிலம் கற்ற ஆசிரியர்களால் கற்பிக்கப்படும் ஒரு தலைமுறை வந்தது. ஆண்டுகள் கடந்து செல்ல, ராட்சத பழமையான மரங்கள அனைத்தையும் மதரஸா கண்டது. தற்போதைய குழந்தைகள் அந்த மரங்களையும், மறைந்த புகழ்பெற்ற காலத்தின் நிழல்களையும் மட்டுமே காணும் வாய்ப்பை பெற்றுள்ளனர். 

முஸ்லிம்களுக்கு அழைப்பு:

மதரஸா-இ-ஆஸாம் மைதானத்தில், அரபு நாடுகளின் அறிவு உற்பத்தி மற்றும் பரிவர்த்தனை குறித்து, ஒருமுறை உணர்ச்சிப்பூர்வமாக உரை ஆற்றிய பால்ஃபோர் என்ற ஆங்கிலேயர் ஒருவர், கலிஃபாக்களின் அறிவியல் மற்றும் கலை சாதனைகள் எடுத்துக் கூறினார். அவர்கள் அறிவைச் சேகரித்து, முன்னேற்றம் வளர்ச்சியை நோக்கிச் சென்றதை சுட்டிக் காட்டிய ஆங்கிலேய அறிஞர், இதன் விளைவாக ஐரோப்பா, முஸ்லிம்களிடம் இருந்து நிறைய கற்றுக்கொண்டது என்றும் கூறினார். இப்போது நீங்கள் ஆங்கிலேயர்களிடமிருந்தும் அதையே திருப்பவும் கற்றுக்கொள்ள வேண்டும் என்பது வருந்தத்தக்கது என்றும் தெரிவித்தார். எனவே, உயர் கல்விக்கான மையத்தை உருவாக்க முஸ்லிம் தலைவர்கள் முன்வர வேண்டும் என்றும் அந்த ஆங்கிலேயர் ,அழைப்பு விடுத்து வேண்டுகோள் வைத்தார். 

இப்படி, ஒரு காலத்தில் பிரபுக்களால் மிகவும் விரும்பப்பட்ட கல்வி நிறுவனங்களில் ஒன்றாக இருந்த மதரஸா-இ-ஆஸம் பள்ளி, படிப்படியாக அனைத்து தரப்பு மாணவர்களையும் வரவேற்றது. மற்ற முக்கியப் பிரமுகர்களைத் தவிர, ஒலிம்பிக்கில் இந்தியாவைப் பிரதிநிதித்துவப்படுத்திய முகமது ரியாஸ் போன்ற சிறந்த ஹாக்கி வீரர்களை உருவாக்கியதற்காக மதரஸா-இ-ஆஸம் பெருமை கொள்கிறது. இந்தியாவுக்காக விளையாடிய பல ஹாக்கி வீரர்களை மதரஸா-இ-ஆஸம் உருவாக்கியுள்ளது. முனிர் சைட், எம்.டி. ரியாஸ் ஆகியோர் ஒலிம்பிக்கில் இந்தியாவைப் பிரதிநிதித்துவப்படுத்தியிருந்தனர். முகமது. ரியாஸ் இந்திய ஹாக்கி அணியின் கேப்டனாகவும் இருந்துள்ளார். மேலும் அர்ஜுனா விருது பெற்றவர் என்பதால் சென்னை மக்கள் பெருமை கொள்ள வேண்டும். 

சென்னையில் உள்ள பெரும்பாலான இஸ்லாமிய மாணவர்கள் இப்பள்ளியில் படித்தனர். இந்த பெரிய பள்ளியின் முன்னாள் மாணவர்கள் தற்போது உலகம் முழுவதும் பரவியுள்ளனர். இந்தப் பள்ளி புகழ்பெற்ற நிர்வாகிகள், மருத்துவர்கள், வழக்கறிஞர்கள், கட்டிடக் கலைஞர்கள் மற்றும் விளையாட்டு வீரர்களை உருவாக்கியுள்ளது.

கவனம் செலுத்த வேண்டும்:

மதரஸா-இ-ஆஸமில் தற்போது 6 முதல் 12 வரை வகுப்புகள் உள்ளன. இப்பள்ளியில், 300க்கும் மேற்பட்ட மாணவ, மாணவியர் படிக்கின்றனர். ஒரு காலத்தில் புகழ்பெற்று சென்னை முக்கிய அடையாளமாக திகழ்ந்த இந்த பள்ளி, தற்போது மிகப்பெரிய அளவுக்கு கவனம் செலுத்தப்படாமல் இருந்து வருகிறது. எனவே, மதரஸா-இ-ஆஸமின் மிகுந்த உண்மையான அக்கறைக் கொண்ட சிலர், சென்னையில் உள்ள பள்ளிகளில் மிகச் சிறந்த பள்ளியாக மதரஸா-இ-ஆஸமை மாற்றி உருவாக்கும் முயற்சியில் ஈடுபட்டு வருகிறார்கள். 

மதரஸா-இ-ஆஸம் வளாகத்தில் பயன்படுத்தப்படாமல் இருக்கும் நிலத்தில், மருத்துவக் கல்லூரி, கலை மற்றும் அறிவியல் கல்லூரி, சர்வதேச மொழி மையம், திறன் மேம்பாட்டு மையம், விளையாட்டு அகாடமி மற்றும் யுபிஎஸ்சி மற்றும் டிஎன்பிஎஸ்சி தேர்வுகள் மற்றும் பிற போட்டித் தேர்வுகளுக்கு பயிற்சி அளிப்பதற்கான சிறந்த மையம் போன்றவற்றை உருவாக்க முயற்சிகள் மேற்கொள்ளப்பட்டு வருகின்றன. முஸ்லிம்கள் மட்டுமல்லாமல், சகோதரச் சமுதாயத்தைச் சேர்ந்த மாணவ மாணவியர்களும்,  கல்வியறிவு பெற்றவர்களாகவும், அதிகாரம் மிக்கவர்களாகவும் மாற்ற அற்புதமான முன்னெடுப்புகள் தொடங்கப்பட வேண்டும் என்பது அனைவரின் விருப்பமாக இருந்து வருகிறது. இதற்காக தொடங்கப்படும் முயற்சிகள் ஏக இறைவனின் கருணையால் வெற்றி பெற வேண்டும். 

கடைசியாக, பல நூற்றாண்டுகள் பழமையான மதரஸா-இ-ஆஸம் மேல்நிலைப் பள்ளி கட்டிடம், பாரம்பரிய கட்டிடமாக அறிவிக்கப்பட்டு, இருப்பதால், அதனை இடிக்காமல், அதன் பாரம்பரியத்தை பாதுகாத்து, இளம் தலைமுறையினருக்கு  மதரஸா-இ-ஆஸமின் வரலாற்றை எடுத்துக் கூற வேண்டும். இதுவே மதரஸா-இ-ஆஸமிற்கு நாம் செய்யும் பெருமையாக இருக்கும்.

- எஸ்.ஏ.அப்துல் அஜீஸ்